Jonás 2 - Mam de Huehuetenango nueva ortografía

Aju tna'j Dios Jonás

¹ Max tuj tk'u'j kyiẍ oktzun ten Jonás kub'sal twitz Qman aju Tdios,

² chi kyja': Tuj yajb'il weye in kub'sane twitza Nman ex in tzaj ttzaq'we'na. Max t-xe'pun kynajb'il kyimni in kub'sane twitza ex in tzaj tb'i'na.

³ In ku'x t-xo'na max t-xe'pun mar ex in kyaj mulq'aje tjaq' txqan a'. O chin kyaje tjaq' nintz a' in pulin wen aju tzaj t-sama'na, ex o tz'ex wib'aje.

⁴ O nna'ye qa otoq chin el tik'una; ex kub' nximane qa minti'tl tu'n twile aju tjaya xjan.

⁵ In kyaj mulq'aje tjaq' a' ex inx mulq'aje max t-xe'pun mar; qe k'ul in che ch'iy tuj a' b'aj kysakun kyib' ti'j nwi'ye.

⁶ In ku'pune max jatum tzajni jlet qe witz tuj mar; in kyaj lamo'ne tjaq' tx'otx' te jumajx. Pero, Nman Dios, tu'na ma chin kolpaje te kamik.

⁷ Tej nna'ye ch'ixtoq nkyime, ula ti'j nk'u'je Nman, ex aju nna'j Diose pon max tuk'ila tuj tjaya xjan.

⁸ Aqeju in che k'ulun kywitz qe tilb'ilal minti' kyajb'en, in kyaj kykolin kyokslab'l ti'ja.

⁹ Atzun weye kxel nb'itzane jun b'itz te aq'b'il chjonte teya, ex kxel nq'o'ne jun chojb'il teya, ex kjapunel wu'ne aju yol o txi ntziyane teya. O'kx teya Nman jaku qo klete tu'na, chi Jonás.

¹⁰ Xi'tzun tma'n Qman te kyiẍ tu'n tjatz xa'win Jonás tu'n max ttzi mar.