Daniel 3 - Mam de Huehuetenango nueva ortografía

Xi tma'n rey tu'n kyk'ulun xjal twitz tilb'ilal q'an pwaq ttx'otx'il

¹ Xi tma'n rey Nabucodonosor tu'n tkub' b'inchet jun tilb'ilal q'an pwaq ttx'otx'il; aju twa'l te 30 var ex aju twitz te kyaje var tuk' mey; ex xi tma'n tu'n tkub' ten tuj chq'ajlaj Dura tb'i, tujx partament Babilonia.

² Te tib'ajxi, xi tma'n tu'n kyxi txokb'aj kykyaqil qe kawil ma' kyoklen, kyuk'ix qe nejenel kye soldad, qe gobernador tuj junjun partament, qe q'ol tnab'l rey, qe k'u'l pwaq, qe jwes, qe ajkal, ex kykyaqil aj sanjelal kye txqantl tnam, tu'n kyten tuj ik'sb'il q'ij ti'j tilb'ilal otoq txi tma'n rey tu'n tb'ant.

³ Kykyaqiltzun xjal lu ma' kyoklen ok kychmon kyib' twitz tilb'ilal tu'n tik'set tq'ijlalil.

⁴ Attoq jun otoq kyaj q'o'n toklen tu'n t-xi tma'n kye xjal ok ttzyet ik'sb'il q'ij, ex tej tjaw tq'ajq'ajel twi' kyuw, tma: Kyb'intze aqeye xinaq kye kykyaqil tnam, kye kykyaqil nasyon ex kykyaqil k'loj yol:

⁵ Ok t-xi kyb'i'ne ok tq'ajt chun, xux, tal kitar, arpa, chqitz', chirimiy ex txqantl chnab', b'a'n tu'n kykub' ẍmeje'ye ex tu'n kyk'ulune twitz tilb'ilal q'an pwaq ttx'otx'il aju ma b'aj tb'incha'n rey Nabucodonosor.

⁶ Qa at jun xjal minti' ma kub' ẍmeje', ex qa minti' ma k'ulun twitz tilb'ilal lu, jurat naj kxel xo't tuj jorni in k'ant tu'n q'aq', chi xjal.

⁷ Tejtzun kyb'inte kykyaqil xjal otoq kub' kyb'uyin kyib' aju tq'ajq'ajel kywi' kykyaqil txkaj chnab', e kub' ẍmeje' ex e k'ulun twitz tilb'ilal q'an pwaq ttx'otx'il, aju otoq b'ant tu'n rey Nabucodonosor.

⁸ At junjun aj Caldeo e je'x q'ol part kyi'j qe xjal Judiy tuk'il rey Nabucodonosor,

⁹ ex xi kyma'n te: —Tat Rey, b'a'nwt tz'el tq'ija.

¹⁰ Aya ma q'mante tu'n kykub' ẍmeje' kykyaqil xjal jurat naj ex tu'n kyk'ulun twitz tilb'ilal q'an pwaq ttx'otx'il ok kyb'inte tq'ajq'ajel kywi kykyaqil txkaj chnab',

¹¹ ex alkyetzun minti' ma kub' ẍmeje' twitz tilb'ilal, jurat naj kxel xo't tuj jorni in k'ant tu'n q'aq'.

¹² Ex at junjun xjal Judiy, aqeju e ok tq'o'na te nejenel ti'j tkyaqil aq'untl tuj tx'otx' Babilonia, minti' in che niman teya ex minti' in che k'ulun kywitz qe tdiosa ex twitz tilb'ilal q'an pwaq ttx'otx'il aju ma b'aj tb'incha'na. Atzun qe jlu: Sadrac, Mesac ex Abed-nego.

¹³ Tzajtzun nim tq'oj Nabucodonosor ex xi tma'n tu'n kytzaj q'i'n Sadrac, Mesac ex Abed-nego twitz. Tejtzun kypon q'i'n twitz,

¹⁴ xi tqanin kye: —¿Maj minti' in che k'ulune kywitz qe ndiose ex twitz tilb'ilal q'an pwaq ttx'otx'il ma b'ant wu'ne?

¹⁵ ¿B'a'npe tuj kywitze, ok kyb'inteye tq'ajq'ajel kywi chnab', jurat naj tu'n kykub' ẍmeje'ye k'ulul twitz tilb'ilal q'an pwaq ttx'otx'il aju ma b'aj nb'incha'ne? Ex qa mi ma che kub' ẍmeje'ye twitz, b'i'x che okex xo'te tuj jun jorni in k'ant tu'n q'aq', ex mi a'l jun dios jaku che klete tu'n tuj nq'ab'e.

