Números 14 - Mam de Huehuetenango Bible

Jaw cyi'n cyib aj Israel ti'j Kman

¹ Tzyettzun cysch'in aj Israel tu'n cyxobil; ex ak'bil cyu'n in che ok' wen.

² Ex cycyakil e oc ten yolil mya ba'n ti'j Moisés ex ti'j Aarón, in cyma'n: Mas ba'nwtlo nokwit max xko cyim tuj Ejipt ex ka tzalu tuj tzkij tx'otx'.

³ ¿Tiku'n xko tzaj ti'n Kman tu'n kpon tuj tx'otx' ma chixin? Porque ko cymel tuj k'oj ex ke kxu'jil ex ke kc'wa'l che tzyetel cyu'n aj k'oj ex che xel cyi'n. Maslo ba'n tu'n kaj tuj Ejipt.

⁴ Ex in cyma'n cyxolx: E toc kk'o'n jun nejenel kxol ex e kaj meltz'aj tuj Ejipt.

⁵ Atzunte Moisés ex Aarón e cub mutzk'aj ex pon tacl tibaj cywitz max twitz tx'otx' cywitz cycyakil tnam xjal.

⁶ Atzunte Josué aju tcy'ajal Nun, tuc'ix Caleb aju tcy'ajal Jefone, akeju otok che'x aj que'yilte tx'otx' Canaán, el cysbit'un cyxbalun cyi'j tu'n cybis,

⁷ ex xi cyma'n cye cycyakil aj Israel: —Aju tx'otx' o'x aje que'yilte, puro tbanilxix.

⁸ Ka ma tzalaj Kman ki'j, ax te c'onil ke tu'n kcanun tuj tx'otx' ex ctzajel tk'o'n ke. Aju tx'otx' lu k'inun tx'otx' ex tbanilxix.

⁹ Pero mi'n jaw cyi'n cyibe ti'j Kman, ex mi'n che xobe cywitz xjal ate' ma chixin, porque ke xjal lu jurat naj cbel cyi'j ku'n; mi a'l colol cyi'j, atzun ke, at Kman kuc'il. Mi'n che xobe cywitz, che chi, xi cyma'n.

¹⁰ Atzun cye xjal o cyajbe tu'n toc cyxo'n abj cyi'j. Cubtzun tyec'un tib t-spic'umal Kman cywitz cycyakil aj Israel tibaj ja xbalun te mojbabl tibil,

¹¹ ex tzaj tma'n Kman te Moisés: —¿Jtoj ban txi cycolin xjal tu'n cyic'un wi'je? ¿Jtoj ban txi cycolin tu'n mi'n tke' cyc'u'j wi'je, ex o bant nimcu techal wu'ne cyxol?

¹² Tzul nsama'ne tx'u'j yabil cyi'j tu'n cycyim ex tu'n mi'n cyetzan ti'j tx'otx' Canaán; pero ti'ja c'elel jun tnam ma'xix wu'ne ex mas tipun ic tza'n cye, chi Dios te Moisés.

¹³ Atzunte Moisés xi ttzak'we'n te Kman: —Oclo cybi aj Ejipt, jatum e etz ti'na tnam xjal lu tu'n tipumala,

¹⁴ ex cxel-lo cyma'n cye tnam xjal najl tuj Canaán. Ax icx cye aj Canaán o cybi ka aya Nman Dios tcuba cyxol tnam xjal lu, ex twitzelaya in cub tyec'un tiba cywitz, ex aju muj jatum tocxa tuj, tcub cyibaj; nejliya cywitz te k'ijl tuj txkan muj ex te konic'an tuj txkan k'ak'.

¹⁵ Ka ma che cub tbyo'na tnam xjal lu, ke nmak tnam o cybi tkanil ti'ja oc cyma:

¹⁶ Mix ma bant tu'n Cydios tnam xjal aj Israel tu'n cypon tuj tx'otx' Canaán, aju xi ttziyan tu'n t-xi tk'o'n cye, ex cyja'tzun ma che cub tbyo'n tuj tzkij tx'otx'.

¹⁷ Tiltzun Nman Dios, yec'untza nimxix tipumala ja'lo, ic tza'nx o tzaj ttziyana, porque o tmaya

¹⁸ ka minti' in jaw k'ojl naja, ma'xix tc'ujlalila ex in cub tnajsa'na mya ba'n ex ttx'u'jil wibaj, masque minti' nni'c'x ti'j tu'na tu'n mi'n tcub tcastiw jun xjal at til, nok o'cx in cub tk'o'na cycastiw c'wa'lbaj tu'n tlaj mya ba'n cybinchben cyman, cyuc'ix ke tal chmambaj ex ke ttxca' chmambaj.

¹⁹ Tu'nju tc'ujlalila ma'xix najsancuya aju mya ba'n ma bant cyu'n tnam xjal lu, ic tza'n ma ten tpasensa cyi'j tej maxtok ate' tuj Ejipt ax icx ja'lo.

Cub cycastiw aj Israel tu'n Kman

²⁰ Atzunte Kman tzaj ttzak'we'n: —Ba'n, ma cub nnajsa'ne cyil ic tza'nx ma tmaya weye,

²¹ pero cxel nma'ne teya jun yol axix toc wu'nx wibe, ex axix toc nojni tcyakil twitz tx'otx' tu'n wajwalile:

²² Cycyakil keju o cyil nspic'umale ex ke techal e bant wu'ne tuj Ejipt ex tuj tzkij tx'otx', ex ma chin oc k'o'ne cyu'n tuj nimcu joybil wi'je ex minti' in chinx cyniman,

²³ ax toc, mi jun cye oc cyila' aju tx'otx' xi ntziyane cye ktzan cyxe'chel. Mi jun cye keju ma che el ic'unte weye oc cyila' aju tx'otx'.

