Levítico 9 - Mam de Huehuetenango nueva ortografía

Tej ttzyet taq'nan Aarón te pal

¹ Tuj twajxaqin q'ij txkettzun Aarón tu'n Moisés kyuk'ix qe tky'ajal ex qe kytijil xjal kyxol aj Israel,

² ex xi tma'n te Aarón kyja': Q'intza jun tal tor te chojb'il il, tuk'ix jun tman ẍne'l tu'n t-xi q'ot te jun oyaj patun in kub', kykab'il alumaj lu minti' kypaltil, ex q'onxa qe te Qman.

³ Ax ikx q'manxa kye aj Israel tu'n ttzaj kyi'n jun tman chip te chojb'il il, tuk'ix jun tal tor ex jun tal tman ẍne'l ma te jun ab'q'i qe ex minti' kypaltil, tu'ntzun kyxi q'ot te jun oyaj patun in kub',

⁴ tuk'ix jun tor ex jun tman ẍne'l tu'ntzun kykub' b'yet twitz Qman te jun chojb'il te mojb'ab'l tib'il. Ax ikx il ti'j tu'n ttzaj kyi'n jun oyaj ti'j twitz awal, ch'in arin xyoq'amaj tuk'il aseyt, porke kb'el tyek'un tib' Qman kywitze ja'lo, chi Moisés, xi tma'n kye.

⁵ Xitzun kyi'n aj Israel aju otoq txi tma'n Moisés kye; pon kyi'n max ttzi ja xb'alun te mojb'ab'l tib'il, ex kykyaqiltzun tnam xjal e pon laq'e' ex e kub' we' twitz Qman.

⁶ Atzunte Moisés xi tma'n kye kyja': Atzun jlu ma tzaj tma'n Qman, kyb'inchame ex kb'el tyek'un tib' t-spik'umal Qman kywitze.

⁷ Xi tma'n Moisés te Aarón: Laq'etza ti'j altar ex q'onxa chojb'il tila, tuk'ix ju alumaj kxel tq'o'na te chojb'il patun in kub' te najsb'il tila ex te najsb'il kyil aj Israel. Ax ikx q'onxa kyoyaj aj Israel te najsb'il kyil, ik tza'n o tma Qman.

⁸ Pontzun laq'e' Aarón ti'j altar ex okx tqesin tjaq' tqul tal tor tu'n t-xi tq'o'n te chojb'il til.

⁹ Atzun qe tky'ajal e pon laq'b'ante chik', ex ku'xtzun tq'o'n Aarón twi tal tq'ab' tuj chik' ex ok t-su'n kyi'j qe tkach altar, atzunju chik' kyaj ten ku'x tqo'n t-xe tqan altar.

¹⁰ Kub'tzun tpatun Aarón tib'aj altar aju t-sebyil alumaj chojb'il il, kyuk'ix qe tchenaq' tuk'ix ju sebo toksa'n ti'j ttx'otx', ik tza'nx otoq tma Qman te Moisés.

¹¹ Atzunju tchib'jal tuk'ix ttz'umal kub' tpatun ti'jxi campament.

¹² Ax ikx okx tqesin Aarón tjaq' tqul alumaj te oyaj patun in kub', ex atzun qe tky'ajal e pon laq'b'ante chik' ex ok ttx'ito'n Aarón ti'jele tk'u'j altar.

¹³ Xitzun kyi'n qe tky'ajal Aarón twi' alumaj patun in kub', tuk'ix ju tchib'jal otoq b'aj kypaẍu'n, ex kub' tpatun Aarón jlu tib'aj altar,

¹⁴ e b'aj ttx'jo'n qe tuj tk'u'j, kyuk'ix qe tqan, ex e kub' tq'o'n tib'aj tchib'jal alumaj tib'aj altar ex kub' tpatun tkyaqil.

¹⁵ Ax ikx xi tq'o'n Aarón kyoyaj aj Israel. Tzaj ti'n tman chip, aju tu'n t-xi q'ot te chojb'il kyil tnam xjal, okx tqesin tjaq' tqul ex xi tq'o'n te chojb'il il, ik tza'nx otoq tb'incha ti'j tal tor xi tq'o'n nej.

¹⁶ Ax ikx xi tq'o'n alumaj patun in kub', ik tza'nx q'ma'maj.

¹⁷ Ax ikx xi tq'o'n aju oyaj ti'j twitz awal; tzaj ti'n jun yub' arin ex kub' tpatun tib'aj altar; part ju oyaj in kub' patit te prim.

¹⁸ Ax ikx okx tqesin Aarón tjaq' tqul tor ex tman ẍne'l, aju xi kyq'o'n aj Israel te jun chojb'il te mojb'ab'l tib'il. Atzun qe tky'ajal e pon laq'b'ante chik', atzun te ok ttx'ito'n chik' ti'jele tk'u'j altar.

¹⁹ Ax ikx xi kyi'n t-sebyil tor, tuk'ix t-sebyil tman ẍne'l, tuk'ix tje', tuk'ix sebo toksa'n kyi'j qe tuj tk'u'j, kyuk'ix qe tchenaq' ex tuk'ix sebo toksa'n ti'j ttx'otx',

²⁰ ex kub'tzun kyq'o'n t-sebyil alumaj tib'aj ttzi t-xu'k. Atzunte Aarón kub' tpatun sebo tib'aj altar,

²¹ atzun qeju ttzi t-xu'k ex qe tkux alumaj tuj tb'anq'ab', noq xi tyukun Aarón twitz Qman, ik tza'nx otoq tma Qman te Moisés.

²² Xitzun tnuqpi'n tq'ab' Aarón kyib'aj aj Israel ex e kub' tky'iwla'n, ex t-xilenxi tq'o'n chojb'il ti'j il, tuk'ix oyaj patun in kub' ex chojb'il te mojb'ab'l tib'il, eltzun laq'e' ti'j altar.

²³ Okxtzun Moisés tuk'ix Aarón tuj ja xb'alun te mojb'ab'l tib'il, ex tej kyetz e ok ten ky'iwlalte kye aj Israel. Kub'tzun tyek'un tib' t-spik'umal Qman kywitz kykyaqil aj Israel;

²⁴ etztzun jukpaj jun q'aq' twitz Qman ex b'aj tz'e'y alumaj tu'n, aju attoq tkub'il patit kyuk'ix qe sebo kykub'sa'n tib'aj altar. Tejtzun kylonte aj Israel jlu, e jaw sch'in kykyaqil tu'n tzalajb'il, e kub' ẍmeje' ex pon takl tib'aj kywitz max twitz tx'otx'.