¹⁶ —Tat Rey, mya il ti'j tu'n qyoline ti'j jlu, che chi ox ku'xun.

¹⁷ —Aju qeye Qdios, aju in qo k'ulune te, jaku qo klete tu'n tuj q'aq' tuj jorni, ex qo kletele tu'n tuj tq'ab'a.

¹⁸ Ex qatzun mlay qo klete tu'n Qdiose, tz'elx tnik'a ti'j Tat Rey, mlayx qo k'ulune kywitz tdiosa ex mlayx qo kub' ẍmeje'ye twitz ju tilb'ilal q'an pwaq ttx'otx'il, aju ma b'aj tb'incha'na.

E klet qe ox ku'xun tuj q'aq'

¹⁹ Tej tb'inte Nabucodonosor aju yol lu, b'i'x japun tkyaqal tu'n tq'oj kyi'j qeju ox ku'xun lu. Ex tma tu'n tmeq't-xix wuq maj jorni mas ik tza'n in tenb'a nej;

²⁰ ex xi tma'n kye junjun t-soldad mas at-xix kyipun, tu'n kyb'aj k'alo'n Sadrac, Mesac ex Abed-nego ex tu'n kyokx xo'n tuj jorni in k'ant tu'n q'aq'.

²¹ Aqeju ox ku'xun lu e b'aj k'alo'n, tuk'ix kykamiẍ, kywex, k'alb'il kywi' ex txqantl kyxb'alun tok kyi'j, ex e okx xo'n tuj jorni in k'ant tu'n q'aq'.

²² Tu'nju o tma rey tu'n tjapun naj ex tu'nju in k'ant-xix q'aq' wen tuj jorni, kyja'tzun, aju tqan q'aq' pon kanun kyi'j qe soldad aqeju e okx q'onte kye ox ku'xun; b'i'x e tz'e'y soldad tu'n ex e kyim,

²³ atzun kye oxe ku'xun lu k'alo'n qe tej kykupun tz'aq tuj jorni in k'ant-xix wen tu'n q'aq'.

²⁴ Atzunte Nabucodonosor b'i'x naj tnab'l ex jurat jaw we' naj ex xi tma'n kye qe xinaq at kyoklen ttxlaj: —¿Myapetzun ox xinaq k'alo'maj ẍe okx qxo'n tuj q'aq'? —Ax tok, che chi.

²⁵ —Ex ma wile kyaje xjal pju'maj in che b'et tuj q'aq' ex minti' in che tz'e'y, ex aju tkyajin xinaq ik ke'yin ik tza'n jun dios, chi rey.

²⁶ Pontzun laq'e' Nabucodonosor ttzi jorni in k'ant tu'n q'aq' ex tma: —Aya Sadrac, tuk'ix Mesac ex Abed-nego, tmajen Dios ma' toklen qeye, kyetze ex kytzaje tzalu. E je'tztzun qe ox ku'xun tuj jorni,

²⁷ ex kykyaqil aj sanjelal ma' kyoklen otoq che pon, e pon laq'e' kytxlaj, ex aqeju ku'xun lu, minti' ch'in otoq che tz'e'y tu'n q'aq', ex b'aj kyke'yin, mi jun ttzmal kywi' otoq tz'e'y ex ttenx kyxb'alun ik tza'n nej ex minti' ch'in t-xewil tz'e'ynaq kyi'j.

²⁸ Atzunte Nabucodonosor tma: Nimanxwit tb'i Kydios Sadrac, Mesac ex Abed-nego, tu'nju ma tzaj t-sama'n t-anjel te klolte kye qe tmajen q'uql kyk'u'j ti'j; minti' ma txi kyniman nleye, aqine rey, ex ma kyajb'e tu'n kykyim twitzju tu'n kykub' ẍmeje' twitz juntl dios aju mya kye Kydios.

²⁹ Ja'lo kxel nq'o'ne jun ley: Alkye jun xjal ma yolin mya b'a'n ti'j Kydios qe ku'xun lu, b'i'x kb'el paẍut ex aju tja b'i'x kb'el xitet, noq alkyex ttanmi ex tyol, ex mi a'l juntl Dios jaku che klet xjal tu'n ik tza'n jlu, chi rey.

³⁰ Atzunte rey ok tq'o'n kyoklen Sadrac, Mesac ex Abed-nego te ma'xix tuj partament Babilonia.