Mateo 15 - Mam de Huehuetenango nueva ortografía

Aju in tz'ilix xjal tu'n

¹ E pontzun junjun xnaq'tzal ti'j ley tuk'il Jesús, kyuk'ix junjun fariseo e tzaj tuj tnam Jerusalén, ex xi kyqanin te:

² —¿Tiqu'n in che ik' t-xnaq'tzb'ena tib'aj ju yol kyaj b'ant ti'j kyu'n kytijil xjal ojtxi? ¿Tiqu'n minti' nne'l kytx'jo'n kyq'ab' ok in che ok ten wa'l? Che chi.

³ Xitzun ttzaq'we'n Jesús: —Ax ikx kyeye, ¿tiqu'n in che ik'e tib'aj tmandamyent Dios noq tu'nju in che ok lpe'ye ti'j ju yol kyaj b'ant ti'j kyu'n kytijil xjal ojtxi?

⁴ Porke kyaj tq'o'n Dios jun mandamyent chi kyja': Kynimanxe kymane ex kytxuye; ax ikx in tma'n: Alkye ma yasun ti'j tman ex qa ti'j ttxu', il ti'j tu'n tkub' b'yet, chi tuj ley.

⁵ Atzun kyeye in kyma'ne: B'a'n qa at jun xjal ma txi tma'n te tman ex qa te ttxu': Mlay b'ant txi nq'o'ne ch'in onb'il teya, ex tkyaqilju at weye jun oyaj te Dios.

⁶ Qa ma txi tma'n xjal ikju, tu'n jlu mya il ti'j tu'n t-xi tq'o'n onb'il te tman ex qa te ttxu', che chiye. Kyja'tzun ma tz'el kyi'ne tipun tmandamyent Dios tu'n tlaj in che ok lpe'ye ti'j ju yol kyaj b'ant ti'j kyu'n kytijil xjal ojtxi.

⁷ Xmletz' qeye. Ax tok tyol Isaías aju t-sanjel Dios kyaj ttz'ib'an kyi'je, chi kyja':

⁸ Qe xjal lu noq tu'n kytzi' in chin nimanjtze kyu'n, atzun ju kyanmi najchaq ta' wi'je.

⁹ Noqx gan in che k'ulun nwitze, porke aju xnaq'tzb'il in kyq'o'n, kye xjal kymandamyent, chi Isaías.

¹⁰ E tzajtzun ttxko'n Jesús qe xjal ex xi tma'n kye: —Kyb'intze nyole, ex tz'elx kynik'e ti'j:

¹¹ Aju in xi' tu'n xjal, minti' in tz'ilix xjal tu'n, noq o'kx in tz'ilix xjal tu'nju tyol nne'tz tuj ttzi'.

¹² E pontzun laq'e' t-xnaq'tzb'en Jesús ttxlaj ex xi kyma'n te: —¿Mape tb'iya, aju tyola ma txi tma'na mya b'a'n ma tz'ela tuj kywi fariseo? Che chi.

¹³ Xi ttzaq'we'n Jesús: —Tkyaqil awal aju mya tu'n Nmane at tuj kya'j ku'x tawa'n, kjawitz b'aqet.

¹⁴ E kyten xjal lu; porke moẍ qe, ex ẍaqlul moẍ qe; qa ma tz'ok ten jun moẍ ẍaqlulte juntl moẍ, kykab'il che xel tz'aq tuj jul, chi Jesús.

¹⁵ Xi ttzaq'we'n Pedro: —Chik'b'antza ju techal lu qeye.

¹⁶ Xi tma'n Jesús: —¿Maj ikx kyeye minti' nne'l kynik'e ti'j?

¹⁷ ¿Maj minti' nne'l kynik'e ti'j jlu? Tkyaqilju in xi' tu'n xjal, in ku'pun tuj tk'u'j ex nne'x tk'u'jin.

¹⁸ Ex aju tyol xjal nne'tz tuj ttzi', tuj tanmi xjal in jatz; atzunju in tz'ilix xjal tu'n.

¹⁹ Porke tuj kyanmi xjal in tzaj kyximb'etz mya b'a'n, ex tu'n tkub' jun xjal kyu'n, ex tu'n kyb'inchante aj pajil, ex tu'n kyyaẍin, ex tu'n kyelq'an, ex tu'n kynik'an yol kyi'j kyuk'il, ex tu'n kysi'min yol.

²⁰ Tkyaqil jlu in tz'ilix xjal tu'n; ex ok tok jun xjal wa'l ex qa minti' ma tz'el ttx'jo'n tq'ab', mlay tz'ilix xjal tu'n.