²⁴ Atzunte nmajene Caleb, tu'nju ma ten junxitl t-ximbetz ex ma chinx tniman tuj tcyakil, cxel nk'o'ne ambil te tu'n tpon tuj tx'otx' xi aj que'yilte, ex ake tiyjil che najal tuj.

²⁵ Ke aj Amalec ex ke aj Canaán, atzun najlke tuj chk'ajlaj. Atzun cyeye, cyaj meltz'aje nchi'j ex cyxi'ye tuj be in xi' tuj tzkij tx'otx' tumlal mar Cyak Que'yin.

²⁶ Ex tzaj tma'ntl Kman te Moisés ex te Aarón cyja':

²⁷ —¿Cucxpe c'ic'elex ta'w cyyol aj Israel wu'ne, ake jumajx mya ba'n ke? Ma nbiye in che yolin mya ba'n wi'je.

²⁸ K'manxa cye cyja': Akine Dios cxel nma'ne jun yol axix toc wu'nx wibe: Ic tza'n cyyole ma nbiye, icxtzun cbantel cyi'je wu'ne.

²⁹ Cycyakil keju o japun winkin abk'i cyu'n, ic tza'nx in tma'n tuj cyajlal xjal o jaw, ex ma che yolin mya ba'n wi'je, che cymel, ex aju cyximlal cyjel pale' tuj tzkij tx'otx' lu.

³⁰ Mi jun cye cpol tuj tx'otx' xi ntziyane aju tu'n cypon najal tuj, nok o'cx Caleb aju tcy'ajal Jefone, tuc'ix Josué aju tcy'ajal Nun, che pol tuj tx'otx' lu.

³¹ Atzun cye cyc'wa'le, akeju o cymaye ka tu'n cycub tz'ak tuj cyk'ab aj k'oj cyi'je, che xel wi'ne tu'n cypon najal tuj tx'otx' aju ma tz'el cyic'une.

³² Atzun cyeye, che cyjel pale'ye cyimni keye tuj tzkij tx'otx' lu.

³³ Atzun ke cyc'wa'le ax che pastoril cyalun 40 abk'i tuj tzkij tx'otx' lu. Nim c'ic'elex cyu'n tu'n tlaj mya ba'n ma bant cyu'ne, ocxi cybaj cyime tzalu tuj tzkij tx'otx'.

³⁴ Akeju e je'x aj que'yilte tx'otx', e ten 40 k'ij tu'n tic' cywitz ti'j, ax icxtzun 40 abk'i cchjetel cyile; jun abk'i ti'j jun k'ij. Atzun c'elel cynic'e ti'j alcye in tzaj tu'nju in chin k'ojine cyi'je.

³⁵ Akine Dios in xi nma'ne jlu: Atzun cbantel wu'ne cyi'j tnam xjal lu, akeju jawni cywitz ex ma jaw cyi'n cyib wi'je. Tujx tzkij tx'otx' lu che bajel cyim.

E cyim laj xjal cyxol keju e je'x aj que'yilte tx'otx'

³⁶ Akeju xinak e je'x t-sama'n Moisés que'yilte tx'otx', ex tej cyul meltz'aj o cyma tkanil mya ba'n ti'j tx'otx', ex tu'n cyyol xjal lu e oc ten cycyakil tnam xjal yolil mya ba'n ti'j Moisés,

³⁷ akeju xinak lu tzaj jun c'ixbisabl cyibaj ex e cyim tu'n Kman.

³⁸ Cyxol cycyakil keju e je'x aj que'yilte tx'otx', o'cx te Caleb aju tcy'ajal Jefone, tuc'ix Josué aju tcy'ajal Nun e cyaj ten ex minti' e cyim.

Cub cyi'j aj Israel tuj lugar Horma

³⁹ Tejtzun t-xi ttx'olba'n Moisés cye aj Israel aju otok tma Kman te, cycyakil aj Israel e bisun nimxix wen,

⁴⁰ ex te juntl k'ij te prim e jaw we', e jax twi witz ex cyma: —Ax toc ma ko binchan il, atzun ja'lo ko' tuj lugar o tzaj ttziyan Kman ke.

⁴¹ Atzunte Moisés xi tma'n cye: —¿Tiku'n ma che ic'e tibaj tyol Kman? Mya ba'n c'elel te cyeye.

⁴² Tiltzun mi'n che jaxe, porque mi a'l Kman cyuc'ile ex cbel cyi'je cyu'n aj k'oj cyi'je,

⁴³ porque lu ke aj Amalec ex ke aj Canaán in che ayon cyi'je tu'n cyk'ojin cyuc'ile ex tu'n cycub byo'ne cyu'n. Tu'nju ma tz'el cypa'n cyibe ti'j Kman, cyja'tzun mi a'l Kman cyuc'ile, chi Moisés cye.

⁴⁴ Atzun cye minti' xi cybi'n tu'n mi'n cyjax twi witz ex e jax o'cx cye. Atzunte Moisés tuc'ix cax c'ubl tley Dios ax e cyaj ten tuj campament.

⁴⁵ E etztzun ke aj Amalec cyuc'ix ke aj Canaán, akeju najlke tuj lugar lu, e oc ten k'ojlel cyi'j aj Israel, cub cyi'j cyu'n ex e je'x lpe' cyi'j tejxi cypon tuj lugar Horma.