Éxodo 4 - Mam de Huehuetenango nueva ortografía

¹ Xitzun tma'n Moisés te kyja': —Yajtzun qa mi'n ẍinx kyniman, qa mi'n ẍinx kyb'i'n, ex qa ma kyma kyja': Minti' o kub' tyek'un tib' Qman twitza, qa che chi.

² Tzajtzun tqanin Qman te: —¿Titzun q'i'n tu'na tuj tq'ab'a? Xi ttzaq'we'n Moisés: —Jun ky'aqo'ch, chi Moisés.

³ Tzaj tma'n Qman te kyja': —Xo'nxa twitz tx'otx'. Xitzun t-xo'n Moisés twitz tx'otx', o ch'expaj naj ex ok te jun lob'aj. Atzunte Moisés, el oq ti'j.

⁴ Tzajtzun tma'n Qman te Moisés: —Nuqpinx tq'ab'a, ex tzyuntza tje', chi Dios. Xi tnuqpi'n Moisés tq'ab' ex tzaj ttzyu'n; o ch'expaj naj, ex oktl te ky'aqo'ch tuj tq'ab'.

⁵ Tzaj tma'n Qman te kyja': —Tu'ntzun jlu k'okex kyniman qa ax tok o kub' nyek'un wib'e twitza, aqine Dios, aju Kydios t-xe'chela, Tdios Abraham, Tdios Isaac ex Tdios Jacob.

⁶ Tzaj tma'ntl Qman te: Q'o'nkx tq'ab'a ttzi t-xu'ka. Okxtzun tq'o'n tq'ab' ttzi t-xu'k, ex tej tetz ti'n, lu nojnitoq ti'j tu'n tx'a'k, ex saq ke'yintoq ik tza'n ttxa che'w.

⁷ Tzaj tma'ntl Qman te kyja': —Q'o'nkx juntl maj tq'ab'a ttzi t-xu'ka. Okxtzun tq'o'ntl Moisés tq'ab' ttzi t-xu'k ex tej tetz ti'ntl, otoq b'anix tq'ab' ik tza'nx tten tkyaqil t-ximlal.

⁸ —Qatzun mi'n ma txi nimana kyu'n, ex qa mi'n ma txi kyb'i'n tyola ok tb'ant tnejel techal, kxe'ltzun nimana kyu'n ok tb'ant tkab'in techal.

⁹ Qatzun mi'n ma txi kyniman qe kab'e techal lu, ex qa mi'n ma txi kyb'i'n tyola, kjawitztzun ti'na ch'in a' tuj nima ex kb'el tqo'na twitz tx'otx'. Kch'expeteltzun a' lu ex k'okel te chik' twitz tx'otx', chi Dios.

¹⁰ Xitzun ttzaq'we'n Moisés te Qman kyja': —Ay, Tat. B'ajx chin oke te jun xjal noq tokx yol tuj ttzi'; atxix wul-len itz'je ex mya noq o'kx tej ma yolina wuk'ile yaj in meltz'aj ntzi'ye ti'j yol, ex xt'ab' chin yoline, chi Moisés.

¹¹ Tzajtzun tma'n Qman te kyja': —¿Al u'n b'ant ttzi xjal? ¿Al u'n b'ant aju xjal mib'an yolin ex aju xjal mib'an b'in, aju xjal b'a'n ke'yin ex aju xjal moẍ? ¿Myapetzun wu'ne, aqine Kymane?

¹² Txi'ya ja'lo. Aqine chin onil teya ok tyolina, ex kxel nxnaq'tza'ne alkye yol kxel tma'na, chi Dios.

¹³ Xitzun tma'ntl Moisés te Dios: —Nman, chin kub'sale twitza tu'n t-xi t-sama'na junxitl xjal, chi Moisés.

¹⁴ Tzajtzun tq'oj Qman ti'j Moisés ex tzaj tma'n te kyja': —¿Myapetzun ojtzqi'n Aarón wu'ne, aju aj Leví ex ttzika? B'a'n wu'ne b'a'nxix yolin. Tzul kanul ti'ja, ex ok tke'yinjtza tu'n ktzalajel nim tuj tanmi.

