Levítico 15 - Mam de Huehuetenango nueva ortografía

Qe ley ti'j junjun kytz'ilil xinaq

¹ Tzaj yolin Qman tuk'il Moisés ex tuk'il Aarón, ex tma:

² Kymanxe jlu kye aj Israel: Qa at jun xinaq in jatz poj tuj twi ttz'a'lb'il, tz'il te xjal lu,

³ ex mya o'kx ok matoq in jaw jlu tuj twi ttz'a'lb'il, ax ikx qa ma maqet, ex kyu'n qe jlu in ten xjal tuj ttz'ilil.

⁴ Noq alkye jun watb'il jatum ma kub' tan xjal ex noq alkye jun q'uqb'il jatum in kub' qe', b'i'x che tz'ilixtel.

⁵ Alkye jun ma tz'ok makonte twatb'il xjal lu b'i'x ktz'ilixtel, il ti'j kjawitz ttx'jo'n ti'j t-xb'alun ex tu'n tchin, ex max k'okel te saq juntl maj okxi ttzaj qlolj.

⁶ Alkye jun ma kub' qe' tib'aj jun ti'xti jatum otoq kub' qe' xjal lu b'i'x ktz'ilixtel; il ti'j tu'n tjatz ttx'jo'n ti'j t-xb'alun ex tu'n tchin, ex max k'okel te saq juntl maj okxi ttzaj qlolj.

⁷ Ex alkye jun ma tz'ok makonte t-ximlal xjal lu b'i'x ktz'ilixtel; il ti'j tu'n tjatz ttx'jo'n ti'j t-xb'alun ex tu'n tchin, ex max k'okel te saq juntl maj okxi ttzaj qlolj.

⁸ Qa ma tz'ok ttzub'an xjal yab' ta'l ttzi' ti'j jun xjal saq ta', ate xjal saq b'i'x ktz'ilixtel, ex il ti'j kjawitz ttx'jo'n ti'j t-xb'alun ex tu'n tchin, ex max k'okel te saq juntl maj okxi ttzaj qlolj.

⁹ K'okel kyq'o'ne te tz'il tkyaqil t-siy chej jatum ma jax qe' xjal yab' tu'n poj in jaw twi ttz'a'lb'il.

¹⁰ Alkye jun ma tz'ok makonte jun ti'xti jatum otoq kub' qe' xjal lu b'i'x ktz'ilixtel; max k'okel te saq juntl maj okxi ttzaj qlolj. Ex alkye jun ma txi q'inte jun kye qe ti'xti lu b'i'x ktz'ilixtel; il ti'j tu'n tjatz ttx'jo'n ti'j t-xb'alun ex tu'n tchin, ex max k'okel te saq juntl maj okxi ttzaj qlolj.

¹¹ Noq alkye jun xjal ma tz'ok mako'n tu'nju xjal yab' tu'n poj in jaw twi ttz'a'lb'il ex qa minti' otoq b'aj ttx'jo'n yab' qe tq'ab', aju xjal k'okel mako'n tu'n b'i'x ktz'ilixtel; il ti'j tu'n tjatz ttx'jo'n ti'j t-xb'alun ex tu'n tchin, ex max k'okel te saq juntl maj okxi ttzaj qlolj.

¹² Qa ma tz'ok mako'n jun k'il tx'otx' ttx'otx'il tu'nju xjal yab' tu'n poj in jaw twi ttz'a'lb'il, b'i'x kb'el pa't k'il lu, ex qatzun tze' qe makb'il che k'okel tmako'n, iltzun ti'j tu'n kyb'aj tx'jet.

¹³ Qatzun ma b'anix xinaq lu tu'n yab'il, b'a'n tu'n t-xi tajla'n wuq q'ij tu'ntzun t-saqset; tb'ajlenxi wuq q'ij, kjawitz ttx'jo'n ti'j t-xb'alun ex kchil tuj jun a' in b'et, ex ksaqseteltzun.

¹⁴ Tujtzun twajxaqin q'ij ktzajel ti'n kab'e ẍpo'q ex qa kab'e paloma, ex kpol twitz Qman ttzi ja xb'alun te mojb'ab'l tib'il ex kxel tq'o'n qe chyu'j te pal.

¹⁵ Atzunte pal kxel tq'o'n jun chyu'j te chojb'il il, atzun juntl te oyaj patun in kub', ex ksaqseteltzun xinaq ti'j tyab'il tu'n pal twitz Qman.

¹⁶ Qa at jun xinaq ma jaw twi ttz'a'lb'il noq tajx, b'i'x ktz'ilixtel; il ti'j tu'n tchin, ex max k'okel te saq juntl maj ok ttzaj qlolj.

¹⁷ Qa ma kub' qojl ch'in aju kjawil tuj twi ttz'a'lb'il xjal tib'aj jun xb'alun ex qa jun tz'u'm, b'i'x che tz'ilixtel; il ti'j tu'n kyb'aj tx'jet ex max che okel te saq juntl maj okxi ttzaj qlolj.

