Mateo 2 - Mam de Huehuetenango nueva ortografía

Tej kypon aj nab'l k'ulul twitz Jesús

¹ Tej titz'j Jesús tuj tnam Belén tuj tx'otx' Judea, tuj tq'ijlalil tej tten rey Herodes, at junjun xjal aj nab'l e tzaj tuj tjawitz q'ij e ul tuj Jerusalén.

² Xi kyqanin: —¿Jatum ta' ju rey kye xjal judiy, aju ma tz'itz'j? Porke ma qile tche'w tuj tjawitz q'ij, ex ma qo tzaje k'ulul twitz, che chi.

³ Tej tb'inte rey Herodes jlu, b'i'x naj tnab'l kyuk'ix kykyaqil xjal aj Jerusalén.

⁴ Oktzun tchmo'n Herodes kykyaqil nejenel kye pal kyuk'ix qe xnaq'tzal ti'j ley kye tnam xjal, xi tqanin kye jatum tu'n titz'j ju Crist aju at toklen tu'n Dios.

⁵ Xitzun kyma'n te: —Tuj tnam Belén tu'n titz'j, tuj tx'otx' Judea; porke iktzun tten tz'ib'an tu'n t-sanjel Dios. Chi t-sanjel Dios:

⁶ Aya tnam Belén tuj tx'otx' Judá, mya mas ch'in toklena kyxol txqantl tnam tuj Judá; ex atzun ktzajel jun nejenel tuja, te kwentil kye xjal aj Israel, aqeju etzan wu'ne.

⁷ E tzajtzun ttxko'n Herodes qe xjal aj nab'l tuj ewaj, cheb'a xi t-xjelin kye jte'xi q'ij ttzajlen tyek'un tib' che'w.

⁸ Xitzun t-sama'n Herodes qe xjal aj nab'l tuj tnam Belén, ex xi tma'n kye: —Kyxi'ye tuj Belén, cheb'a kyb'ime ti'j tal ne'; oktzun tknet kyu'ne, kytzaje q'malte weye tu'ntzun ikx weye tu'n nxi'ye k'ulul twitz, chi Herodes.

⁹ Tejtzun kyb'inte qe xjal aj nab'l tyol rey e je'xtzun. Ex lu ju che'w nejni kywitz, aju otoq kyil tuj tjawitz q'ij. Tejtzun tkanun che'w jatum ta' tal ne', axtzun kub' ten.

¹⁰ Tejtzun kylonte qe xjal aj nab'l ju che'w, nimxix e jaw tzalaj.

¹¹ E okxtzun tuja ex o kyil ju tal ne' tuk'ix Mariy aju ttxu'; e kub' ẍmeje' ex e k'ulun twitz ne'. Jatztzun kyi'n kyq'inumab'l, xi kyq'o'n oyaj te, ex atzun jlu: Q'an pwaq, tuk'ix storak, tuk'ix tq'olil tze' mirra tb'i.

¹² Ex tzaj q'ma'n kye xjal aj nab'l tu'n Dios tuj witzik' tu'n mi'n kyaj meltz'aj tuk'il Herodes; e ajtzun tuj kytanmi knet juntl kyb'e.

Tej kyel oq José, e pon tuj tx'otx' Egipto

¹³ Kyajlenxitzun qe xjal aj nab'l, kub' tyek'un tib' jun t-anjel Qman twitz José tuj witzik'. Chi anjel: —We'ktza ex q'inxa tal ne' tuk'ix ttxu', ex t-xi oqa tuj tx'otx' Egipto, axtzun tkyaj tena, maxitzun k'ajetza ok t-xi nma'ne teya; porke ktzajel Herodes jyolte ne' tu'n tkub' tb'yo'n.

¹⁴ Tej tel twatl José, xi ti'n tal ne' tuk'ix ttxu' te qonik'an ex xi' tuj Egipto.

¹⁵ Axtzun kyaj ten tuj Egipto; maxitzun ajtz tej tkyim Herodes, tu'ntzun tjapun ju yol q'ma'maj tu'n Qman tzaj tma'n tu'n t-sanjel: Tuj Egipto etz ntxko'ne Nk'wa'le, chi t-sanjel Dios.

Xi tq'o'n Herodes orden tu'n kykub' b'yo'n qe ne'

¹⁶ Tejtzun tel tnik' Herodes ti'j otoq kub' sb'u'n kyu'n xjal aj nab'l, tzaj nimxix tq'oj; ex etz jun orden tu'n, tu'n kyb'yet kykyaqil tal q'a na'nx tjapun kab'e ab'q'i kyu'n ate' tuj Belén ex kyuj aldey ti'jele Belén; el tnik' ti'j tq'ijlalil tu'nju yol tzaj q'ma'n te kyu'n aj nab'l.

¹⁷ Japuntzun aju yol tz'ib'an tu'n Jeremías aju t-sanjel Dios. Chi Jeremías:

¹⁸ O b'injtz tq'ajq'ajel kywi xjal tuj Ramá in che wuyin, in che oq' ex in che ayin; in oq' Raquel kyi'j qe tal, ex minti' o tajb'e tu'n tq'uqb'anjtz tk'u'j, tu'nju otoq che naj qe tal, chi Jeremías.

¹⁹ Ex tkyimlenxitzun Herodes, kub' tyek'un tib' jun t-anjel Qman twitz José tuj witzik' tuj tx'otx' Egipto ex tma anjel:

²⁰ —We'ktza, q'inxa tal ne' tuk'ix ttxu', ex txi'ya tuj kytx'otx' aj Israel, porke o che kyim qeju ok tilil kyu'n tu'n tkub' kyb'yo'n tal ne'.

²¹ Jawtzun we' José, xi ti'n tal ne' tuk'ix ttxu', ex ul tuj kytx'otx' aj Israel.

²² Ex tej tb'inte José ate Arquelao in kawin tuj tx'otx' Judea te t-xel Herodes aju qtzan tman, tzaj t-xob'il José tu'n t-xi' tuj Judea; ex tzaj tma'n Dios te tuj witzik' tu'n t-xi' tuj tx'otx' Galilea.

²³ Ultzun ex najan tuj tnam Nazaret, tu'ntzun tjapun aju yol q'ma'maj kyu'n t-sanjel Dios qa ate Jesús attoq tokel q'o'n tb'i aj Nazaret.