Mateo 5 - Mam de Huehuetenango Bible

Jax Jesús twi witz tu'n t-xi tk'o'n xnak'tzbil cye xjal

¹ Tejtzun tque'yinte Jesús nim xjal, jax twi witz; tejtzun tcub ke', e pon lak'e' ke t-xnak'tzben ttxlaj,

² ex oc ten k'ol xnak'tzbil cye ex tma:

Alcye ke at tzalajbil cye

³ At tzalajbil cye keju nne'l cynic' ti'j ka at tajben Dios cye, porque at cyoclen ti'j ju cawbil in tzaj tuj cya'j.

⁴ At tzalajbil cye keju in che bisun, porque oc ck'ukbanjtzel cyc'u'j.

⁵ At tzalajbil cye keju mans, porque oc cyc'ma' ju tx'otx' te cyetzbil.

⁶ At tzalajbil cye keju nne'l cyc'u'j ex in che txket ti'j tu'n cyoc te tz'aklxix, porque ctzajel tk'o'n Dios aju cyajbil.

⁷ At tzalajbil cye keju in k'ak'an cyc'u'j ti'j juntl, porque ctzajel k'ak'an tc'u'j Dios cyi'j.

⁸ At tzalajbil cye keju sak tuj cyanmi, porque c'oquel cyque'yin Dios.

⁹ At tzalajbil cye keju nno'c tilil cyu'n tu'n cyten xjal tuj tzalajbil cyxolx, porque c'oquel k'o'n cybi tc'wa'l Dios.

¹⁰ At tzalajbil cye keju in che yajlanjtz tu'n tlaj ju in cybincha'n aju tz'aklxix, porque at cyoclen ti'j ju cawbil in tzaj tuj cya'j.

¹¹ At tzalajbil cyeye oc cyoc yaso'ne ex oc cyyajlanjtze tu'n nlaje ex oc cymante xjal tcyakil mya ba'n cyi'je mya ax toc.

¹² Che tzalajxe ex che tenxe alegr, porque aju oyaj ctzajel k'o'n cyeye tuj cya'j, ma'xix; porque icxtzun e yajlanjtz ke t-sanjel Dios cyu'n xjal ojtxi.

Akeye atz'an ex spic'un cyxol xjal

¹³ Akeye atz'an cyxol xjal; katzun ma naj ta'w atz'an, ¿tza'n tten tu'n toctl ta'w? Minti'tl tajben, nok o'cx tu'n tex xo't ex tu'n tbaj waban cyu'n xjal.

¹⁴ Akeye spic'un cyxol xjal. Jun tnam tcub twi' jun witz, mlay bant tewit.

¹⁵ Ex oc toc txaket jun candil, mlay tz'ocx k'ot tjak' jun almi; nok o'cx cbel k'ot tibaj jun tcubil tu'ntzun tk'onte spic'un cye cycyakil keju ate' tuja.

¹⁶ Cyja'xtzun tu'n tc'ant cyspic'umale cywitz xjal, tu'n cylonte aju cyak'unbene ba'n ex tu'n tjaw cynimsa'n tbi Cymane aju at tuj cya'j.

In tk'o'n Jesús xnak'tzbil ti'j tley Moisés

¹⁷ Mi'n cub cyximane ka ma chin ule tu'n tnaj tley Moisés ex ka cyyol t-sanjel Dios; minti' ma chin ule tu'n tnaj, nok o'cx tu'n tjapun wu'ne.

¹⁸ Porque ax toc cxel nma'ne cyeye, ka na'nxtok tnaj cya'j ex tx'otx', mlay naj jun tal punt ex ka jun tal letr ch'in te ley ka na'nxtok tjapun tcyakil.

¹⁹ Cyja'tzun alcye jun xjal ma tzic' tibaj jun tal ch'in mandamyent cyxol jlu, ex ka ma txi tk'o'n xnak'tzbil cye xjal tu'n mi'n tjapun cyu'n, tal ch'inxix c'oquel k'o'n tuj cawbil in tzaj tuj cya'j. Pero alcye ma che japun tu'n, ex ka icx ma txi tk'o'n xnak'tzbil cye xjal tu'n tjapun cyu'n, atzunju c'oquel k'o'n te ma'xix tuj cawbil in tzaj tuj cya'j.

