Números 29 - Mam de Huehuetenango Bible

Aju nink'ij tu'n cyk'ajt chun

¹ Tuj tnejel k'ij te twukin xjaw c'oquel jun buyj tibil xjan cyu'ne. Mi jun ba'n tu'n tak'nan tuj k'ij lu. Atzun k'ij tu'n cyoc k'ajtzet ke chun.

² Tujx k'ij lu cbel cypatune jun tal tor, jun tman ẍne'l ex wuk tal tman ẍne'l ma te jun abk'i ke, te jun oyaj at tc'oc'jal in chin tzalaje ti'j, ex cycyakil ke jlu minti' cypaltil.

³ Cyi'j ke chojbil lu ctzajel cyk'o'ne arin xyok'imaj tuc'il aseyt: Ti'j tal tor kak libr, ti'j tman ẍne'l cyaje libr,

⁴ ex ti'j junjun tal tman ẍne'l cabe libr.

⁵ Ax icx ctzajel cyk'o'ne jun tman chip te chojbil cyile,

⁶ ex part ke oyaj in che cub patit teyle junjun xjaw, ex part ke chojbil in che cub patit tcyakil k'ij, tuc'ix oyaj ti'j twitz awal ex ta'l twitz uva in xi k'ot cyi'j ic tza'nx in tma'n ley. Tcyakil jlu jun oyaj te weye patun in cub at tc'oc'jal in chin tzalaje ti'j.

Ke oyaj tu'n cyxi k'ot tuj k'ij oc tnajset cyil xjal

⁷ Tuj laj tajlal tex twukin xjaw ax icx c'oquel jun buyj tibil xjan cyu'ne. Tuj k'ij lu cbel cyyo'ne we'yaj, ex mi jun ba'n tu'n tak'nan.

⁸ Cbel cypatune jun tal tor, jun tman ẍne'l, ex wuk tal tman ẍne'l ma te jun abk'i ke, te jun oyaj at tc'oc'jal in chin tzalaje ti'j, ex cycyakil ke jlu minti' cypaltil.

⁹ Cyi'j ke chojbil lu ctzajel cyk'o'ne arin xyok'imaj tuc'il aseyt: Ti'j tal tor kak libr, ti'j tman ẍne'l cyaje libr,

¹⁰ ex ti'j junjun tal tman ẍne'l cabe libr.

¹¹ Ax icx ctzajel cyk'o'ne jun tman chip te chojbil cyile, ex part ke chojbil ctzajel cyk'o'ne tu'n tnajset cyile tuj k'ij te najsbil il, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j.

Ke oyaj tu'n cyxi k'ot tuj nink'ij oc cyjaw binchet tal ja t-xak tze'yin cywi'

¹² Tuj olaj tajlal twukin xjaw c'oquel jun buyj tibil xjan cyu'ne. Mi jun ba'n tu'n tak'nan tuj k'ij lu. Wuk k'ij cbel cyic'sa'ne nink'ij te nimbil weye.

¹³ Tuj tnejel k'ij ctzajel cyk'o'ne weye oxlaj tal tor, cabe tman ẍne'l, ex cyajlaj tal tman ẍne'l ma te jun abk'i ke, te chojbil patun in cub at tc'oc'jal in chin tzalaje ti'j. Cycyakil ke jlu minti' cypaltil.

¹⁴ Cyi'j ke chojbil lu ctzajel cyk'o'ne arin xyok'imaj tuc'il aseyt: Ti'j junjun tal tor kak libr, ti'j junjun tman ẍne'l cyaje libr,

¹⁵ ex ti'j junjun tal tman ẍne'l cabe libr.

¹⁶ Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j.

¹⁷ Tuj tcabin k'ij ctzajel cyk'o'ne cablaj tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil.

¹⁸ Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley.

¹⁹ Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j.

²⁰ Tuj toxin k'ij ctzajel cyk'one junlaj tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil.

²¹ Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley.

²² Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j.

²³ Tuj tcyajin k'ij ctzajel cyk'o'ne laj tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil.

²⁴ Ax icx ctzajel cyk'o'ne ke oyaj twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'n in tma'n ley.

²⁵ Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j.

²⁶ Tuj tjwe'yin k'ij ctzajel cyk'o'ne belaj tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil.

²⁷ Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley.

²⁸ Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j.

²⁹ Tuj tkakin k'ij ctzajel cyk'o'ne wajxak tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil.

³⁰ Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley.

³¹ Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j.

³² Tuj twukin k'ij ctzajel cyk'o'ne wuk tal tor, cabe tman ẍne'l, ex cyajlaj tal tman ẍne'l ma te jun abk'i ke, ex cycyakil ke jlu minti' cypaltil.

³³ Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley.

³⁴ Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j.

³⁵ Tuj twajxakin k'ij c'oquel jun buyj tibil xjan cyu'ne. Mi jun ba'n tak'nan tuj k'ij lu.

³⁶ Ctzajel cyk'o'ne weye jun tal tor, jun tman ẍne'l, ex wuk tal tman ẍne'l ma te jun abk'i ke, te jun chojbil patun in cub at tc'oc'jal in chin tzalaje ti'j, ex cycyakil ke jlu minti' cypaltil.

³⁷ Ax icx ctzajel cyk'o'ne ke oyaj ti'j twitz awal ex ta'l twitz uva cyi'j, ic tza'nx cyajlal tal tor, ke tman ẍne'l, ex ke tal tman ẍne'l, ic tza'nx in tma'n ley.

³⁸ Ax icx ctzajel cyk'o'ne jun tman chip te chojbil cyile, ex part ke chojbil patun in che cub tcyakil k'ij tuc'ix oyaj ti'j twitz awal ex ta'l twitz uva in xi k'ot cyi'j.

³⁹ Atzun ke chojbil lu ctzajel cyk'o'ne weye cyuj ke nink'ij banimaj cyi'j, ex part cyoyaje ctzajel cyk'o'ne oc tjapun jun cyyole otok tzaj cytziyane weye, ex ke cyoyaje tu'n cyexe cygan ctzajel cyk'o'ne; ka jun chojbil patun in cub, ka jun oyaj ti'j twitz awal, ka jun oyaj ti'j ta'l twitz uva, ex ka jun oyaj te mojbabl tibil, chi Kman te Moisés.

⁴⁰ Atzunte Moisés xi tma'n cye aj Israel tcyakil aju otok tma Kman te.