¹⁵ Aya k-yolil tuk'il, ex kxel tma'na te alkye yol tu'n t-xi tma'n. Aqine chin xel q'onte yol tuj ttzi'ya, ax ikx tuj ttzi Aarón, ex che xel nxnaq'tza'ne alkye kb'antel kyu'ne.

¹⁶ A Aarón k-yolil te t-xela kywitz xjal. Ate k'okel mer ik tza'n ttzi'ya; atzun teya k'okela mer ik tza'n Dios te te.

¹⁷ Q'inxa aju ky'aqo'ch lu, porke tu'ntzun jlu che b'antel qe techal tu'na, chi Dios.

Aj meltz'aj Moisés tuj Egipto

¹⁸ Ik'tzun Moisés, pon tja Jetro aju tji' ex xi tma'n te kyja': —Waje tu'n waj meltz'aje kyuk'il nxjalile ate' tuj Egipto, tu'n twile qa itz'x qe, chi Moisés. Xitzun tma'n Jetro te Moisés: —Txi'ya tuk'il tzalajb'il.

¹⁹ Ax ikx otoq tzaj tma'n Qman te Moisés tuj Madián kyja': —Taj meltz'aja tuj Egipto porke o che kyim kykyaqil qeju kyajb'iltoq tu'n tkub' b'yo'na kyu'n.

²⁰ Tzajtzun ti'n Moisés aju t-xu'jil kyuk'ix qe tk'wa'l, e jax tq'o'n kyib'aj bur, ex aj meltz'aj tuj Egipto. Ax ikx xi ti'n Moisés aju ky'aqo'ch te Dios.

²¹ Xi tma'n Qman te Moisés: —Ok tpona tuj Egipto noq mi b'ant tu'na qe b'inchb'en nim kyipumal twitz Faraón, porke o txi nq'o'ne tipumala tu'n kyb'ant tu'na. Maske ikju, ex kb'el nkyuwsa'ne tanmi, ex mi'n che etz ttzoqpi'n qe aj Israel.

²² Kxe'ltzun tma'na te Faraón: O tzaj tma'n Qmane kyja': Qe aj Israel mer ik tza'n tnejel nky'ajale qe.

²³ Ma txi nma'ne teya tu'n kyex ttzoqpi'na tu'n kyk'ulun weye; atzun teya mi'n taja tu'n kyex ttzoqpi'na. Tu'n jlu kb'el nb'yo'ne aju tnejel tky'ajala, chikuya te Faraón, chi Dios te Moisés.

²⁴ Kyja'toq t-xi' Moisés tuj b'e ex pon jatum tu'n tex aq'b'il te. Kub' tyek'un tib' Qman twitz ex o tajb'e Qman tu'n tkub' b'yo'n Moisés tu'n.

²⁵ Tzajtzun ti'n Séfora jun ab'j attoq ttzi' wen, el tqesin ttz'umal twi ttz'a'lb'il tal, xi t-xo'n kyxe tqan Moisés ex xi tma'n te kyja': Ax tok nchmil, noq tu'n tlaja ma tz'el chik', chi xu'j.

²⁶ O tma Séfora ikju tu'n tlaj sircunsisyón. Kyja'tzun tten tzoqpet Moisés tu'n Qman.

²⁷ Tzaj tma'n Qman te Aarón: —Txi'ya kanul ti'j Moisés tuj tzqij tx'otx', chi Qman. Tzajtzun Aarón, ex o knet Moisés tu'n t-xe witz te Dios ex el ttz'ub'an twitz.

²⁸ Xitzun ttx'olb'a'n Moisés te Aarón tkyaqil yol otoq tzaj tma'n Qman te, kyuk'ix kykyaqil qe techal otoq che tzaj q'ma'n te tu'n tb'inchante.

²⁹ E je'xtzun Moisés ex Aarón ex e ok kychmo'n kykyaqil qe tij xjal at kyoklen kyxol aj Israel.

³⁰ Xi ttx'olb'a'n Aarón tkyaqilju otoq tzaj tma'n Qman te Moisés ex tb'incha qe techal kywitz qe xjal.

³¹ Xitzun kyniman aj Israel tyol Moisés. Tej kyb'inte qa otoq til Qman aju yajb'il kye ex tajb'iltoq tu'n t-onin kyi'j, e kub' mok'e' ex e k'ulun.