Hebreo 1 - Mam de Huehuetenango nueva ortografía

Ma tzaj tma'n Dios tyol qe noq tu'n Tk'wa'l

¹ Nimku maj o yolin Dios ojtxi kye qxe'chel ex tuj nimku tumel tzaj tq'o'n tyol kye t-sanjel tu'n ttzaj kyma'n.

² Te mankb'ilxitzun tuj tq'ijlalil ja'lo ma tzaj tma'n Dios tyol te Tk'wa'l tu'n ttzaj tma'n qe, ex ma tz'ok tq'o'n Dios Tk'wa'l tu'n tok te etzal te tkyaqil. Ax ikx tkyaqilju at, tb'incha Tk'wa'l Dios, ax Dios q'mante tu'n tb'ant.

³ In tqoptz'a'n K'wa'lb'aj t-spik'umal Dios, ax tilb'ilal K'wa'lb'aj ik tza'n tilb'ilal Dios, ex tzyu'n tkyaqil tu'n K'wa'lb'aj tu'n tyol at tipumal. Tej tel tx'jet qil tu'n, kub'tzun qe' tuj b'anq'ab'aj ttxlaj Dios tuj kya'j, aju Dios ma'xix toklen.

Mas at toklen Tk'wa'l Dios kywitz qe anjel

⁴ Kyja'tzun ma tz'ok Tk'wa'l Dios mas at toklen kywitz qe anjel, porke ma tz'ok jun tb'i mas at toklen twitz kyb'i anjel.

⁵ Porke mya te jun anjel xi tma'n Dios ju yol lu: Aya Nky'ajal, ma chin oke te tmana ja'lo. Ex mya ti'j jun anjel o tma ju yol lu: Aqine chin okel te tman, atzun te k'okel te nk'wa'le, chi Dios.

⁶ Pero tej ttzaj tq'o'n Dios nej Tk'wa'l kyxol xjal, o tma: Kykyaqil qe t-anjel Dios che k'ulun twitz, chi Dios.

⁷ Ex atzunju yol lu in tma'n Dios kyi'j anjel: In che ok tq'o'n qe t-anjel ik tza'n kyq'iq', ex qe ajb'el te in che ok tq'o'n ik tza'n tqan q'aq', chi tuj Tu'jil.

⁸ Atzun ti'j K'wa'lb'aj in tma'n kyja': Aya Dios, aju tkawb'ila kukx kyjel ten te jumajx tuj tkyaqil tab'q'iyil; ex tuj tumelxix in kawina.

⁹ Ma tzalaja ti'j ju tz'aqlxix ex ma tz'el tik'una aju mya b'a'n. Kyja'tzun ma jaw sk'o'na tu'n Dios, aju Tdiosa, ex mas ma tzalaja tu'n kywitz qe txqantl tuk'ila.

¹⁰ Ax ikx in tma'n: Aya Qman, t-xe tnejel kub' tq'uqb'a'na tx'otx', ex tu'nxa o b'ant kya'j.

¹¹ Ok che najel jlu, atzun teya kukx ktela te jumajx. Kykyaqil jlu ok che b'ajel ik tza'n jun xb'alun;

¹² ex kb'el tb'alq'i'na ik tza'n jun xb'alun, ex che ch'expetel ik tza'n jun xjal in b'aj tch'expu'n t-xb'alun. Atzun teya, kukx ttena te jumajx, ex minti' b'ajsb'il te tab'q'iyila, chi tuj Tu'jil.

¹³ Ex mi jun maj tma Dios te jun anjel kyja': Qekuya ntxlaje tuj nb'anq'ab'e akutzun in kub' kyi'j aj q'oj ti'ja wu'ne, chi Dios.

¹⁴ Kykyaqil anjel xewb'aj qe ex in che ajb'en te Dios, in che tzaj sama'n tu'n kyonin kye qeju in che klet.