Números 8 - Mam de Huehuetenango Bible

Tza'n tten tu'n cytxaket ke candil

¹ Tzaj yolin Kman tuc'il Moisés ex tma:

² K'manxa te Aarón cyja': Oc cyoc ttxako'n ke wuk candil, ba'n tu'n t-xi tbincha'n cyten tu'n t-xi' cyspic'umal cywitzx.

³ O tbincha Aarón ic tza'nx otok tma Kman te Moisés, oc ttxako'n ke candil tu'n t-xi' cyspic'umal cywitzx.

⁴ Aju tcubl candil lu k'an pwak ttx'otx'il, tx'ino'n tu'n martiy tzajnix ke' max t-xe' ex ponin baj max tuj twi'. O tbincha Moisés ic tza'nx binchben te otok tzaj tma'n Kman.

Aju xjansabl cye aj Leví

⁵ Tzaj yolin Kman tuc'il Moisés ex tma:

⁶ Pa'n ela ke aj Leví cyi'j aj Israel ex saksa'n baja ke.

⁷ Atzun jlu cbantel tu'na tu'n cysakset: C'oquel tchituna a' te saksabl cyi'j, c'elel cyi'n xya'n ti'j tcyakil cyximlal tu'n jun navaj ex cjawitz cytx'jo'n ti'j cyxbalun; cyja'tzun tten che saksetel.

⁸ Ctzajel cyi'n jun tal tor tuc'ix ch'in arin tbanil xyok'imaj tuc'il aseyt te oyaj ti'j twitz awal, ex ctzajel ti'na juntl tal tor te chojbil il.

⁹ Che tzajel ti'na ke aj Leví tu'n cyul lak'e' twitz ja xbalun te mojbabl tibil, ex che oquel tchmo'na cycyakil aj Israel.

¹⁰ Octzun cytzaj ti'na aj Leví nwitze, cbel cyk'o'n aj Israel cyk'ab tibaj cywi'.

¹¹ Che tzajel tk'o'n Aarón ke aj Leví weye te jun oyaj te cyxel aj Israel, tu'ntzun cyajben aj Leví o'cx weye.

¹² Te tibajxi cbel cyk'o'n aj Leví cyk'ab tibaj cywi' ke tal tor; cxeltzun k'ot jun tal tor te chojbil il, atzun juntl cxel k'ot te jun chojbil patun in cub nwitze tu'n tnajset cyil aj Leví.

¹³ Che beltzun tk'o'na aj Leví twitz Aarón ex cywitz ke tcy'ajal, ex che tzajel tk'o'na te jun oyaj weye;

¹⁴ cyja'tzun tten che elel tpa'na aj Leví cyxol aj Israel tu'ntzun cyoc te weye.

¹⁵ Te tibajxi ba'ntzun tu'n cytzaj tuj ja xbalun te mojbabl tibil tu'n cyajben weye. Tnejel che bajel t-saksa'na ex che tzajel tk'o'na te weye ic tza'n jun oyaj,

¹⁶ porque cyxol cycyakil aj Israel ma che oc aj Leví te weye. Ma che nc'ame ke te cyxel cycyakil nej cycy'ajal aj Israel.

¹⁷ Porque weye cycyakil nej cycy'ajal aj Israel, ax icx nej cyal alumaj. Tej cycyim ke nej cycy'ajal aj Ejipt wu'ne, bi'xtzun e je'l npa'ne ke nej cycy'ajal aj Israel tu'n cyoc te weye.

¹⁸ Pero te cyxeltzun ke nej cycy'ajal aj Israel, ma che oc ke aj Leví te weye,

¹⁹ ex e je'x nk'o'ne ke tuj tcwent Aarón ex tuj cycwent ke tcy'ajal, tu'ntzun cyajben tuj ja xbalun te mojbabl tibil te cyxel aj Israel, ex tu'n tchjet cyil aj Israel cyu'n, tu'ntzun mi'n ttzaj jun castiw cyibaj aj Israel oc cypon lak'e' twitz njaye, chi Kman te Moisés.

²⁰ Cybinchatzun Moisés, tuc'ix Aarón, cyuc'ix cycyakil tnam xjal cyi'j aj Leví ic tza'nx otok tma Kman te Moisés.

²¹ Bajtzun cysaksan cyib aj Leví ex jatz cytx'jo'n ti'j cyxbalun, e je'xtzun k'o'n tu'n Aarón te jun oyaj te Kman ex xi tk'o'n Aarón chojbil cyil tu'n cysakset.

²² Tbajlenxitzun tcyakil jlu, e ocxtzun aj Leví tu'n cyak'nan twitz ja xbalun te mojbabl tibil, ex a Aarón ex ke tcy'ajal e tzaj k'mante cyak'un. Cybinchatzun cyi'j aj Leví ic tza'nx otok tzaj tma'n Kman te Moisés.

Jte' abk'i tu'n cyajben aj Leví

²³ Tzaj yolin Kman tuc'il Moisés ex tma:

²⁴ Ctzyetel cyak'nan aj Leví tuj ja xbalun te mojbabl tibil oc tjapun 25 abk'i cyu'n,

²⁵ ex che elel k'it ti'j cyak'un ocxi cyjapun twi' 50 abk'i.

²⁶ Te tibajxi jlu, o'cx che ajbel tu'n cyonin cyi'j cyerman twitz ja xbalun te mojbabl tibil, tu'n cycwentin cyi'j ke ti'xti, pero mlay che ak'nan ic tza'n nej. Cyja'tzun che tembil aj Leví tuj cyak'un tu'na.