Proverbios 1 - Mam de Huehuetenango Bible

Aju cyoclen ke yol in cyk'o'n xnak'tzbil

¹ Ke yol o k'manjtz tu'n Salomón aju tcy'ajal David ex rey cye aj Israel,

² atzun cyxilen jlu: Tu'n t-xi k'ot cynabl xjal, tu'n t-xi k'ot xnak'tzbil cye ex tu'n tajben te onbil cye tu'n tel cynic' cyi'j ke yol nim cynabl;

³ tu'n tcnet jun xnak'tzbil cyu'n, tu'n tel cynic' ti'j jun ti'xti ka ba'n ta', tu'n tten cynabl tu'n cybinchante aju tz'aklxix, tu'n cybet tuj tumelxix ex tu'n cyten cabal;

⁴ tu'n toc cynabl ke cu'xun ch'in cynabl, ex tu'n t-xi k'ot cynabl tu'ntzun cyel twitz jun ti'xti tu'n tbinchet cyu'n, ex tu'n cyximan ti'j alcye ba'n tu'n tbant cyu'n.

⁵ Aju xjal at tnabl ex list in cub tk'o'n twi' cyi'j ke yol ba'n, tu'ntzun jlu nno'c mastl tnabl ex tojtzkibl

⁶ tu'n tel tnic' ti'j ju in cyma'n ke xjal aj nabl, ti'j cyyol ex cyi'j ke techal in cybincha'n, ex tu'n tel cynic' cyi'j ke yol in che na'n aj nabl cyi'j.

⁷ Aju tumel tu'n tten tojtzkibl xjal, atzun tu'n t-xob twitz Kman ex tu'n tniman te, pero ke xjal miban che bin nne'l cyic'un aju ojtzkibl ex xnak'tzbil.

Ke consej cye cu'xun

⁸ Nc'wa'l, k'onx twi'ya ti'j xnak'tzbil in tk'o'n tmana, ex mi'n tzic' tna'l tu'na aju xnak'tzbil in tk'o'n ttxu'ya,

⁹ porque a jlu c'oquel te teya ic tza'n jun tbanil adorn ex ic tza'n jun uwj, ex ka ic tza'n jun coron tjax tuj twi'ya.

¹⁰ Nc'wa'l, ka cyaj ke xjal aj il tu'n tcub sbu'na cyu'n, mi'n txi tk'o'na ambil cye.

¹¹ Balo oc cyma' teya: Ko' kuc'ile, ko xk'ukil ti'j jun xjal minti' til tu'n tcub ku'n oc tic' tuj be;

¹² ke xjal ba'n cymod bi'x che najel ku'n te jumajx, ic tza'n in che naj xjal tu'n camic; enter ke in che cu'pun tuj cynajbil cyimni.

¹³ Cnetel tcyakil txcaj k'inumabl ku'n ex cbajel noj tuj kja tu'n tcyakilju c'elel kelk'a'n.

¹⁴ Tzaja kuc'ile, ko ten junx, ex junx e tajben kpwak, che chilo teya.

¹⁵ Nc'wa'l, mi'n txi'ya cyuc'il ke xjal lu, pa'n el tiba ti'j be mya ba'n k'i'n cyu'n,

¹⁶ porque toc tilil cyu'n tu'n cybinchante mya ba'n, ex toc tilil tu'n cycub ke xjal cyu'n.

¹⁷ Nok gan in cub k'ot c'obil ka in che que'yin chyu'j ti'j.

¹⁸ Ke xjal lu cyi'jx in cub cyk'o'n tramp ex in xi cyk'on cyib tuj xobajil.

¹⁹ Tu'nxju in pon cyc'u'j ti'j in che naj; atzun bajsbil cye xjal jlu, akeju in pon cyc'u'j ti'j tu'n cyelk'a'n.

Jun txocbil tu'nju k'ol nabl

²⁰ Cyuj ke cay ex cyuj plas in binjtz tk'ajk'ajel twi' ju k'ol nabl,

²¹ in xi tma'n tyol ttzi tpwertil tnam ex cyuj ke lugar jatum in che chmet xjal, chi in tma'n:

²² Akeye cu'xun minti' cynable, ba'n che xmayine ex miban che bine: ¿Jtoj ban tcyaj cycoline tu'n cytene minti' cynable? ¿Jtoj ban tcyaj cycoline aju tzalajbil tuj cywitze tu'n cyxmayine cyi'j cyuc'ile? ¿Maj cucx c'elel cyic'une aju ojtzkibl?

²³ Cyk'ontz cywi'ye ti'j ju in che oc nmayo'ne ti'j ex jacu txi nk'o'ne cynable; cxel nma'ne cyeye alcye nximbetze.

²⁴ O che tzaj ntxco'ne tu'n cytzaje wuc'ile, pero minti' ma chinx cynimane.

²⁵ Nokpe ma tz'el cyic'une nconseje ex minti' cyaje tu'n cyoc nmayo'ne.

²⁶ Cyja'tzun cpol tk'ijlalil tu'n woc tene tze'l cyi'je oc ttzaj mya ba'n cyibaje; oc chin xmayile cyi'je oc ttzaj nim xobajil cyi'je,

²⁷ ex oc ttzaj xobajil cyibaje tuc'ix yajbil ex bis, a jlu mer ic tza'n jun xcyakinpaẍ in baj naj tcyakil tu'n.

²⁸ Atzun k'ij lu oc che txoquele wi'je, pero mlay che tzaj ntzak'we'ne; oc che jyole wi'je, pero mlay chin cnete cyu'ne;

²⁹ porque nne'l cyic'une aju ojtzkibl ex mi'n cyaje tu'n cynimane Kman.

³⁰ Minti' cyaje tu'n t-xi cybi'ne nconseje ex minti' in cub tuj cywitze tu'n cyoc nmayo'ne.

³¹ C'ic'ex nim cyu'ne tu'n tlaj cymodiye mya ba'n. Bi'x cjawitz baj cyganiye ti'j cyximbetze mya ba'n.

³² Keju minti' cynabl in che naj tu'nju atx taj cynabl, ex keju miban che niman in che naj tu'nju minti' cyaj ti'j tu'n cybinchante jun ti'xti;

³³ atzunju xjal ma tzaj tk'o'n twi' ti'j nyole, oc c'ank'il tuj tzalajbil ex mlayx tzaj t-xobil twitz nok alcye tzul ti'j.