Éxodo 36 - Mam de Huehuetenango nueva ortografía

¹ Kyja'tzun, ate Bezaleel ex Aholiab, kyuk'ix kykyaqil qeju at kynab'l tu'n kyb'inchante aq'untl tb'anilxix, aqeju o tzaj tq'o'n Qman kynab'l ex kyojtzqib'l tu'n kyb'inchante tkyaqilju at tajb'en tuj tja Dios, kb'antel kyu'n aju o tzaj tma'n Qman, chi Moisés.

Tzaj kyi'n aj Israel nimxix oyaj

² Tzaj txko'n Bezaleel tu'n Moisés, tuk'ix Aholiab ex kykyaqil qeju attoq kynab'l tu'n kyb'inchante aq'untl tb'anilxix, aqeju otoq tzaj tq'o'n Qman kynab'l ex otoq txi kyq'on kyib' tu'n kyex kygan tu'n kyonin ti'j aq'untl lu.

³ Xi kyk'mo'n te Moisés qe oyaj otoq che ul kyi'n aj Israel tu'n kyajb'en tuj tja Dios. Atzun kye aj Israel, teyle junjun prim kukxtoq tul kyi'n kyoyaj tu'n kyex kygan.

⁴ Kykyaqil qeju attoq kynab'l ex in che aq'nantoq ti'j ju attoq tajb'en ti'j tja Dios, we' ch'in aq'untl kyu'n,

⁵ ex e je'x q'malte te Moisés kyja': Ma tzul kyi'n xjal mas nim twitzju at tajb'en ti'j aq'untl o tzaj tma'n Qman tu'n tb'ant, che chi.

⁶ Xitzun t-sama'n Moisés tqanil kyxol kykyaqil xjal tuj campament, chi kyja': Mi jun xinaq, mi jun xu'j ktzajel ti'ntl toyaj ti'j tja Dios. Kyja'tzun tten o we' tu'n tul kyi'n xjal kyoyaj.

⁷ Mya noq o'kx otoq chmet aju attoq tajb'en tu'n tb'ant aq'untl, ax ikx otoq pon txqantl tib'aj.

B'ant tja Dios, xb'alun ja

⁸ Aqeju mas attoq kynab'l tu'n kyb'inchante aq'untl tb'anilxix, b'aj kyb'incha'n ja xb'alun kyi'j laj xb'alun b'inchamaj ti'j noq' lino ex ti'j noq' ẍq'ilun ke'yin, ẍjulin ke'yin ex kyaq ke'yin; tkyaqil noq' chub'emajtoq ex tb'anil b'inchb'en kye, ex b'i'x xi kychmo'n kyilb'ilal querubín kywitz.

⁹ Kykyaqil xb'alun lu junx ta' echb'il kye: Kyajlaj var kynuqb'il ex kab' var kywitz.

¹⁰ Ok t-slapun Bezaleel jwe' xb'alun jun ttxlaj juntl, ax ikx e tenb'a jwe'tl.

¹¹ E ok tq'o'n taq'al ẍq'ilun che ke'yin te t-ẍkyin ttxlaj mankb'il xb'alun kyi'j qe jwe' otoq che ok slapit. Ax ikx e ok tq'o'n taq'al ttxlaj jun xb'alun kyi'j qe jwe'tl.

¹² E ok tq'o'n 50 taq'al te t-ẍkyin ttxlaj tnejel xb'alun ex 50 ttxlaj juntl, tu'n tkyaj ten jun twitz juntl.

¹³ Ax ikx b'aj tb'incha'n 50 ganch q'an pwaq kytx'otx'il. Kyu'ntzun qe jlu e ok tmojb'a'n qe ttxlaj xb'alun jun tuk'il juntl. Oktzun ja xb'alun te junx tten.

¹⁴ Ax ikx b'aj tb'incha'n junlaj xb'alun ti'j kytzmal chip, tu'n t-xi lik'et tib'aj ja xb'alun.

¹⁵ Kykyaqil qe xb'alun lu junx ta' echb'il kye: Olaj var kynuqb'il ex kab' var kywitz.

¹⁶ E ok t-slapun jwe' xb'alun jun ttxlaj juntl, ax ikx e ok t-slapun qaqtl xb'alun jun ttxlaj juntl.

¹⁷ E ok tq'o'n 50 taq'al te t-ẍkyin ttxlaj tnejel xb'alun ex 50 ttxlaj juntl.

¹⁸ Ax ikx tb'incha 50 ganch q'an k'uxb'il kytx'otx'il tu'n kyok moje' kytxa'n xb'alun, tu'ntzun tok te junx tten.

