Números 24 - Mam de Huehuetenango Bible

Toxin yol tma Balaam

¹ Tej otok tz'el tnic' Balaam ti'j ka ba'n otok tz'ela tuj twitz Kman tu'n cycub cy'iwlet aj Israel, ya minti' oc ten k'ijal ic tza'n otok tbincha junjun maj, nok o'cx cyja' xi tque'yin tumlal tzkij tx'otx'.

² Tej ttil Balaam ke aj Israel tuj c'lojintok cyten ic tza'nx cyiyjil, ul T-xew Dios tuc'il,

³ ex xi tma'n Balaam ke yol lu: Atzun tkanil jlu tu'n Balaam aju tcy'ajal Beor, aju xinak nne'l tnic' ti'j tcyakil,

⁴ aju in tbi'n tkanil in tzaj tma'n Dios te, in cub tz'ak twitz tx'otx' ex in til aju in tzaj tyec'un Dios te, aju at tipumal tu'n tbant tcyakil tu'n, ex nne'l tnic' ti'j.

⁵ Akeye tiyjil Jacob, tbanilxix che que'yin ke cyjaye, xbalun ja; tbanilxix che que'yin cynajbile, akeye aj Israel.

⁶ Ic che que'yin ic tza'n ke chk'ajlaj matij, ic tza'n cykan awal ttzi nima, ic tza'n cykan áloes awa'n tu'n Kman, ex ka ic tza'n cykan wi'ten ttzi a'.

⁷ Ctel nim a' te cyc'a aj Israel ex te a'lbil cyawal, mas nim tipumal cyrey ctel ic tza'n te Agag, ex c'oquel tcawbil te ma'xix.

⁸ Ate Dios etz k'inte cye tuj Ejipt; at nim cyipun ic tza'n wacẍ te tjak' c'ul. Che najel ke nasyon cyu'n akeju in che k'ojin cyi'j. Che najel aj k'oj cyu'n aj Israel, cbajel cytokin cybakil ex che bajel cyc'ixbisa'n tu'n plech.

⁹ Ic cyten aj Israel ic tza'n jun balun ex ic tza'n jun ttxu balun oc tcub tan, mi a'l jun ba'n tjaw c'asunte te. Akeye aj Israel, cy'iwla'nxwit aju cbel cy'iwlante cyeye, ex tzajxwit mya ba'n cyibaj keju in che kanin mya ba'n cyibaje, chi Balaam.

¹⁰ Tejtzun tbinte Balac jlu, tzaj nim tk'oj ti'j Balaam, oc ten tz'ajil tk'ab tu'n tk'oj ex tma: —Ma tzaj ntxco'na tu'n t-xi tkanina mya ba'n cyibaj wajk'oje, atzun ja'lo ma bant-xi ox maj ma che cub tcy'iwla'na.

¹¹ Taja tjaya; nej otok txi ntziyane teya tu'n t-xi nk'o'ne nimbil teya, pero minti' ma tak' Dios ambil tu'n t-xi nk'o'ne nimbil teya, chi Balac.

¹² Atzunte Balaam xi ttzak'we'n: —Bi'x xi nma'ne cye t-sanjela akeju e pon t-sama'na wuc'ile, nchiye cyja':

¹³ masque tzaj tk'o'n Balac tcyakil k'an pwak ex sak pwak at tuj tja, mlay bant tu'n wic'e tibaj yol ctzajel tma'n Kman weye, misicyer tu'n nbinchanteye jun ba'n ex ka mya ba'n wu'nx wibe; nok o'cx tu'n t-xi nma'ne aju tzul tma'n Kman weye.

¹⁴ Weye chin ajele tuj ntanmiye, pero na'nxtok waje, cxel nma'ne teya aju cbantel cyu'n tnam xjal lu cyi'j ke ttanmila tuj tk'ijlalil tzul.

Tcyajin yol tma Balaam

¹⁵ Octzun ten Balaam k'malte ju yol tzaj k'ma'n te tu'n Dios, chi cyja': Atzun tkanil jlu tu'n Balaam aju tcy'ajal Beor, aju xinak nne'l tnic' ti'j tcyakil,

¹⁶ aju in tbi'n tkanil in tzaj tma'n Dios te, ex ojtzki'n tu'n aju ba'n tu'n Dios ma' t-xilen; in cub tz'ak twitz tx'otx' ex in til aju in tzaj tyec'un Dios te, aju Tajaw Tcyakil, ex nne'l tnic' ti'j.

¹⁷ Nne'l ch'in nnic'e ti'j aju cbajel tuj tk'ijlalil tzul, at jun in xi nque'yine, pero najchak ta'. At jun che'w cjawil jlet cyxol tiyjil Jacob, jun rey cjawil jlet cyxol aj Israel. Cbel tpach'u'n cywi' aj Moab ex che najel cycyakil tiyjil Set tu'n.

¹⁸ Cbel ti'j Edom tu'n, ex c'elel cytx'otx' aj Seir tu'n, aju aj k'oj ti'j. Atzun tnam Israel c'oquel nimxix tipun.

¹⁹ Cjawil jlet jun nejenel cyxol tiyjil Jacob ex che najel tu'n akeju otok che cyaj ten tuj tnam, chi Balaam.

²⁰ Ex o til Balaam aju tnam Amalec, ex xi tma'n aju yol tzaj k'ma'n te tu'n Dios, chi cyja': Ate Amalec jun tnam mas ma' toclen cywitz cycyakil mastl tnam, pero aju bajsbil te, cbel xitj te jumajx.

²¹ Ax icx o til ke aj Ceney, ex xi tma'n aju yol tzaj k'ma'n te tu'n Dios, chi cyja': Akeye aj Ceney, masque cyuwxix tten cyjaye, masque tocx cyjaye tuj pic,

²² pero il ti'j che bajel xitj, ex che xel k'i'ne pres cyu'n aj Asiria.

²³ Ax icx xi tma'n juntl yol tzaj k'ma'n te tu'n Dios: Ay ¿alcye jun cyjel ank'in oc tbant jlu tu'n Dios?

²⁴ Che tzajel ke barc ttzi mar te Chipre, ex cbajel xitj cytanmi aj Asiria ex cytanmi aj Heber cyu'n, pero ax icx cye che najel te jumajx, chi Balaam.

²⁵ Tbajlenxi jlu, cubtzun be tu'n Balaam ex aj tja. Ax icx te Balac xi ti'n tbe.