Números 22 - Mam de Huehuetenango Bible

Xi txocbaj Balaam tu'n Balac

¹ Xi cylajo'ntl cybe aj Israel, ex e ten tuj tchk'ajlajil tx'otx' Moab tcub ttzi nima Jordán tuj tjawitz k'ij, ex twitz tnam Jericó.

² Atzunte Balac aju tcy'ajal Zipor o til tcyakilju otok cybincha aj Israel cyi'j aj Amorrey.

³ Ax icx tzaj nimxix cyxobil ke xjal aj Moab tej cylonte nimxix cybet aj Israel, ex tzaj baj cyc'u'j tu'n cylaj aj Israel.

⁴ Cymatzun ke aj Moab cye ke tij xjal te Madián: —Cbajel naj ktx'otx' cyu'n cycyakil xjal lu ic tza'n in baj twa'n wacẍ c'ul tuj cojbil, che chi. Tuj tk'ijlalil lu toctok Balac te rey tuj Moab.

⁵ E je'x t-sama'n Balac ke t-sanjel txcolte Balaam aju tcy'ajal Beor; atzun ta'tok Balaam tuj Petor nikayin ttzi nima Éufrates tuj tx'otx' Amav. Xi tma'n Balac tu'n t-xi cyma'n te Balaam cyja': At jun tnam ma tzaj tuj Ejipt, ma txi t-sipan tib twitz tx'otx', ex ja'lo ma che cub ten nikayin nwitze.

⁶ Binchama xtalbil, tzaja wuc'ile ja'lo, kaninxa mya ba'n cyibaj ke xjal lu, porque mas at cyipun kwitze. Kapelo jacu cub cyi'j wu'ne icju tu'n cyex nlajo'ne tuj ntanmiye. Ba'n wu'ne akeju in che cub tcy'iwla'na, in cyc'mo'n cy'iwbil, ex akeju in xi tkanina mya ba'n cyibaj, in tzaj mya ba'n cyibaj, chi Balac, che chicuye.

⁷ E je'xtzun ke tij xjal te Moab, ax icx ke tij xjal te Madián, tuc'ix pwak xi cyi'n tu'ntzun tchjet Balaam tu'n t-xi tkanin mya ba'n cyibaj aj Israel. Tejtzun cypon jatum ta'tok Balaam, xi cyma'n aju yol otok tma Balac.

⁸ Atzunte Balaam xi tma'n cye: —Ax che tene tuj ak'bil lu, nchi'jxitzun txi ntzak'we'ne aju cykanbetze ic tza'nx ctzajel tma'n Kman weye, chi Balaam. Axtzun e cyaj ten ke tij xjal tuc'il Balaam, akeju nejenel cye aj Moab.

⁹ Cub tyec'un tib Dios twitz Balaam ex tzaj tkanin te: —¿Alcye ke xinak lu ate' tuc'ila?

¹⁰ Xi ttzak'we'n Balaam: —Ke xinak lu sama'n ke tu'n Balac aju tcy'ajal Zipor ex rey te Moab, ma che ul k'malte weye:

¹¹ At txkan xjal ma che etz tuj Ejipt ex ma baj cysipan cyib twitz tx'otx'. Ttzaj naja, chi Balac, tu'n t-xi tkanina mya ba'n cyibaj ke xjal lu. Kapelo jacu cub cyi'j wu'ne ex tu'n cyex nlajo'ne, chi Balac, che chi ke xjal weye.

¹² Xitzun tma'n Dios te Balaam: —Mi'n txi'ya cyuc'il ex mi'n txi tkanina mya ba'n cyibaj xjal lu, porque cy'iwla'n ke wu'ne.

¹³ Tejtzun tjaw we' Balaam tuj juntl k'ij, xi tma'n cye cytijil xjal akeju otok che tzaj t-sama'n Balac: —Cyaj meltz'aje tuj cytanmiye. Mi'n taj Dios tu'n nxi'ye cyuc'ile.

¹⁴ E ajtzun ke nejenel te Moab, e pon tuc'il Balac ex xi cyma'n te: —Minti' ma tcuya Balaam tu'n ttzaj kuc'ile.

¹⁵ Atzunte Balac xi t-sama'n mastl nejenel, mas nim cybet ex mas ma' ch'intl cyoclen cywitz keju e je'x nej.

¹⁶ E je'xtzun tuc'il Balaam ex xi cyma'n te: —At jun yol ma tzaj k'ma'n teya tu'n Balac aju tcy'ajal Zipor, chi cyja': Chin cubsale twitza, mi'n cub t-xc'ayin tiba tu'n ttzaja wuc'ile.

¹⁷ Jacu jaw nnimsa'na ex jacu bant wu'ne tcyakilju ctzajel tkanina weye; tzaja ex binchama xtalbil weye tu'n t-xi tkanina mya ba'n cyibaj xjal lu, chi Balac.

¹⁸ Xi ttzak'we'n Balaam: —Masque tzaj tk'o'n Balac tcyakil k'an pwak ex sak pwak at tuj tja, mlay chin ic'e tibaj ju yol ctzajel tma'n Dios weye, tu'n tbant jun ti'xti wu'ne ka matij ex ka ch'in.

¹⁹ Ja'lotzun ax icx cyeye ax che tencje wuc'ile te ju ak'bil lu, ex jacutzun wile ti ctzajel tma'ntl Dios weye, chi Balaam cye.

