Levítico 21 - Mam de Huehuetenango nueva ortografía

Aju tu'n tb'ant kyu'n pal

¹ Tzaj tma'n Qman te Moisés kyja': Q'manxa kye pal aqeju tky'ajal Aarón tu'n mi'n tok kymako'n t-ximlal jun kyimni kyxol qe kyxjalil, tu'ntzun mi'n kytz'ilix.

² O'kx at kyoklen tu'n tok kymako'n t-ximlal kytxu' ex qa kyman ex qa kyky'ajal ex qa kyme'jel ex qa jun kyerman xinaq,

³ ex qa jun kyanb' na'nx tmoje' ex ax ta' tuj kykwent, maske che tz'ilixtel qe tu'n tlaj otoq tz'ok kymako'n kyximlal qe jlu.

⁴ Ex mi'n tz'ok kymako'n t-ximlal juntl xjal aju noq otoq moje' tuk'il jun kyerman, tu'ntzun mi'n kytz'ilix.

⁵ Mi'n tz'el kyk'oẍin ti'j kywi', mi'n tz'el kymatzo'n twi kyxmatz ex mi'n b'aj kyqesin kyximlal,

⁶ noq o'kx tu'n tb'aj kyxjansan kyib' nwitze tu'ntzun mi'n tok kyq'o'n nb'iye te minti' tajb'en, ex atzun qe che tzajel q'onte qe oyaj patun in che kub' nwitze, ex ax qe che tzajel q'onte qe pan te weye, aqine Kydios; kyja'tzun kukx tu'n kyten xjan qe.

⁷ Ax ikx mya b'a'n tu'n kymoje' tuk'il jun xu'j jawni twitz kyuk'il xinaq, mi tuk'il jun xu'j otoq kub' tpa'n tib' tuk'il tchmil, porke xjansamaj qe pal tu'n kyajb'en weye.

⁸ Che kypa'n ela qe, ex atzun qe che tzajel q'onte tkyaqil txkaj oyaj weye, ex xjan che okel qe te kyeye, porke aqine Kymane xjan qine, ex wu'ne che okel te xjan.

⁹ Ex qa at jun kyme'jel pal jawni twitz kyuk'il xinaq, tu'n jlu kb'el tq'o'n tch'ixwi tman; il ti'j kb'el patit.

¹⁰ Aju tnejel pal ma tk'am toklen tu'nju aseyt te xjansab'l kub' qo'n tuj twi' ex ma tk'am toklen tu'n tok tq'o'n xb'alun xjansamaj, kyja'tzun mlay tz'el tchitpu'n ttzmal twi' ex mlay tz'el t-sb'it'un t-xb'alun ti'j tu'n tlaj tb'is;

¹¹ ex mlay tz'okx ke'yilte jun kyimni maske qa a tman ex qa ttxu', tu'ntzun mi'n ttz'ilix.

¹² Mi'n tz'etz tuj njaye ex mi'n b'aj ttz'ilsa'n, porke o kub' qo'n aseyt te xjansab'l tib'aj twi', tu'n tajb'en te weye. Aqine Kymane.

¹³ Il ti'j tu'n tmoje' tuk'il jun xu'j na'nx tlonte xinaq.

¹⁴ Mi'n jaw ti'n jun meb'a xu'j te t-xu'jil, mi jun xu'j otoq kub' tpa'n tib' tuk'il tchmil, mi jun xu'j otoq til xinaq, ex mi jun xu'j jawni twitz kyuk'il xinaq. Aju xu'j na'nx ttil xinaq, atzunju b'a'n tu'n tok te t-xu'jil, ex ax kyxol qe tiyjil,

¹⁵ tu'ntzun mi'n ttzaj jun tal xu'j mya te pal tky'ajal; porke aqine Kymane ma chin b'aj xjansante te.

Qe tiyjil Aarón mlay ajb'en tuj tja Dios

¹⁶ Tzaj yolin Qman tuk'il Moisés ex tma:

¹⁷ Q'manxa te Aarón kyja': Qa at jun tiyjil at ttzakaj, mi'n txi q'ot amb'il te tu'n ttzaj tq'o'n tkyaqil txkaj oyaj weye.

¹⁸ Ex mijun xinaq at ttzakaj jaku tzaj q'onte oyaj weye: Qa moẍ, qa kox, qa tzkaj ta' ttxa'n ex qa t-ẍkyin,

¹⁹ qa toqnaj jun tqan ex qa tq'ab',

²⁰ qa yuk' ti'j, qa ch'in twa'l, qa muj kyi'j tb'aq' twitz, qa at tx'a'k ti'j, qa at sal ti'j ex qa tzkaj qe tb'aq'.

²¹ Mi jun tiyjil pal Aarón tzkaj ta' jaku tzaj q'onte oyaj patun in kub' te weye. Tu'nju at ttzakaj, mlay tzaj tq'o'n tkyaqil txkaj oyaj weye.

²² B'a'n tu'n twa'n ti'j oyaj lu ex kyi'j qe ti'xti xjan ex qeju mas xjanxix,

²³ ex mlay tz'okx ti'jxi xb'alun tkub' tuj ttzi Njaye ex mlay pon laq'e' ti'j altar tu'nju at ttzakaj, tu'ntzun mi'n tb'aj ttz'ilsa'n Njaye. Aqine Kymane o chin xjansante kye, chi Dios.

²⁴ Atzunte Moisés xi tma'n tkyaqil yol lu te Aarón ex kye qe tky'ajal ex kye kykyaqil aj Israel.