Números 25 - Mam de Huehuetenango Bible

E c'ulun aj Israel twitz tilbilal Baal-peor

¹ Tej cyten aj Israel tuj lugar Sitim, e oc ten ke xinak yaẍil cyuc'il ke xu'j aj Moab,

² atzun ke xu'j lu e je'x txconte cye tu'n cyxi' cyuc'il oc t-xi cyk'o'n chojbil cye cydios. Atzun cye aj Israel ajun ke e wa'n ti'j ju wabj lu, ex e oc ten c'ulul cywitz cydios aj Moab;

³ cyja'tzun tten e oc ten aj Israel c'ulul twitz tilbilal Baal-peor. Tzaj nimxix ttx'u'jil Kman cyi'j aj Israel,

⁴ ex xi tma'n te Moisés cyja': —Chmon oca cycyakil nejenel cye tnam xjal, ex che tyoban jawa ke cywitz cycyakil xjal, tu'ntzun tchewix nk'oje cyi'j aj Israel, chi Kman.

⁵ Xitzun tma'n Moisés cye keju cyoc te jwes cyxol aj Israel: —Teyle junjun cyeye ba'n tu'n tcub cybyo'ne ke xinak ax cyiyjile, akeju ma che oc lpe' tu'n cyc'ulun twitz tilbilal Baal-peor.

⁶ At jun aj Israel pon ti'n jun xu'j aj Madián max tja, ex twitz Moisés ex cywitz cycyakil aj Israel tbincha jlu, tej matok in che ok' aj Israel ttzi ja xbalun te mojbabl tibil.

⁷ Atzunte Finees aju tcy'ajal Eleazar ex tal tchman pal Aarón, tej ttil jlu jaw we' cyxol aj Israel, xi ti'n jun lans,

⁸ ex xi lpe' ti'j xinak aj Israel tejxi tpon max tuj tja. Atzun xi t-xayu'n lans tuj cyc'u'j, tza'nx te xinak aj Israel, ax icx te xu'j aj Madián. Cyja'tzun tten o we' tx'u'j yabil, aju in che naj aj Israel tu'n,

⁹ pero otok che cyimxe 24,000 aj Israel.

¹⁰ Tzajtzun yolin Kman tuc'il Moisés ex tma:

¹¹ —Tu'n Finees ma chewix nk'oje cyi'j aj Israel, porque icx te tmod ic tza'n weye, minti' in cub tuj twitz tu'n cyc'ulun aj Israel twitz junxitl dios. Tu'ntzun jlu ma we' nk'oje cyi'j aj Israel.

¹² Cyja'tzun k'manxa te Finees: Cyjel bant ti'j jun nyole te tzalajbil tuc'il.

¹³ Te jumajx cxel nk'o'ne te ex cye tiyjil aju oclenj te pal, porque ma tzaj ta'w tuj tanmi tu'n tlaj mya ba'n in cybincha'n xjal nwitze; ex tu'nju ba'n ma tbincha, ma cub nnajsa'ne cyil aj Israel, chi Kman.

¹⁴ Zimri tbi aju xinak aj Israel xi xayu'n lans tuj tc'u'j junx tuc'il xu'j aj Madián; tcy'ajal Salu jlu ex atok toc te nejenel cye jun c'loj tiyjil Simeón.

¹⁵ Atzunju xu'j aj Madián Cozbi tbi ex tme'jel Zur, aju nejenel cye jun c'loj cyiyjil aj Madián.

¹⁶ Tzaj yolin Kman tuc'il Moisés ex tma:

¹⁷ —Cyoc tzokpaje cyi'j aj Madián ex cybyon cube ke,

¹⁸ tu'nju o cyajbe tu'n tcub cyi'je cyu'n tu'n sbubl, ex o cybincha tu'n cyc'ulune twitz tilbilal Baal-peor, ic tza'n o tbincha Cozbi aju tme'jel jun nejenel cye aj Madián, aju cyim tu'n lans tej ttzaj nsama'ne tx'u'j yabil cyibaj aj Israel tu'n tlaj e c'ulun twitz tilbilal Baal-peor, chi Kman.