Mateo 17 - Mam de Huehuetenango nueva ortografía

O ch'expaj ke'yin Jesús

¹ Tb'ajlenxitzun qaq q'ij, xi ti'n Jesús Pedro, tuk'ix Jacobo, tuk'ix Juan aju titz'in Jacobo, e je'x ti'n kyjunalx twi' jun witz ma' twa'l.

² O ch'expaj ke'yin Jesús kywitz qe t-xnaq'tzb'en, o qoptz'aj twitz ik tza'n tqan q'ij, atzun t-xb'alun o saqix ik tza'n t-spik'umal q'ij.

³ Ex minab'en kub' tyek'un tib' Moisés tuk'ix Elías, in che yolin tuk'il Jesús.

⁴ Xitzun tma'n Pedro te Jesús: —Tat, b'a'n ax tu'n qten tzalu; qa taja e tjaw qb'incha'ne ox tal ja t-xaq tze'yin kywi': Jun teya, jun te Moisés ex jun te Elías, chi Pedro.

⁵ Matoq in yolin Pedro, kub' ten jun muj kyib'aj in qoptz'aj; ex at jun tq'ajq'ajel tzaj tuj muj, in tma'n: —Atzun Nk'wa'le jlu k'ujla'nxix wu'ne, in chin tzalaje ti'j. Kyb'inxe tyol.

⁶ Tej kyb'inte t-xnaq'tzb'en ju yol lu, e kub' mutze' twitz tx'otx', ex tzaj nim kyxob'il.

⁷ Tzajtzun laq'e' Jesús kytxlaj, e ok tmako'n ex xi tma'n: —Che we'ktze, mi'n che xob'e.

⁸ Tejtzun tjaw kyke'yin kywitz, minti' juntl xjal o kyil, o'kx te Jesús.

⁹ Tejtzun kyku'tz twi witz, xi tkyuwsa'n Jesús kye: —Mi'n txi kyma'ne te jun xjal aju ma kyile; maxitzun kxel kyma'ne okxi njatz anq'ine kyxol kyimni, aqine sk'o'maj qine tu'n Dios tu'n ntene kyuk'il xjal, chi Jesús.

¹⁰ Xitzun kyqanin qe t-xnaq'tzb'en: —¿Tiqu'ntzun in kyma'n qe xnaq'tzal ti'j ley qa ilxix ti'j tu'n tul nej Elías? Che chi.

¹¹ Xi ttzaq'we'n Jesús: —Ax tok nej tzul Elías, ex kb'ajel tb'incha'n juntl maj tkyaqil.

¹² Ex kxel nma'ne kyeye, o tzul aj Elías ex minti' ma tz'el kynik' xjal ti'j, o'kx o kyb'incha ti'j alkye ju kyajb'il. Ax ikx weye chin b'ajel yajla'ne kyu'n, aqine sk'o'maj qine tu'n Dios tu'n ntene kyuk'il xjal, chi Jesús kye.

¹³ Maxitzun el kynik' qe t-xnaq'tzb'en ti'j qa ti'j Juan o yolin Jesús, aju e b'yan xjal tu'n.

Jun tal q'a tok tyab' twi' b'anix tu'n Jesús

¹⁴ Tej kypon jatum tenl qe xjal, ul jun xjal tuk'il Jesús, kub' ẍmeje' twitz ex tma:

¹⁵ —Tat, q'aq'antz tk'u'ja ti'j nk'wa'le, porke in tzaj tuj twitz ex nim in k'ixb'isanjtz; ex nimku maj in xi tz'aq tuj q'aq', ex nimku maj in xi tz'aq tuj a'.

¹⁶ Ex ma tzul wi'ne kyuk'il qe t-xnaq'tzb'ena, ex minti' ma b'ant kyu'n tu'n tb'anix.

¹⁷ Xi ttzaq'we'n Jesús: —Aqeye xjal tuj tq'ijlalil ja'lo minti' kyokslab'le ex mib'an che b'ine. ¿Jte' q'ij tu'n ntene kyuk'ile? ¿Ex jte' q'ij tu'n kyik'xe wu'ne? Kyi'ntze k'wa'l tzalu.

¹⁸ Xitzun tmayo'n Jesús ju'ẍ, etztzun ju'ẍ tuj tanmi k'wa'l, b'i'xtzun kyaj b'anix k'wa'l.

¹⁹ E ultzun qe t-xnaq'tzb'en Jesús tuk'il, xi kyqanin te kyjunalx: —¿Tiqu'n minti' xqo xkye'ye ti'j tu'n tetz ju'ẍ qu'ne? Che chi.

²⁰ Xi tma'n Jesús kye: —Tu'nju minti' in qe' kyk'u'je ti'j Dios, porke ax tok kxel nma'ne kyeye, noqwit at kyokslab'le, maske noq ch'in ik tza'n jun tal twitz mostaza, jakulo txi kyma'ne teju witz lu: Tik'a tzalu, txi'ya ma chixin. K'ik'eltzun. Ex minti' jun mlaywit b'ant kyu'ne qa at kyokslab'le.

²¹ Pero aju jun txkaj ju'ẍ lu mlayx tz'etz, noq o'kx jaku tz'etz tu'n na'j Dios ex qa ma kub' qyo'n we'yaj.

In yolin Jesús juntl maj ti'j tkamik

²² Tejtzun kyten tuj tx'otx' Galilea, xi tma'n Jesús kye t-xnaq'tzb'en: —Aqine sk'o'maj qine tu'n Dios tu'n ntene kyuk'il xjal, chin xel q'o'ne tuj kyq'ab' xjal,

²³ ex chin b'el b'yo'ne kyu'n; ex tuj toxin q'ij chin jawil anq'ine, chi Jesús kye. Atzun kye t-xnaq'tzb'en tzaj nimxix kyb'is tej kyb'inte jlu.

Aju pwaq te chojb'il in xi q'ot tuj tja Dios

²⁴ Tejtzun kypon tuj tnam Capernaum, e ultzun qe peyil pwaq tuk'il Pedro, qeju in che peyin pwaq tu'n tajb'en tuj tja Dios, ex xi kyma'n te Pedro: —¿Yajtzun ju Xnaq'tzal kyeye, mi'npelo tzaj tq'o'n ju chojb'il tu'n tajb'en tuj tja Dios? Che chi.

²⁵ —Oklo, chi Pedro. Tejtzun tokx Pedro tuja, tzaj yolin naj Jesús te, ex tma: —¿Chi tok tu'na, Simón? Qe rey ate' twitz tx'otx', ¿al e in xi kyqanin ju chojb'il? ¿Kyepe kyxjalil, ex qa kye stranjer xjal? Chi Jesús te.

²⁶ Xitzun ttzaq'we'n Pedro: —Kye stranjer xjal nne'l kyqanin, chi Pedro. Xi tma'n Jesús: —Tu'n jlu minti' in che chojin qe kyxjalil.

²⁷ Pero tu'n mi'n ttzaj kyyol, txi'ya ttzi laguna, xon ku'xa tuj a' jun ganch te tzuyb'il kyiẍ, ex aju tnejel kyiẍ ktzyetel tu'na, tzyuma, oktzun tjaqet ttzi' tu'na, knetel jun saq pwaq tu'na; q'intza, ex q'onxa nchoje kye peyil pwaq, tuk'ix teya, chi Jesús te.