Tito 2 - Mam de Huehuetenango Bible

Tu'n kk'onte xnak'tzbil tuj tumelxix

¹ Atzun teya, k'onxa ju xnak'tzbil cye, aju xnak'tzbil minti' tpaltil.

² K'manxa cye ansyan tu'n tten cynabl ex tu'n tten cychiylal, ex tu'n cyjac'unte cyib, ex tu'n tten cyocslabl minti' tpaltil, ex tu'n tten cyc'ujlalil axix toc ex tu'n tten cypasens tu'n tic'x cyu'n.

³ Ax icx k'manxa cye tij xu'j tu'n tten tchiylal Dios cye tuj tcyakil, ex tu'n mi'n cyoc si'mil yol, ex tu'n mi'n cyoc c'al k'e'n, nok o'cx tu'n cyk'onte xnak'tzbil ti'j ju ba'n,

⁴ ex tu'n t-xi cyk'o'n tij xu'j xnak'tzbil cye ke xu'j k'apojx ke tu'ntzun cyc'ujlante cychmil cyuc'ix cyal,

⁵ ex tu'n cyjac'unte cyib, ex tu'n cyten sak tuj cyanmi, ex tu'n toc cycwentin cyja, ex ba'n cymod, ex tu'n t-xi cyniman cychmil; tu'ntzun mi'n cyyolin xjal mya ba'n ti'j tyol Dios.

⁶ Ax icx k'onxa cynabl cu'xun tu'n cyjac'unte cyib.

⁷ Tuj tcyakil binchama ba'n tu'n toca te jun yec'bil cye mastl, k'onxa xnak'tzbil cabalxix, ex atwit toclen tyola.

⁸ Aju t-xnak'tzbila minti'wt tpaltil ex minti' tu'n cyyolin xjal ti'j, tu'ntzun ttzaj tch'ixwi aj k'oj cyi'je, ex tu'n mi'n tyolin jun yol mya ba'n cyi'je.

⁹ K'onxa cynabl majen tu'n cynimante cyyol cypatrón, ex tu'n cybinchante aju ba'n tu'n cytzalaj cypatrón cyi'j, ex tu'n mi'n taj cymojtza'n cyyol cypatrón,

¹⁰ ex tu'n mi'n cyelk'an, nok o'cx tu'n toc cycwentin tcyakil, tu'ntzun tel cynic' xjal ti'j ka tbanilxix t-xnak'tzbil Dios aju Clol ke.

¹¹ Porque ma tzaj tyec'un Dios t-xtalbil cye cycyakil xjal tza'n tten tu'n cyclet.

¹² In tk'o'n t-xtalbil Dios xnak'tzbil ke tu'n tcyaj kcolin aju mya ba'n ex aju achbil twitz tx'otx' ex tu'n tten knabl tuj tk'ijlalil ja'lo, ex tu'n kbet tuj tumelxix, ex tu'n kniman Dios.

¹³ Ex in tk'o'n xnak'tzbil ke tu'n kayon ti'j Jesucrist oc tul, porque jun tzalajbil oc tjapun jlu. Aju Jesucrist Kdios ma'xix toclen ex Clol ke, oc tyec'unte tib in koptz'aj wen.

¹⁴ Xi tk'on tib Jesucrist tu'n tcyim tu'n tchjet kil tu'n, tu'ntzun kcolpet tu'n tuj tcyakil mya ba'n, ex tu'n t-sakix tuj kanmi tu'n, tu'n koc te jun tnam tecuxix ex at-xix kgan tu'n kbinchante aju ba'n.

¹⁵ K'manxa jlu cye ocslal, k'onxa cynabl ex cawinxa ke, atwit tipumal tyola. Miwt jun tz'el ic'un teya.