²⁰ Porque cxel nma'ne cyeye, ka minti' ma che oque mas tz'aklxix cywitz ke xnak'tzal ti'j ley ex ke parisey, mlay che ocxe tuj cawbil in tzaj tuj cya'j.

In tk'o'n Jesús xnak'tzbil tu'n mi'n kk'ojin

²¹ O cybiye o k'manjtz cye xjal ojtxi: Mi'n cye biyune; ex alcye jun xjal ma biyun, c'oquel tuj xjel twitz jwes, chi tuj ley.

²² Atzun weye cxel nma'ne cyeye, alcye jun xjal ma tzaj tk'oj ti'j terman, c'oquel tuj xjel twitz jwes; ex alcye ma tz'oc yasonte terman, c'oquel tuj xjel cywitz aj Sanjelal mas ma' cyoclen; ex alcye ma txi tma'n tc'ayil yol te terman, mya yajcu jacu txi k'o'n tuj infierni tuj k'ak'.

²³ Cyja'tzun, oc t-xi'ya k'ol toyaja twitz altar, oc tpona ex ka ma tna'ya ka at jun tila twitz termaniya,

²⁴ axtzun cyjel tk'o'na toyaja twitz altar, ex nej txi'ya tuc'il termaniya tu'n tbant ttena tuc'il, maxitzun cxel tk'o'na toyaja.

²⁵ Ka at jun xjal at tk'oj ti'ja ex ma txi' k'ol part tuj jusgad, tz'oc tililx tu'na tu'n tbant naj ttena tuc'il atxtoka tuc'il tuj be, tu'ntzun mi'n tpon k'i'na twitz jwes tu'n aj k'oj ti'ja, ex tu'n mi'n t-xi k'o'na te polisiy tu'n jwes, ex tu'n mi'n tocx k'o'na tuj pres.

²⁶ Ax toc cxel nma'ne teya, mlayx tz'etza tuj pres ka mya cabal tmulta c'oquex tk'o'na.

In tk'o'n Jesús xnak'tzbil tu'n mi'n kbinchante aj pajil

²⁷ O cybiye aju o k'manjtz ojtxi: Mi'n tbinchaya aj pajil, chi tuj ley.

²⁸ Atzun weye cxel nma'ne cyeye, alcye jun ma txi que'yinte jun xu'j ex in pon tc'u'j ti'j tu'n tbinchante mya ba'n tuc'il, ma tbincha aj pajil tuj tanmi.

²⁹ Ka tu'n tlaj tbak' twitza tuj bank'abaj cbel tz'aka tuj il, k'i'metza ex xo'mixa; porque mas ba'n tu'n tnaj jun tbak' twitza ex mya tu'n t-xi k'ot tcyakil t-ximlala tuj infierni.

³⁰ Ex ka tu'n tlaj tbank'aba cbel tz'aka tuj il, tx'emin ela ex xo'mixa; porque mas ba'n tu'n tnaj jun tk'aba ex mya tu'n t-xi k'ot tcyakil t-ximlala tuj infierni.

In tk'o'n Jesús xnak'tzbil tu'n mi'n tcub kpa'n kib tuc'il kxu'jil

³¹ Ax icx o k'manjtz ojtxi: Alcye jun ma tz'el tlajo'n t-xu'jil, k'onx jun u'j te jatum in tma'n ti'j tcublen cypa'n cyib, chi tuj ley.

³² Atzun weye cxel nma'ne cyeye, ka at jun xjal ma cub tpa'n tib tuc'il t-xu'jil ex ka minti' otok tbincha xu'j aj pajil, tu'n tlaj xinak mya yajcu tbincha xu'j aj pajil; ex ka ma moje' juntl xinak tuc'il ju xu'j otok tz'el lajo'n, ax icx in tbincha'n aj pajil.

In tma'n Jesús tu'n mi'n t-xi kma'n tzkan Dios

³³ Ax icx o cybiye o k'manjtz cye xjal ojtxi: Mi'n txi cyma'ne tzkan Dios ti'j jun yol mya ax toc, nok o'cx japunx cyu'ne aju otok txi cytziyane te Kman, chi tuj ley.

