Éxodo 37 - Mam de Huehuetenango nueva ortografía

B'ant kax k'ub'l tley Dios

¹ Ax ikx tb'incha Bezaleel aju kax ti'j tze' ch'i'x acacia, te jun var tuk'il jun xk'achub' tnuqb'il, ox xk'achub' twitz ex ox xk'achub' twa'l.

² Ok tlo'tzin q'an pwaq tb'anilxix tujile ex ti'jele ex kub' tq'o'n jun adorn ttxa'nile, q'an pwaq ttx'otx'il.

³ Ax ikx e kub' tb'incha'n kyaje argoy q'an pwaq kytx'otx'il, ex e ok tq'o'n kyi'j kykyajil tqan kax, kab'e jun pak' ex kab'etl juntl pak'.

⁴ Ax ikx tb'incha kab'e tze' tolin kyi'j ti'j tze' ch'i'x acacia, ex ok tlo'tzin q'an pwaq kyi'j.

⁵ Extzun tq'o'n qe jlu kyuj qe argoy ate'k ttxlaj kax, tu'n t-xi tanut kax kyi'j.

⁶ B'aj tb'incha'n aju tmaqsil q'an pwaq tb'anilxix ttx'otx'il, te jun var tuk'il jun xk'achub' tnuqb'il ex ox xk'achub' twitz.

⁷ Ax ikx b'aj tb'incha'n kab'e tilb'ilal querubín q'an pwaq kytx'otx'il tx'ino'n qe tu'n martiy, ex e kub' tq'o'n kyib'aj kykab'il pak' ttxa'n tmaqsil kax.

⁸ Jun tkub' tib'aj jun pak' ttxa'n tmaqsil ex jun tib'aj juntl pak'. Te junx piẍ el aju tmaqsil ex qe kab'e tilb'ilal querubín.

⁹ Lik'un tten kyxik' tu'n ttxayit tmaqsil kax, kyja'tzun aju twitz jun kub' ten twitz juntl, ex kyja' in kub' kyke'yin tib'aj tmaqsil.

B'ant mes tu'n kykub' ten pan tib'aj

¹⁰ B'aj tb'incha'n mes ti'j tze' ch'i'x acacia, jun var tnuqb'il, kab' xk'achub' twitz ex ox xk'achub' twa'l.

¹¹ Ok tlo'tzin q'an pwaq tb'anilxix ti'j, ex kub' tq'o'n jun adorn ttxa'nile q'an pwaq ttx'otx'il.

¹² Ax ikx tb'incha jun tmaqel ttxa'nile mes, kyaje q'ab' twa'l ex ok tq'o'n jun adorn ttxa'nile q'an pwaq ttx'otx'il.

¹³ Tb'incha kyaje argoy q'an pwaq kytx'otx'il, ex e ok tq'o'n kyi'j kykyajil pak' ttxa'n mes kyi'j tqan.

¹⁴ Atzun ate'k qe argoy lu tjaq' tmaqel, tu'n kyokx qe tze' tolin kyi'j kyuj, tu'n t-xi tanut mes.

¹⁵ Tb'incha qe tze' ti'j tze' ch'i'x acacia, tu'n t-xi tanut mes kyi'j, ex ok tlo'tzin q'an pwaq kyi'j.

¹⁶ Ax ikx tb'incha qe makb'il in che ajb'en tib'aj mes, q'an pwaq tb'anilxix kytx'otx'il: Qe laq, qe pak', qe xar ex qe matij vas in che ajb'en te qob'l oyaj ti'j ta'l twitz uva.

B'ant kykub'il kandil q'an pwaq

¹⁷ Ax ikx tb'incha jun kykub'il kandil, q'an pwaq tb'anilxix ttx'otx'il tx'ino'n tu'n martiy. Te junx el aju tq'uqb'il, aju tqan, qe tcopa, qe tilb'ilal xwakin kyten ex qe tilb'ilal b'ech.

¹⁸ In che el qaq tq'ab' ti'j tk'u'j, ox tuj jun pak' ex ox tuj juntl pak'.

¹⁹ Ti'j teyle junjun tq'ab' nne'l ti'j tk'u'j ate'k ox tilb'ilal b'ech tjaq'xi, ik tten b'inchb'en kye ik tza'n t-xmakal tze' almendro.

²⁰ Ti'j ju tqan, tuj tmij kykub'il kandil ate'k kyaje tilb'ilal b'ech tjaq'xi, ik tten b'inchb'en kye ik tza'n t-xmakal tze' almendro;

²¹ tjaq' teyle junjun moj tq'ab' nne'l ti'j tk'u'j at jun tilb'ilal b'ech tjaq'xi, ik tten b'inchb'en kye ik tza'n t-xmakal tze' almendro.

²² Qe tilb'ilal b'ech ex qe tq'ab' e je'l ti'j junx piẍ q'an pwaq tb'anilxix, ex tx'ino'n tu'n martiy.

²³ Ax ikx tb'incha wuq kandil ti'j q'an pwaq tb'anilxix, kyuk'il matzb'il twi mech ex qe tal tkub'il ttza'jil mech.

²⁴ Ajb'en 75 libr q'an pwaq tb'anilxix tu'n tu'n tb'ant aju kykub'il kandil ex kykyaqil qe makb'il in che ajb'en ti'j.

B'ant altar tu'n tkub' patit storak

²⁵ Ax ikx tb'incha aju altar tu'n tkub' patit storak tib'aj. Tb'incha ti'j tze' ch'i'x acacia, kab' xk'achub' twitz, kab' xk'achub' tnuqb'il ex jun var twa'l; junx kyaj twitz tuk'il tnuqb'il ex kyiqlix kyib' qe tkach ti'j.

²⁶ Ok tlo'tzin q'an pwaq tb'anilxix kyi'jele kykyajil pak' ttxlaj, tuk'ix tib'aj ex kyi'j qe tkach, ex kub' tq'o'n jun adorn ttxa'nile te tib'aj, q'an pwaq ttx'otx'il.

²⁷ Kyi'j kab'e tb'utx' te jun pak' tjaq'xi adorn, e ok tq'o'n kab' argoy q'an pwaq kytx'otx'il, ex kab'e kyi'j kab'etl tb'utx' ti'j juntl pak', tu'ntzun kyex qe tze' tolin kyi'j kyuj, aqeju in che ajb'en tu'n t-xi tanut.

²⁸ Tb'incha qe tze' lu ti'j tze' ch'i'x acacia ex ok tlo'tzin q'an pwaq kyi'j.

B'inchet storak tuk'ix aseyt

²⁹ Ax ikx tb'incha aju aseyt tu'n tjax qet tuj twi' jun xjal ok tok toklen, ex aju storak tb'anilxix at tk'ok'jal, ik tza'n in b'ant kyu'n xjal b'inchal perjum.