¹⁹ Tb'incha jun maqsib'l te ja xb'alun ti'j ttz'umal ẍne'l tok tk'a' kyaq ke'yin, ex tib'ajxi jlu tb'incha juntl maqsib'l ti'j tz'u'm tb'anilxix.

²⁰ E b'aj tb'incha'n txqan tz'lom ti'j tze' ch'i'x acacia, aqeju wa'l kyten tu'n kyajb'en ti'j ja xb'alun.

²¹ Teyle junjun tz'lom, jwe' var tnuqb'il ex ox xk'achub' twitz.

²² Teyle junjun tz'lom at kab'e t-ẍkyin tu'n tku'x qe' jun ttxlaj juntl. Iklex e tenb'a kykyaqil qe tz'lom tu'n ti'j ja xb'alun.

²³ E b'aj tb'incha'n winqin tz'lom tu'n kyok ten tuj tumlal tnayaj q'ij te ja xb'alun.

²⁴ Ax ikx e kub' tb'incha'n 40 kyq'uqb'il tz'lom saq pwaq kytx'otx'il. Kab'e tq'uqb'il tjaq' teyle junjun tz'lom, tu'n kyku'x qe' kykab'il kyẍkyin kyuj.

²⁵ Ax ikx tuj juntl pak' ja xb'alun, tuj tumlal tb'anq'ab' q'ij tb'incha winqin tz'lom,

²⁶ ex 40 kyq'uqb'il saq pwaq kytx'otx'il, tu'n kyten kab'e tjaq' teyle junjun tz'lom.

²⁷ Atzun ti'jxi ja xb'alun, tuj telex q'ij, e b'aj tb'incha'n qaq tz'lom

²⁸ ex kab'etl tz'lom tu'n kyok kyi'j qe kab'e tb'utx' te ti'jxi,

²⁹ aqeju tu'n kymojb'et xi'ynix t-xe', atzun twi' tu'n kyok mojb'et tu'n jun argoy. Atzun jlu tb'incha kyi'j kykab'il tz'lom kyi'j kykab'il tb'utx' te ti'jxi.

³⁰ E b'anttzun wajxaq tz'lom ex qaqlaj kyq'uqb'il saq pwaq kytx'otx'il, kab'e tjaq' teyle junjun tz'lom.

³¹ Ax ikx b'aj tb'incha'n jwe' tze' ti'j tze' ch'i'x acacia, te tq'e'lil, tu'n kyok ten qe tz'lom kyi'j tuj jun pak' ja xb'alun,

³² jwe'tl tze' tu'n kyok ten qe tz'lom kyi'j tuj juntl pak' ex jwe'tl tu'n kyok ten qe tz'lom kyi'j ti'jxi ja xb'alun tuj telex q'ij.

³³ B'aj tb'incha'n aju tze' te tuj tmij, tu'n tik'x kymij qe tz'lom, tu'n t-xi qe' ti'j jun ttxa'n ex tu'n tpon b'aj ti'j juntl.

³⁴ Ok tlo'tzin q'an pwaq kyi'j qe tz'lom ex e b'aj tb'incha'n qe argoy q'an pwaq kytx'otx'il jatum tu'n kyex qe tze'. Ax ikx ok tlo'tzin q'an pwaq kyi'j qe tze' lu.

³⁵ B'aj tb'incha'n jun xb'alun te maqb'il, ti'j noq' lino chub'emaj ttze'yil, ex ti'j noq' ẍq'ilun ke'yin, ẍjulin ke'yin, kyaq ke'yin, tb'anil b'inchb'en te, ex b'i'x xi tchmo'n kyilb'ilal querubín twitz.

³⁶ B'aj tb'incha'n kyaje tqan ti'j tze' ch'i'x acacia, ex ok tlo'tzin q'an pwaq kyi'j. Ax ikx tb'incha qe tganchil q'an pwaq kytx'otx'il, ex kyaje kyq'uqb'il tqan saq pwaq kytx'otx'il.

³⁷ Ax ikx tb'incha jun xb'alun te maqb'il ttzi ja xb'alun. B'aj tb'incha'n ti'j noq' ẍq'ilun ke'yin, ẍjulin ke'yin ex kyaq ke'yin ex ti'j noq' lino chub'emaj ttze'yil, ex b'i'x xi tchmo'n qe tilb'ilal twitz.

³⁸ E b'aj tb'incha'n jwe' tqan tuk'ix adorn tjax tuj kywi', ex ok tlo'tzin q'an pwaq kyi'j. Ax ikx tb'incha qe tganchil q'an pwaq kytx'otx'il, ex tb'incha jwe' kyq'uqb'il tqan q'an k'uxb'il kytx'otx'il.