Marcos 3 - Mam de Huehuetenango nueva ortografía

B'anix jun xjal tzqijtoq tq'ab'

¹ Okx juntl maj Jesús tuj ja te k'ulb'il ex otoq pon jun xjal tzqij jun tq'ab'.

² In che q'on xjal kwent ti'j Jesús qa tu'n tb'ant ju xjal tu'n tuj q'ij te ojlab'l, tu'ntzun tkub' tz'aq Jesús tuj jun til kyu'n.

³ Xitzun tma'n Jesús teju xjal tzqij tq'ab': —We'ktza ex we'kuya kyxol xjal.

⁴ Xitzun tqanin Jesús kye txqantl xjal: —¿Q'o'npelo tu'n ley tu'n qb'inchante jun b'a'n tuj q'ij te ojlab'l ex qa tu'n qb'inchante jun mya b'a'n? ¿Q'o'npelo tu'n tklet jun xjal ex qa tu'n tnaj? Chi Jesús kye. Atzun kye minti' e q'ajt.

⁵ Xi tke'yin Jesús kywitz kykyaqil ti'jele, tzaj tq'oj, ex tzaj nim tb'is tu'n tlaj kyuw kyanmi. Xi tma'n Jesús te xjal tzqij tq'ab': —Nuqpi'mil tq'ab'a. Atzunte xjal el tnuqpi'n tq'ab', ex kyaj b'anix tq'ab'.

⁶ Tejtzun kyetz qe fariseo, e yolin ti'j kyuk'il qe tpartid Herodes, b'ant ti'j kyu'n tza'n tten tu'n tkub' Jesús kyu'n.

Nim xjal e pon ttzi laguna

⁷ Atzunte Jesús el tpa'n tib', xi' ttzi laguna kyuk'ix qe t-xnaq'tzb'en, ex nim xjal e ok lpe' ti'j e tzaj tuj tx'otx' Galilea.

⁸ Ax ikx e tzaj tuj tx'otx' Judea, ex tuj tnam Jerusalén, ex tuj tx'otx' Idumea, ex e tzaj jlajxi nima Jordán, ex e tzaj kyuj qe lugar ti'jele tnam Tiro ex tnam Sidón, porke o kyb'i nimku tb'inchb'en Jesús in b'ant tu'n, kyja'tzun e pon nim xjal tuk'il.

⁹ Xitzun tma'n Jesús kye t-xnaq'tzb'en tu'n tb'ant tten jun barc tu'n tlaj nimku xjal, tu'ntzun mi'n tok b'etz'an Jesús kyu'n xjal.

¹⁰ Ex nimku xjal otoq che b'anix tu'n, kyja'tzun e pon tilj xjal ti'j Jesús, aqeju at kyyab'il, tu'n tok kymako'n ti'j Jesús.

¹¹ Atzun qe ju'ẍ, tej tilwaj Jesús kyu'n e kub' ẍmeje' twitz, in che sch'in wen: —Aya Tk'wa'l Dios, che chi.

¹² Ex kyuw xi tma'n Jesús kye ju'ẍ tu'n mi'n t-xi kyma'n alkyete Jesús.

E jaw t-sk'o'n Jesús kab'laj t-xnaq'tzb'en

¹³ Tb'ajlenxi jlu jax Jesús twi witz, ex e tzaj ttxko'n alkye qeju at tgan kyi'j; e pontzun tuk'il.

¹⁴ Ex jaw t-sk'o'n Jesús kab'laj t-xnaq'tzb'en tu'n kyten tuk'il, ex tu'n kyxi t-sama'n pakb'al;

¹⁵ ex xi tq'o'n kyoklen tu'n kyb'anix qe yab' kyu'n, ex tu'n kyetz qe ju'ẍ tuj kyanmi xjal kyu'n.

