Números 30 - Mam de Huehuetenango Bible

Aju ley cyi'j ke yol in che'x tziyet

¹ Xi tma'n Moisés cye nejenel cye cycyakil c'loj cyiyjil aj Israel cyja': Atzun jlu in tma'n Kman:

² Ka at jun xjal ma tzaj ttziyan jun tyol weye, ka tu'n tbant jun ti'xti tu'n, ex ka tu'n mi'n tbant jun ti'xti tu'n, il ti'j tu'n tjapun tyol ex tu'n tbinchante tcyakil aju otok tzaj ttziyan.

³ Ka at jun k'apoj ax ta' tuj tja tman ma tzaj ttziyan jun tyol weye, ka tu'n tbant jun ti'xti tu'n ex ka tu'n mi'n tbant jun ti'xti tu'n,

⁴ ka ma tbi tman aju yol otok tzaj ttziyan weye ex ka juntl ti'xti otok txi ttziyan, ex ka minti' ma k'ajt tman tu'n tlaj jlu, iltzun ti'j tu'n tjapun tu'n k'apoj aju yol otok tzaj ttziyan weye, ex ka juntl ti'xti otok txi ttziyan.

⁵ Katzun minti' ma txi k'o'n ambil te tu'n tman tu'n tjapun tu'n aju otok txi ttziyan, myatzun il ti'j tu'n tjapun tu'n aju yol otok tzaj ttziyan weye, ex ka juntl ti'xti otok txi ttziyan. Mlaytzun tz'oc nk'o'ne il ti'j tu'n tjapun tu'n, tu'nju minti' otok txi k'o'n ambil te tu'n tman.

⁶ Ka at jun xu'j ma moje' tuc'il tchmil ex na'nxtok tjapun tu'n aju yol otok tzaj ttziyan weye, ex ka juntl ti'xti otok txi ttziyan,

⁷ ka ma tbi tchmil aju yol tziyimaj tu'n ex ka minti' ma k'ajt tu'n tlaj jlu, iltzun ti'j tu'n tjapun tu'n xu'j aju yol otok tzaj ttziyan weye, ex ka nok alcyexcu yol otok txi ttziyan.

⁸ Katzun minti' ma txi k'o'n ambil te tu'n tchmil tu'n tjapun tu'n aju yol otok txi ttziyan, myatzun il ti'j tu'n tjapun tu'n aju yol otok tzaj ttziyan weye, ex ka nok alcyexcu yol otok txi ttziyan. Ex mlaytzun tz'oc nk'o'ne il ti'j tu'n tjapun tu'n.

⁹ Katzun otok cyim tchmil xu'j, ex ka nok otok cub tpa'n tib tuc'il tchmil, aju ctzajel ttziyan jun yol weye, il ti'j tu'n tjapun tu'n tcyakilju otok tzaj ttziyan.

¹⁰ Katzun mejebni xu'j ctzajel tziyante jun yol tu'n tbant jun ti'xti tu'n,

¹¹ katzun ma tbi tchmil ex minti' ma k'ajt tu'n tlaj jlu, iltzun ti'j tu'n tjapun tu'n xu'j aju yol otok tzaj ttziyan weye, ex ka nok alcyexcu yol otok txi ttziyan.

¹² Katzun ma tbi tchmil ex ka minti' ma tzaj tk'o'n ambil te tu'n tjapun tu'n aju yol otok txi ttziyan, myatzun il ti'j tu'n tjapun tu'n xu'j, tu'nju otok cub tk'uchin tchmil aju yol tziyimaj tu'n. Mlay tz'oc nk'o'ne il ti'j tu'n tjapun tu'n.

¹³ Jacu txi tcyuwsa'n chmilbaj ex jacu cub tk'uchin nok alcyex jun yol otok txi ttziyan t-xu'jil tu'n tjapun tu'n ex ka tu'n mi'n tjapun tu'n.

¹⁴ Katzun ma tbi chmilbaj ex minti' ma k'ajt tu'n tlaj jlu tbajlenxi jun k'ij ex ka cabe, che cyuwsetel ke yol otok che'x ttziyan t-xu'jil, tu'nju minti' otok k'ajt tchmil.

¹⁵ Katzun ma cub tk'uchin chmilbaj ex otok tz'el k'ij tbintlen, atzunte chmilbaj at til ti'j ju minti' otok japun tu'n t-xu'jil.

¹⁶ Atzun ke ley lu tzaj tma'n Kman te Moisés tu'n tajben te xinak tuc'il t-xu'jil, ex tu'n tajben te mambaj tuc'il tme'jel oc matok k'apojx ex ka axtok ta' tja tman.