Números 9 - Mam de Huehuetenango Bible

Tu'n tic'set Xjan K'ij

¹ Tuj tnejel xjaw te tcabin abk'i cyetzlen aj Israel tuj Ejipt, tzaj yolin Kman tuc'il Moisés tuj tzkij tx'otx' t-xe witz Sinaí ex tma:

² Il ti'j tu'n tcub cyic'sa'n aj Israel Xjan K'ij tujxix tk'ijlalil.

³ Ctzyetel cyu'n te kale tuj cyajlaj tajlal xjaw lu, ic tza'nx banimaj ti'j, ex tu'n tbant tcyakil ti'j ic tza'nx in cyma'n ke xnak'tzbil ex ke ley o txi nma'ne teya, chi Kman te Moisés.

⁴ Xitzun tma'n Moisés cye aj Israel tu'n tcub cyic'sa'n Xjan K'ij,

⁵ ex cub cyic'sa'n te kale tuj cyajlaj tajlal tnejel xjaw, tuj tzkij tx'otx' t-xe witz Sinaí. Binchet tcyakil cyu'n ic tza'nx otok tma Kman te Moisés.

⁶ Pero ate'tok junjun xinak otok baj cytz'ilsan cyib tu'nju otok tz'oc cymaco'n jun cyimni, ex cyja'tzun minti' tumel tu'n tcub cyic'san Xjan K'ij tujx k'ij lu. E je'xtzun tuc'il Moisés ex Aarón tujx k'ij lu,

⁷ ex xi cyma'n cyja': —Tz'il ko'ye tu'nju ma tz'oc kmaco'ne jun cyimni. ¿Maj mi'ntzun txi kk'o'ne koyaje te Kman tuj k'ij lu junx cyuc'il mastl aj Israel?

⁸ Atzunte Moisés xi ttzak'we'n: —Che ayone nej alcye ctzajel tma'n Kman cyi'je.

⁹ Tzaj yolin Kman tuc'il Moisés ex tma:

¹⁰ K'manxa cye aj Israel jlu: Ka at junjun cyeye ex ka junjun cyiyjile, tz'il ate' tu'nju otok tz'oc cymaco'n jun cyimni, ex ka mi a'l tu'nju ate' tuj jun cybe najchak,

¹¹ ba'n tu'n tcub cyic'sa'n Xjan K'ij te kale tuj tcyajlajin tajlal tcabin xjaw. Cxel cychyo'n tal tman ẍne'l tuc'il itzaj c'a ex pan minti' t-samel tuj tu'n tjaw mal tc'u'j,

¹² ex mi'n cyaj cyk'o'n ch'in chibj te juntl k'ij ex mi jun tbakil cbel cytokin. Cbel cyic'sa'n Xjan K'ij lu ic tza'nx tcyakil ley o txi nma'ne.

¹³ Katzun at jun xjal mya ttz'ilsan tib ex ax ta' tuj tja ex minti' ma cub tic'sa'n Xjan K'ij, c'elex lajet xjal lu, tu'ntzun mi'n ttentl cyxol t-xjalil, tu'nju minti' otok tzaj tk'o'n toyaj weye tuj k'ij banimaj ti'j. At til xjal ti'j jlu.

¹⁴ Katzun at jun stranjer xjal najl cyxole taj tu'n tcub tic'sa'n Xjan K'ij te nimbil weye, il ti'j tu'n tcub tic'sa'n ic tza'nx tcyakil xnak'tzbil ex ley o txi nma'ne. Ax ley ctel cyxol stranjer xjal ic tza'nx cye aj Israel.

Cub ten muj tibaj ja xbalun te mojbabl tibil

¹⁵ Tuj k'ij tej tjaw bincha'n ja xbalun te mojbabl tibil, bi'x o cub ten muj tlugaril jatum tcub cax c'ubl tley Dios. Oc koc yupj, aju muj nno'c que'yin ic tza'n k'ak', ex cucx tten oc tjawil k'ij.

¹⁶ Cucx o ten tcyakil maj icju; te k'ijl in cub ten muj tibaj tja Dios, ex te konic'an nno'c que'yin muj ic tza'n k'ak'.

¹⁷ Ex octzun tjaw lak'e' muj tibaj ja xbalun te mojbabl tibil in che ic'tzun lak'e' aj Israel, ex jatum in we' muj, axtzun in che cub ten aj Israel.

¹⁸ Ocxi ttzaj tma'n Kman tu'n cyic' lak'e' aj Israel, in che ic'tzun, ex oc ttzaj tma'n jatum tu'n cywe', axtzun in che we'. Nok jte' k'ij in cub ten muj tibaj ja xbalun te mojbabl tibil, ax icx cye aj Israel axtzun in che cub ten.

¹⁹ Ex oc twe' muj nim k'ij tibaj ja xbalun te mojbabl tibil, ax icx cye aj Israel in xi cyniman tyol Kman, ex axtzun in che cub ten.

²⁰ Ex at maj nic'xi k'ij in we' muj tibaj ja xbalun te mojbabl tibil. Ax Kman in k'mante cye tu'n cywe', ex ax in k'mante tu'n cyic' lak'e'.

²¹ At maj o'cx jun konic'an in we' muj, atzunte prim in jaw lak'e' ex in cubtzun be cyu'n aj Israel. Ka k'ijl ex ka konic'an, oc tjaw lak'e' muj in che ic'tzun lak'e'.

²² Katzun cabe k'ij, ka jun xjaw ex ka jun abk'i ma cub ten muj tibaj ja xbalun te mojbabl tibil, ax icx cye aj Israel ax in che ten ex minti' in che ic' lak'e'. Pero octzun tjaw lak'e' muj, in cubtzun be cyu'n.

²³ Ocxi ttzaj tma'n Kman tu'n cycub ten tuj jun lugar, axtzun in che cub ten, ex ocxi ttzaj tma'n Kman tu'n cyic' lak'e', in che ic'tzun lak'e'. Xi cyniman tyol Kman ic tza'nx otok tzaj tma'n Kman te Moisés.