¹⁶ Aqeju e jaw t-sk'o'n atzun qe jlu: Simón, aju Pedro tkab'in tb'i ok tq'o'n Jesús;

¹⁷ tuk'ix Jacobo aju tky'ajal Zebedeo, tuk'ix Juan aju titz'in Jacobo, aqe jlu Boanerges tkab'in kyb'i ok tq'o'n Jesús, atzun in tma'n, ik kymod ik tza'n q'ankyoq;

¹⁸ tuk'ix Andrés, tuk'ix Felipe, tuk'ix Bartolomé, tuk'ix Mateo, tuk'ix Tomás, tuk'ix Jacobo aju tky'ajal Alfeo, tuk'ix Tadeo, tuk'ix Simón aju toktoq te tajlal kyxol jun partid xjal cananista kyb'i,

¹⁹ ex tuk'ix Judas Iscariote, aju xi q'onte Jesús tuj kyq'ab' xjal.

In tzaj tq'o'n ju'ẍ tipumal Jesús, che chi fariseo

²⁰ Ultzun Jesús tuj ja jatum in posadiyin kyuk'ix qe t-xnaq'tzb'en. Ok kychmon kyib' juntl maj qe xjal, kyja'tzun minti' tumel tu'n twa'n Jesús kyuk'ix t-xnaq'tzb'en.

²¹ Tejtzun kyb'inte qe terman Jesús, e ul q'il te porke in kyma'n qa otoq tz'ok te tzkaj.

²² Ax ikx kye xnaq'tzal ti'j ley otoq che tzaj tuj Jerusalén in kyma'n: —Ate xjal lu at Belsebú tuj tanmi, ex tu'n Belsebú aju nejenel kye ju'ẍ in tzaj q'o'n tipumal xjal lu tu'n kyetz qe ju'ẍ tuj kyanmi xjal tu'n, che chi.

²³ E tzajtzun ttxko'n Jesús, ex xi tma'n jun techal kye. Chi kyja': —¿Tza'n tten tu'n tetz tlajon tib' Satanás tu'nx tib'?

²⁴ Qa at jun kawb'il at pab'l tib' tuj ex in che q'ojin xjal kyxolx, aju kawb'il lu mya kukx ktel.

²⁵ Ax ikx jun ja xjal qa in che q'ojin kyxolx, aju ja xjal lu mlay che ten junx.

²⁶ Ax ikx te Satanás qa ma tz'ok ten q'ojlel ti'jx, ex qa tpa'n tib' tkawb'il, mlay b'ant kukx tu'n tten, knajeltzun tipumal.

²⁷ Mlay tz'okx jun xjal tuj tja juntl xjal at tipun ex mlay tz'etz telq'a'n aju at tuj tja, o'kx qa ma kub' tk'alo'n ju xjal nej, tu'njlu jakulo tz'etz telq'a'n tkyaqilju at tuj tja.

²⁸ Ax tok kxel nma'ne kyeye, jaku najset tkyaqil kyil xjal tuk'ix tkyaqilju mya b'a'n in kyma'n,

²⁹ ex alkye jun xjal ma yolin mya b'a'n ti'j Xewb'aj Xjan, mlay kub' najset til te jumajx, kb'el t-sentens te jumajx tu'n tlaj til, chi Jesús kye xnaq'tzal ti'j ley.

³⁰ Xi tma'n Jesús jlu kye porke in kyma'ntoq qa at ju'ẍ tuj tanmi.

Pon ttxu' Jesús tuk'il, kyuk'ix qe titz'in

³¹ Tb'ajlenxi jlu pon ttxu' Jesús kyuk'ix qe titz'in, ax e kyaj ten ttxa'n pe'n, ex okx txokb'aj Jesús kyu'n.

³² Atzun qe xjal q'uql qe'toq ti'jele Jesús xi kyma'n te: —Lu ttxu'ya ex qe titz'ina ate' ttxa'n pe'n, in che jyon ti'ja.

³³ Xitzun tma'n Jesús kye: —¿Alkyetzun ntxu'ye, ex alkyetzun qe witz'ine?

³⁴ Xitzun tke'yin kywitz qeju q'uql qe'toq ti'jele. —Atzun ntxu'ye qe jlu ex atzun qe witz'ine.

³⁵ Ex alkyeju in tb'incha'n tajb'il Dios, atzun witz'ine, ex atzun wanb'e, ex atzun ntxu'ye, chi Jesús kye.