³⁴ Atzun weye cxel nma'ne cyeye, mi'n txi cymane tzkan Dios, mi'n tzaj cyna'ne cya'j, porque atzun tk'ukbil Dios jatum in cawin,

³⁵ ex mi'n tzaj cyna'ne tx'otx', porque tcub tkan Dios tibaj; ex mi'n tzaj cyna'ne tnam Jerusalén, porque atzun tnam etzan tu'n nintz Rey.

³⁶ Mi'n tzaj cyna'ne cywi'ye oc t-xi cytziyane jun yol, porque mlay bant cyu'ne tu'n toc jun ttzmal cywi'ye sak ex ka k'ek.

³⁷ Nok o'cx tu'n t-xi cyma'ne oc ex ka mi'n; porque ka ma tz'oc cyk'o'ne juntl yol tibaj jlu, atzun in tzaj tuc'il tajaw il.

In tma'n Jesús tu'n mi'n taj kk'o'n t-xel mya ba'n

³⁸ O cybiye o k'manjtz cye xjal ojtxi: Ka at jun ma jatz tbak' twitz tuc'il tu'n, ax icx te tu'n tjatz tbak' twitz, ex ka ma tz'etz twitz te' tuc'il tu'n, ax icx te il ti'j tu'n tetz jun twitz te'.

³⁹ Atzun weye cxel nma'ne cyeye: Mi'n tz'aj cymojtza'ne k'oj tuc'il ju xjal mya ba'n; ex ka at jun xjal ma tz'oc jun tk'o'txa tu'n, k'onxa juntl pac' tk'o'txa, ka taj xjal tu'n toc juntl.

⁴⁰ Ex ka at jun xjal taj tu'n t-xi k'i'na tu'n twitz jwes tu'n tel k'i'n tcamiẍa, ax icx tchicyeta k'onxa te.

⁴¹ Ex ka at jun xjal ma tz'oc jwersina tu'n tu'n t-xi ti'na tikatz tu'n tbeta mey ojlab tuc'il, txi'ya tu'n tbeta jun ojlab tuc'il.

⁴² Ka at jun xjal in tkanin jun ti'xti teya, k'onxa ch'in te; ex ka at jun xjal in tkanin tch'ex teya, mi'n cub t-xc'ayina.

Cyc'ujlame aju aj k'oj cyi'je

⁴³ O cybiye aju o k'manjtz ojtxi: Cyc'ujlame ke cyuc'ile, atzunju aj k'oj cyi'je c'elel cyic'une, chi tuj ley.

⁴⁴ Atzun weye cxel nma'ne cyeye: Cyc'ujlame ke aj k'oj cyi'je, che yoline ba'n cyi'j keju in che yasun cyi'je, cybinchame ba'n cye keju in che ic'un cyeye, ex che na'ne Dios cyi'j keju in che ilin cyi'je ex in che yajlan cyeye.

⁴⁵ Cyc'ujlamtzune, tu'ntzun tel nic'baj cyi'je ka c'wa'lbaj keye te Cymane aju at tuj cya'j; porque tu'n in ja'wil k'ij cyibaj ke xjal mya ba'n ex ke xjal ba'n, ex ax in tzaj k'onte jbal cyibaj ke xjal tz'aklxix ex ke xjal mya tz'aklxix.

⁴⁶ Katzun o'cx ma cyc'ujlaye keju in che c'ujlan cyeye, ¿alcyetzun oyaj ctzajel k'o'n cyeye ti'j jlu? ¿Myapetzun icx in cybincha'n ke peyil pwak?

⁴⁷ Ex ka o'cx ke cyermaniye in cyk'olbe'ne, ¿alcyetzun in cybincha'ne aju minti' in bant cyu'n mastl xjal? ¿Myapetzun icx in cybincha'n ke txkantl xjal minti' nne'l cynic' ti'j Dios?

⁴⁸ Cyja'tzun, che ocxe tz'aklxix ic tza'n te Cymane aju at tuj cya'j tz'aklxix te.