Rt 2 - Mam de Huehuetenango Bible

Xi' Rut sucwil sebad tuj tcojbil Booz

¹ Attok jun xinak Booz tbi at t-xilen tuc'il Elimelec aju ktzan tchmil Noemí, ate xinak lu k'inunxix.

² At jun k'ij xi tma'n Rut te Noemí: —K'ontza ambil weye tu'n nxi'ye tuj cojbil, kapelo at jun xjal jacu tzaj tk'o'n ambil weye tu'n woc lpe'ye sucwil ti'j. —Ba'n tu'n t-xi'ya wal, chi Noemí te.

³ Xi'tzun Rut tuj cojbil, ex oc ten sucwilte sebad aju in cyaj naj cyu'n ke majen. Ex tc'ulbacu, a canun tuj tcojbil Booz aju at t-xilen ktzan Elimelec tuc'il.

⁴ Pontzun Booz, tzajnitok tuj Belén ex e je'x tk'olbe'n ke tmajen: —Awt Kman ten cyuc'ile, chi Booz cye tmajen. —Awt Kman cy'iwlan teya, che chi majen te Booz.

⁵ Xi tkanin Booz te tcaporal: —¿Alcye tman txin lu?

⁶ Atzunte caporal xi ttzak'we'n: —Aj Moab te txin lu, aju o tzul junx tuc'il Noemí.

⁷ Ma tzaj tkanin weye tu'n t-xi lpe' sucwil sebad cyi'j ke majen; xtzyet-x tu'n prim may', ex matzun ma cub ten ch'in ojlal ja'lo.

⁸ Xitzun tma'n Booz te Rut: —Txin, bintza nej, mi'n txi'ya sucwil sebad tuj tcojbil juntl xjal. Ax tena tzalu cyuc'il ke nmajene xu'j,

⁹ ex lpexa cyi'j jatum in che ak'nan. Ma txi nma'ne cye nmajene tu'n mi'n cylabt ti'ja. Oc ttzaj txket ti'j tc'u'ja, bix txi'ya c'al a' jatum ate' ke xar tcubil cyc'a majen, chi Booz.

¹⁰ Atzunte Rut cub ẍmeje' ex pon tacl tibaj twitz max twitz tx'otx' te jun yec'bil te nimbil twitz Booz, ex xi tma'n te: —¿Tza'n tten ma tbinchaya xtalbil weye ex ma tz'oc ten tcwenta wi'je porque akine stranjer xjal?

¹¹ Atzunte Booz xi ttzak'we'n: —Ma nbiye tcyakilju ba'n o tbinchaya ti'j tliba atxix tej tcyim tchmila, ex ma cyaj tk'o'na tmana tuc'ix ttxu'ya ex ttanmiya nok tu'n tula najal kxole, masque mi'n ojtzki'n ko'ye tu'na.

¹² Awt Kman k'onte t-xel teya. Aju Kman aju Kdios aj Israel ko', awttzun k'onte jun oyaj teya ti'j tcyakilju ba'n ma tbinchaya, tu'nju ma tz'oc ke' tc'u'ja ti'j tu'n tcleta, chi Booz.

¹³ Atzunte Rut xi ttzak'we'n: —Tat, cucxwit tbinchaya xtalbil weye. Ma k'ukbanjtz nc'u'je tu'n tyola, ex ma yolina wuc'ile tuc'il tc'ujlalila, masque mya junx ta' woclene ic tza'n ke tmajena xu'j, chi Rut.

¹⁴ Tej tpon or te wabl, tzajtzun txco'n Rut tu'n Booz ex xi tma'n te: —Tzaja tzalu, k'inx tpana ex muncu'xa tuj vinagr. Cubtzun ke' Rut cytxlaj majen ex xi tk'o'n Booz ch'in twitz sebad tx'ilsa'maj te. O wa'n Rut tejxi tnoj tc'u'j ex atx cyaj ten tu'n.

¹⁵ Xi'tzun Rut juntl maj sucwil sebad ex xitzun tma'n Booz cye ke tmajen: —Ba'n tu'n t-xi ti'n txin ch'in twitz sebad, aju at cyxol junjun che'l, ex mi'n tz'oc cymayo'ne ti'j.

¹⁶ Ex ba'n tu'n tel cyxo'ne junjun chyuj twitz sebad ti'j junjun che'l, tu'ntzun tjaw tchmo'n aju nne'l tz'ak, ex mi'n tz'oc cymayo'ne ti'j, chi Booz.

¹⁷ O sucwin Rut sebad tuj tcojbil Booz tejxi tex k'ij, ex tcyakilju otok chmet tu'n oc ten bajulte, ex ch'ixmi cab arrob twitz el.

¹⁸ Ajtzun Rut tu'n tpon tuj tnam ikan twitz sebad tu'n. Tejtzun tpon, xi tyec'un te tlib aju otok chmet tu'n, ax icx jatz ti'n aju wabj minti' otok baj tu'n ex xi tk'o'n te Noemí.

¹⁹ Xitzun tkanin Noemí te Rut: —¿Jatum ma txi aja sucwil ja'lo? ¿Jatum ma cnet nim twitz sebad tu'na? Cy'iwla'nxwit aju xjal ma tz'onin teya. Xitzun tma'n Rut te tlib alcye tajwil cojbil jatum otok xi aj sucwil. —Aju xinak tajaw cojbil jatum ma chin sucwine, Booz tbi, chi Rut.

²⁰ Ex xitzun tma'n Noemí te: —Awt Kman cy'iwlante xinak lu. Ate Dios ma tbincha xtalbil ke ic tza'n o tbincha ojtxi cye ktzan kchmil. Ate xinak lu at t-xilen cyuc'il ktzan kchmil, ex tu'ntzun jlu at toclen ki'j tu'n koc tcwentin.

²¹ Ex xi tma'ntl Rut te tlib: —Ax icx ma tma Booz weye ax tu'n npone sucwil cytxlaj ke tmajen max ocxi tjaw baj sebad tuc'ix triw.

²² Xitzun tma'n Noemí te Rut: —Ax ba'n icju wal, ba'n tu'n ttena cyxol ke xu'j tmajen Booz, ex tu'n mi'n t-xi'ya tuj juntl cojbil, tu'ntzun mi jun tu'n tlabt ti'ja, chi Noemí.

²³ Cyja'tzun, ax xi' Rut sucwil cytxlaj ke tmajen Booz tejxi tjaw baj sebad ex triw. Ex axtok najl tuc'il tlib.