Cantares 1 - Mam de Huehuetenango nueva ortografía

¹ Aju b'itz mas tb'anilxix o b'ant tu'n Salomón.

Tnejel b'itz Aju tyol xu'j

² Noqwit b'a'n tel ntz'ub'an ttzi'ya. Aju tk'ujlalila masxix chi' twitz ta'l twitz uva,

³ tb'anilxix tk'ok'jal perjum tok ti'ja, aju tb'iya b'a'n ik tten ik tza'n perjum nne'l qojl. Kyja'tzun at nimxix kygan q'apoj ti'ja.

⁴ Jurat chin ti'nxa tuk'ila. Chin ti'nxa kyuj qe tjaya, aya rey. Tuk'ila qo tele tuj tzalajb'il; ktzajel qna'ne tk'ujlalila mas chi' twitz ta'l twitz uva. Kyja'tzun at nimxix kygan q'apoj ti'ja.

Coro Aju tyol xu'j

⁵ Aqeye xu'j aj Jerusalén, q'eq xjal qine ex tb'anilxix chin ke'yine; q'eq qine ik tza'n qe xb'alun ja ate' tuj tx'otx' Cedar, tb'anilxix chin ke'yine ik tza'n qe xb'alun kykub' qe te maqb'il tuj tja Salomón.

⁶ Mi'n tz'ok kyq'o'n kywitze wi'je tu'nju q'eq xjal qine, ex qa tu'nju ma tz'e'y ntz'umile tu'n q'ij. Qe nxib'ane tzaj kyq'oj wi'je, ok kyq'o'n qine te kwentil tqan ky-uva, atzunju weye tqan n-uva minti' in kanine kwentil te.

⁷ Aya at nimxix nk'u'je ti'ja, q'mantza jatum in pastorina kyi'j qe t-ẍne'la. ¿Jatum in che'x ti'na qe ojlal ok tpon chilkuq'ij? ¿Tiqu'n at tu'n nb'ete ik tza'n jun xjal noq in b'etje' junx kyuk'il kyẍne'l qe tuk'ila?

Coro

⁸ Qa minti' b'a'n tu'na, aya tb'anilxix ke'yin kywitz txqantl xu'j, lpe'ka ti'j jatum texlen kyqan ẍne'l ex pastorina kyi'j qe tal tchipa junx kytxlaj kypach qe pastor.

Aju tyol xinaq

⁹ Aya at-xix nk'u'je ti'ja, ik ttena te weye ik tza'n jun yew tb'anilxix jawol tcarwaj rey Faraón.

¹⁰ Tb'anilxix che ke'yin qe tq'o'txa kyu'n qe tuj t-ẍkyina. Tb'anilxix ke'yin tqula kyu'n qe uwj tb'anil tal ab'j perla kyb'i.

¹¹ Jaku qb'inchaye tuj t-ẍkyina q'an pwaq ttx'otx'il ex tu'n tb'aj lo'tzit ti'j tu'n saq pwaq.

Aju tyol xu'j

¹² Akux in kub' qe' rey ti'j mes, el juptz'aj tk'ok'jal perjum nardo tb'i, q'i'n wu'ne.

¹³ Aju xinaq k'ujla'nxix wu'ne ik tten ik tza'n jun bols tq'olil tze' mirra at tk'ok'jal tok ttzi nxu'ke.

¹⁴ Aju xinaq k'ujla'nxix wu'ne ik tten ik tza'n b'ech alheña tb'i k'ok'jxix wen, in tzaj ch'iy kyxol tqan uva tuj lugar En-gadi.

Aju tyol xinaq

¹⁵ Tb'anilxix ke'yina, aya at-xix nk'ujlalile ti'ja, tb'anilxix ke'yina. Qe tb'aq' twitza tb'anilxix che ke'yin ik tza'n che ke'yin paloma.

Aju tyol xu'j

¹⁶ Tb'anilxix ke'yina, aya at-xix nk'ujlalile ti'ja, tb'anilxix ke'yina. Aju cha'x ch'im, atzunju k'okel te qkoẍb'il.

Aju tyol xinaq

¹⁷ Aju tze' wi'ten, atzunju k'ajb'el te viga twi' qja, atzun tz'lom tzaj, atzunju kjawix te twi' qja.