Números 23 - Mam de Huehuetenango Bible

¹ Xitzun tma'n Balaam te Balac: —Binchan baja wuk altar te patbil chojbil, ex byoncuya wuk tal tor ex wuk tman ẍne'l.

² Banttzun tu'n Balac ic tza'nx otok tma Balaam, ex cub cypatun jun tal tor ex jun tman ẍne'l tibaj teyle junjun altar.

³ Xi tma'n Balaam te Balac: —Tencja cytxlaj chojbil, atzun weye chin xe'le que'yilte ka ma tzaj Kman canul wi'je, ex jacutzun txi nma'ne teya aju tzul tyec'un weye. Xi'tzun Balaam twi' jun tz'la'j witz.

⁴ Cub tyec'un tib Dios twitz Balaam, ex tma Balaam cyja': —Ma jaw nbincha'ne wuk altar ex ma cub npatune jun tal tor ex jun tman ẍne'l tibaj teyle junjun altar.

⁵ Tzajtzun tma'n Kman te Balaam alcye tu'n t-xi tma'n ex tma: —Txi'ya jatum ta' Balac ex k'manxa te aju cxel nma'ne teya.

Tnejel yol tma Balaam

⁶ Ul meltz'aj Balaam jatum ta'tok Balac, ex lu Balac wa'ltok cytxlaj ke chojbil, cyuc'ix cycyakil nejenel cye aj Moab.

⁷ Xitzun tma'n Balaam aju yol lu: Max cywi witz tuj tjawitz k'ij ex max tuj Aram ma chin tzaj ti'n Balac aju rey cye aj Moab. Chitzun weye: Tzaja, kaninxa mya ba'n cyibaj aj Israel. Tzaj naja tu'n t-xi tkanina tu'n cynaj ke xjal tiyjil Jacob.

⁸ Pero ¿tza'n tten tu'n t-xi nkanine mya ba'n cyibaj keju minti' in tzaj tk'o'n Dios mya ba'n cyibaj? ¿Tza'n tten tu'n t-xi nkanine tu'n cynaj keju minti' ma tzaj tma'n Dios tu'n cynaj?

⁹ Max twi pic lu ma che wile, max cywi' ke tz'la'j witz lu ma che wile: Jun tnam xjal pa'maj, junxitl tmod ic tza'n txkantl xjal.

¹⁰ Ic cyajlal ic tza'n tkukil tx'otx'; ¿alcye jun jacu bant tajlante tcyajin part cybet? Nokwit ba'n ncyime ic tza'n ke xjal tz'aklxix, ex icwit bajsbil weye ic tza'n cye aj Israel, chi Balaam baj tma'n.

¹¹ Xitzun tma'n Balac te Balaam: —¿Ti ma tbinchaya wi'je? Ma tzaj wi'ne tu'n t-xi tkanina mya ba'n cyibaj wajk'oje, atzun teya ma tz'oc tena cy'iwlalte cye.

¹² Atzunte Balaam xi ttzak'we'n: —¿Myapetzun bi'x xi nma'ne teya ka o'cx tu'n t-xi nma'ne aju ctzajel tma'n Kman weye?

¹³ Xi tma'n juntl maj Balac: —Ko' wuc'ile tuj juntl lugar jatum o'cx ttxa'n tnam ctila'ya, ex mya tcyakil tnam ctila'ya. Kaninxa mya ba'n cyibaj max ma chixin.

¹⁴ Xitzun k'i'n Balaam tu'n Balac tuj chk'ajlaj Zofim tuj tiwitz tx'otx' twi witz Pisga; atzun jaw tbincha'n wuktl altar, ex cub tpatun jun tal tor ex jun tman ẍne'l tibaj teyle junjun altar.

¹⁵ Xi tma'n Balaam te Balac: —Tencja cytxlaj chojbil, atzun weye ma chinxe canul ti'j Dios ma chixin.

¹⁶ Etztzun Kman canul ti'j Balaam ex tzaj tma'n te alcye yol tu'n t-xi tma'n, ex chi cyja': —Txi'ya jatum ta' Balac ex k'manxa te aju cxel nma'ne teya.

¹⁷ Ul meltz'aj Balaam jatum ta'tok Balac wa'ltok cytxlaj ke chojbil, cyuc'ix ke nejenel cye aj Moab. Xi tkanin Balac te Balaam: —¿Alcye ma tma Kman teya?

Tcabin yol tma Balaam

¹⁸ Xitzun tma'n Balaam cyja': Aya Balac tcy'ajal Zipor, we'cuya ex chin tbintza.

¹⁹ Ate Dios mya ic tten ic tza'n jun xjal; minti' nnic'an yol ex misicyer in baj tch'expu'n t-ximbetz. Ka ma tma jun ti'xti tu'n tbant tu'n, in bant tu'n. Ka ma tzaj ttziyan jun yol, in japun tu'n.

²⁰ K'ma'maj weye tu'n cycub ncy'iwla'ne aj Israel. Ma che cub tcy'iwla'n Dios ex mlay bant tu'n tbaj nch'expu'ne.

²¹ Minti' jun sbubl o ilwaj ti'j tiyjil Jacob ex mi jun mya ba'n o ilwaj cyi'j aj Israel. Ate Cyman aju Cydios at cyuc'il, ex toc cyu'n te cyrey.

²² Ate Dios etz k'inte cye tuj Ejipt; at nim cyipun ic tza'n wacẍ te tjak' c'ul.

²³ Ka ma che oc cy'a'n tiyjil Jacob mlay che c'ixbisanjtz; ka ma che oc cy'a'n aj Israel cyu'n chman mlay che naj cyu'n. Ja'lo cxel k'met cyi'j aj Israel cyja': Cyque'yinxe nic'pun ma tbincha Dios cyi'j.

²⁴ Aju tnam lu ic tten ic tza'n jun balun in jaw we', mi jun jacu xcye' ti'j, mlay tz'ojlan ka na'nxtok tbaj tcanb ex ka na'nxtok tbaj tchc'el ju otok tzyet tu'n, chi Balaam.

²⁵ Xitzun tma'n Balac te Balaam: —Yaque minti'x in tzaj tkanina mya ba'n tibaj tnam lu, ax icx mi'n cub tcy'iwla'na.

²⁶ Xitzun ttzak'we'n Balaam: —¿Baka minti' xi nma'ne teya ka o'cx aju ctzajel tma'n Kman weye atzunju cbantel wu'ne?

²⁷ Xitzun tma'n Balac te Balaam: —Binchama xtalbil ko' wuc'ile tuj juntl lugar, kapelo ba'n jacu tz'ela tuj twitz Dios tu'n t-xi tkanina mya ba'n cyibaj aj Israel max ma chixin.

²⁸ Cyja'tzun tten xi uc'in Balaam tu'n Balac twi witz Peor, jatum k'ancha'lin tzkij tx'otx'.

²⁹ Xi tma'n Balaam te Balac: —Binchan jawa wuk altar tzalu ex byoncuya wuk tal tor ex wuk tman ẍne'l.

³⁰ Banttzun tu'n Balac ic tza'nx otok tma Balaam te, ex cub tpatun jun tal tor ex jun tman ẍne'l tibaj teyle junjun altar.