²⁰ Tuj ak'bil lu cub tyec'un tib Dios twitz Balaam ex tma: —Ka txcol teya ma che ul ke xinak lu, we'ctza ex txi'ya cyuc'il, pero o'cx cbantel tu'na aju cxel nma'ne teya.

Oc noj jun anjel twitz Balaam

²¹ Tej tjaw we' Balaam tuj juntl k'ij, oc tk'o'n t-siy tbur ex xi' cyuc'il ke nejenel cye aj Moab;

²² tjaxtok Balaam tibaj tbur, cyuc'ix cabe tmajen e je'x tuc'il. Tzajtzun ttx'u'jil Dios ti'j Balaam tu'nju otok txi' cyuc'il nejenel, ex cub ten t-anjel Dios tuj be tu'n tmaket tbe.

²³ Tejtzun tlonte bur aju t-anjel Dios tcubtok tuj tbe k'i'ntok jun spad tu'n, ic'x ttxlaj be; atzunte Balaam oc tjato'n tbur tu'n asyal tu'ntzun tmeltz'aj juntl maj tuj tbe.

²⁴ Cub we' juntl maj t-anjel Dios tuj be t-xol tkan uva, xi'ynitok tapya xak ttxlaj cycabil pac' be.

²⁵ Tejtzun tilwaj t-anjel Dios tu'n bur, oc tbetz'an tib twitz tapya, tuc'ix tkan Balaam oc betz'aj. Atzunte Balaam oc ten juntl maj jatol asyal ti'j tbur.

²⁶ Ic' nej t-anjel Dios cywitz, ex cub we' juntl maj tuj be mas ch'in tuj, ex minti' jatum tu'n kex ttxlaj be.

²⁷ Tej tlonte bur t-anjel Dios, cub bune' twitz tx'otx'. Tzajtzun tk'oj Balaam ex baj tpek'an tbur tu'n ttze'.

²⁸ Bant tyolin bur tu'n Dios ex xi tma'n te Balaam: —¿Ti ma nbinchaye ti'ja? Atzun toxmaji'n chin baj tasyalina.

²⁹ Xitzun ttzak'we'n Balaam te tbur: —In xmayina wi'je. Nokwit at jun spad tuj nk'abe, ja'lo cub nbyo'na.

³⁰ Xi ttzak'we'n bur te: —¿Myapetzun akine tburra? Akine in chin ikante teya tcyakil maj atxix tej npone tuc'ila. ¿Ope nbinchaye jun maj ti'ja ic tza'n jlu? —Minti', chi Balaam.

³¹ Jakettzun twitz Balaam tu'n Kman, ex o ilwaj t-anjel Kman tu'n, wa'l tcubtok tuj be ex k'i'n jun spad tuj tk'ab. Cubtzun ẍmeje' Balaam ex pon tacl tibaj twitz max twitz tx'otx'.

³² Atzunte t-anjel Kman xi tma'n te: —¿Tiku'n ma baj tasyalina ox maj tburra? Akine ma chin ule makolte tbeya, porque aju tbeya k'i'n mya ba'n tuj nwitze.

³³ Ox maj ma chin ilwaje tu'n tburra ex ma tz'el tcumin tib wi'je. Nokwit minti' sel tcumin tib wi'je, mawtlo cyima wu'ne atzunte tburra minti'wtlo xcyim.

³⁴ Xi ttzak'we'n Balaam te t-anjel Kman: —Ma chin binchane il, minti'tok ba'n wu'ne ka aya otok cub ten tuj be makolte weye. Ka mya ba'n ma tz'ela tuj twitza aju nbeye lu, jacu chin aj meltz'aje, chi Balaam.

³⁵ Xi ttzak'we'n t-anjel Kman: —Ba'n tu'n t-xi'ya cyuc'il xjal lu, pero o'cx k'manxa aju cxel nma'ne teya, chi t-anjel Kman. Xi'tzun Balaam cyuc'il ke nejenel otok che tzaj t-sama'n Balac.

C'met Balaam tu'n Balac

³⁶ Tej tbinte Balac ka cyja'tok ttzaj Balaam, etz canul ti'j tuj jun tnam tuj tx'otx' Moab ttxlaj nima Arnón, tujx tmojonil ttx'otx',

³⁷ ex xi tma'n te: —Ma ntxoca cab maj. ¿Tiku'n pen ma tzaja? ¿Kapelo ma ximana ti'j ka mlay jaw nnimsa'na?

³⁸ Xi ttzak'we'n Balaam: —Lu kine lu ma chin ule tuc'ila. Minti' woclene tu'n nyoline tuj wexe nnable; nok o'cx chin yolile ti'j yol tzul tma'n Dios weye.

³⁹ Xi'tzun Balaam tuc'il Balac tuj Quiriat-huzot,

⁴⁰ atzun xi tma'n Balac tu'n cycub byet wacẍ ex ẍne'l ex tu'n t-xi k'o'n ch'in te Balaam ex cye nejenel uc'intok tu'n.

⁴¹ Te prim te juntl k'ij ic' uc'in Balaam tu'n Balac tu'n cyjax twi witz Baamot-baal tbi, jatum k'ancha'ltok ttxa'nile cycampament aj Israel.