¹⁸ Qa ma kub' tan jun xinaq tuk'il jun xu'j, b'i'x che tz'ilixtel; kykab'il il ti'j tu'n kychin, ex max che okel te saq juntl maj okxi ttzaj qlolj.

Qe ley kyi'j kytz'ilil xu'j

¹⁹ Ok tul ẍwo'j ti'j jun xu'j, b'i'x ktz'ilixtel wuq q'ij. Alkye jun ma tz'ok makonte te kyuj qe wuq q'ij lu, b'i'x ktz'ilixtel ex max k'okel te saq juntl maj okxi ttzaj qlolj.

²⁰ Kykyaqil ti'xti jatum kb'el tan xu'j kyuj qe wuq q'ij lu, b'i'x che tz'ilixtel. Ax ikx qe ti'xti jatum kb'el qe', b'i'x che tz'ilixtel.

²¹ Alkye jun ma tz'ok makonte qe ti'xti jatum otoq kub' tan xu'j, b'i'x ktz'ilixtel; il ti'j tu'n tjatz ttx'jo'n ti'j t-xb'alun ex tu'n tchin, ex max k'okel te saq juntl maj okxi ttzaj qlolj.

²² Alkye jun ma tz'ok makonte jun ti'xti jatum otoq kub' qe' xu'j, b'i'x ktz'ilixtel; il ti'j tu'n tjatz ttx'jo'n ti'j t-xb'alun ex tu'n tchin, ex max k'okel te saq juntl maj okxi ttzaj qlolj.

²³ Alkye jun ma tz'ok mako'nte jun ti'xti tkub' tib'aj watb'il jatum otoq kub' tan xu'j, ex qa jun ti'xti tkub' tib'aj q'uqb'il jatum otoq kub' qe', b'i'x ktz'ilixtel, ex max k'okel te saq juntl maj okxi ttzaj qlolj.

²⁴ Qa at jun xinaq ma kub' tan tuk'il xu'j lu akux at ẍwo'j ti'j, b'i'x ktz'ilixtel, ex wuq q'ij ktel tuj ttz'ilil; ax ikx che tz'ilixtel watb'il jatum kb'el tan xinaq tuj wuq q'ij lu.

²⁵ Qatzun at jun xu'j ma ten nim q'ij ẍwo'j ti'j, mas ik tza'n junjun maj, kukx ktel tuj ttz'ilil akux kukx tul ẍwo'j ti'j, ik tza'nx ok nnu'l ẍwo'j ti'j junjun maj.

²⁶ Noq alkye jun watb'il jatum kb'el tan xu'j, ex noq alkyex jun ti'xti jatum kb'el qe' tuj q'ij ok nnu'l ẍwo'j ti'j, che okel qe jlu te tz'il, ik tza'nx ok nnu'l ẍwo'j ti'j tkyaqil maj.

²⁷ Alkye jun ma tz'ok makonte kye qe ti'xti lu, b'i'x ktz'ilixtel; il ti'j tu'n tjatz ttx'jo'n ti'j t-xb'alun ex tu'n tchin, ex max k'okel te saq juntl maj okxi ttzaj qlolj.

²⁸ Oktzun twe' ẍwo'j ti'j, b'a'n tu'n t-xi tajla'n wuq q'ij, ex tb'ajlenxi wuq q'ij ksaqsetel.

²⁹ Tujtzun twajxaqin q'ij ktzajel ti'n kab'e ẍpo'q ex qa kab'e tal paloma, ex che xel tq'o'n te pal ma ttzi ja xb'alun te mojb'ab'l tib'il.

³⁰ Atzunte pal kxel tq'o'n jun chyu'j te chojb'il il, atzun juntl te oyaj patun in kub'. Kyja'tzun ksaqsetel xu'j ti'j ẍwo'j tu'n pal twitz Qman,

³¹ ex kyja'tzun tten che elel kyi'ne kytz'ilil aj Israel, tu'ntzun mi'n kykyim tu'n tlaj kytz'ilil ok tb'aj kytz'ilsa'n aju lugar jatum najl qine kyxol, chi Dios.

³² Atzun qe ley lu kyi'j qe xinaq yab' qe tu'n poj in jaw twi kytz'a'lb'il, ex kyi'j qeju tajx in jaw tuj twi kytz'a'lb'il, porke tu'n jlu in che ok te tz'il,

³³ ex ti'j ẍwo'j nnu'l kyi'j xu'j tujxix tq'ijlalil, ex kyi'j qeju in che ten mas nim q'ij tu'n ẍwo'j, ex kyi'j qe xinaq in jaw poj twi kytz'a'lb'il, ex kyi'j qe xinaq in che kub' tan kyuk'il xu'j ok tul ẍwo'j kyi'j.