Jun xu'j stranjer xjal xi toksla'n tyol Jesús

²¹ Tejtzun tetz Jesús tuj lugar lu, xi' tuj tx'otx' jatum ta' tnam Tiro tuk'ix tnam Sidón.

²² At jun xu'j aj Canaán ax najl tuj lugar lu, ul tuk'il Jesús in sch'in ex in tma'n: —Tat, aya Tk'wa'l David, q'aq'antz tk'u'ja wi'je. Aju wale txin nimxix in yajlanjtz tu'n ju'ẍ, chi xu'j.

²³ Atzunte Jesús minti' xi ttzaq'we'n. E pontzun laq'e' qe t-xnaq'tzb'en ttxlaj e kub'san twitz ex kyma': —Q'manxa te xu'j tu'n taj, porke lepchix qi'j in sch'in, che chi.

²⁴ Xi ttzaq'we'n Jesús: —Minti' ma chin tzaj sama'ne tu'n Dios kyuk'il txqantl xjal, noq o'kx kyuk'il aj Israel, aqeju ik kyten ik tza'n ẍne'l tzpetni qe, chi Jesús.

²⁵ Ultzun te xu'j, kub' ẍmeje' twitz Jesús ex tma: —Tat, chin tonintza, chi xu'j.

²⁶ Xi ttzaq'we'n Jesús: —Mya b'a'n tu'n tel q'it kywa k'wa'l ex tu'n t-xi q'ot kye tal tx'yan, chi Jesús.

²⁷ Xitzun tma'n xu'j: —Ax tok, Tat; pero qe tal tx'yan in xi kywa'n tb'uchil wab'j nne'l tz'aq ttxa'n kymes kyajaw.

²⁸ Xitzun ttzaq'we'n Jesús: —Aya xu'j, nimxix tokslab'la at. Kb'inchetel teya aju tajb'ila, chi Jesús. Ax or lu b'i'x b'anix ju tal.

Nim yab' e b'anix tu'n Jesús

²⁹ Ik'tzun Jesús tuj lugar lu, pon ttzi laguna te Galilea; jax twi witz ex axtzun kub' qe'.

³⁰ E pontzun nim xjal tuk'il, q'i'n qe kox kyu'n, qe moẍ, qe men, qe xjal tzkaj kyten, kyuk'ix nimku yab'; ex e kub' kyq'o'n t-xe tqan Jesús, ex e b'anix tu'n.

³¹ Tu'ntzun jlu nim e lab'in xjal tej kylonte b'ant kyyolin qe men, ex qe xjal tzkaj kyten e b'ant, ex qe kox b'ant kyb'et, ex qe moẍ b'ant kyke'yin. Ex xi kyq'o'n xjal chjonte te Dios, aju Kydios aj Israel.

Xi tq'o'n Jesús kywa kyaje mil xinaq

³² E tzajtzun ttxko'n Jesús qe t-xnaq'tzb'en ex xi tma'n kye: —In tz'e'y nk'u'je kyi'j xjal, porke ma b'ant ox q'ij ate' wuk'ile ex minti' ch'in kywa. Mi'n waje tu'n t-xi nma'ne kye tu'n kyaj ex na'nxtoq t-xi' ch'in kywa, mya yajku che kub' numj tuj b'e, chi Jesús kye.

³³ Xitzun kyma'n qe t-xnaq'tzb'en: —¿Jatum b'an ttzaj nim wab'j qu'ne tu'n kynoj kykyaqil xjal lu, porke ato' tuj jun lugar minti' kynajb'il xjal tuj? Che chi.

³⁴ Xi tqanin Jesús kye: —¿Jte' wab'j at kyuk'ile? —At wuq wab'j, tuk'ix junjun tal kyiẍ, che chi.

³⁵ Xi tma'n Jesús kye xjal tu'n kykub' qe' twitz tx'otx'.

³⁶ Tzajtzun ttzyu'n Jesús aju wuq wab'j kyuk'ix qe kyiẍ, xi tq'o'n chjonte te Dios, kub'tzun tpiẍk'u'n ex xi tq'o'n kye t-xnaq'tzb'en, atzun kye t-xnaq'tzb'en xi kysipan kye xjal.

³⁷ Ex e b'aj wa'n kykyaqil ex e noj. Ex jaw kychmo'n wuq chi'l ttx'aqan wab'j aju kyaj ten.

³⁸ Aju kyajlal xjal e wa'n, kyaje mil xinaq, ex part qe xu'j ex qe k'wa'l.

³⁹ Xitzun tma'n Jesús kye xjal tu'n kyaj, atzunte Jesús jax tuj barc, pon tuj tx'otx' Magdala.