Mateo 14 - Mam de Huehuetenango Bible

Aju tcyimlen Juan aju in che byan xjal tu'n

¹ Tuj tk'ijlalil lu el tkanil ti'j Jesús, o tbi Herodes aju gobernador.

² Xitzun tma'n Herodes cye keju in che ajben te: —Ate Juan jlu aju e byan xjal tu'n; ma jaw ank'in cyxol cyimni, cyja'tzun at tipumal tu'n tbant tcyakil jlu tu'n, chi Herodes.

³ Porque o tzyet Juan tu'n Herodes, ex oc tc'alo'n tu'n caden, ex ocx tk'o'n tuj pres tu'n tlaj Herodías; ate Herodías t-xu'jil Pelip nej, aju titz'in Herodes.

⁴ Porque xi tma'n Juan te Herodes: —Mya k'o'n tu'n ley tu'n tten Herodías te t-xu'jila.

⁵ O tajbe Herodes tu'n tcub tbyo'n, pero tzaj t-xobil cywitz xjal; porque cycyakil xjal in cyma'n ate Juan t-sanjel Dios.

⁶ Pero tej tcub ic'sa'n tk'ijlalil titz'jlen Herodes, oc ten tal Herodías bixal cywitz xjal, ex tzaj jun ttzalajbil Herodes ti'j.

⁷ Cyja'tzun xi ttziyan Herodes te txin: Nok alcyex ctzajel tkanina weye jacu txi nk'o'ne teya, chi Herodes; xi tma'n tzkan Dios ti'j ka tu'n t-xi tk'o'n.

⁸ Atzunte txin, nej xi aj kanilte te ttxu', xitzun tma'n te Herodes: —K'ontza twi' Juan weye, aju e byan xjal tu'n, k'ontza tuj jun plat, chi txin.

⁹ Atzunte rey Herodes tzaj tbis; pero tu'n tlaj tzkan Dios otok txi tma'n ex tu'n cylaj keju ate'tok tuc'il ti'j mes, cyja'tzun xi tma'n tu'n t-xi k'o'n twi' Juan te txin.

¹⁰ Xi tk'o'n orden tu'n tel tamtz'u'n twi' Juan tuj pres.

¹¹ Tzajtzun k'i'n twi' tuj jun plat, ex xi k'o'n te txin; atzunte txin pon ti'n twitz ttxu'.

¹² E pontzun ke t-xnak'tzben Juan, etz cyi'n t-ximlal ex cu'x cymaku'n; e je'xtzun ex xi cyk'o'n tkanil te Jesús.

Xi tk'o'n Jesús cywa jwe' mil xinak

¹³ Tej tbinte Jesús jlu, ic' tuj lugar lu, xi' tuj jun barc tu'n tpon tuj jun lugar minti' cynajbil xjal tuj. Tejtzun cybinte xjal, e je'tz tuj junjun tnam ex e je'x tu'n cykan tu'n cypon jatum attok tponil Jesús.

¹⁴ Tejtzun tetz Jesús tuj barc o til nim xjal otok che pon, tzaj k'ak'an tc'u'j cyi'j, ex e banix yab tu'n, akeju ate' cyxol xjal.

¹⁵ Tej ch'ixtok tex k'ij, e pon lak'e' ke t-xnak'tzben Jesús ttxlaj ex xi cyma'n te: —Aju lugar lu minti' cynajbil xjal tuj, ex ma ko kax; k'manxa cye xjal tu'n cyxi' cyuj aldey tu'n tlak'et ch'in cywa, che chi.

¹⁶ Xi tma'n Jesús cye: —Mya il ti'j tu'n cyxi' xjal lak'ol cywa; cyk'onxe ch'in cywa.

¹⁷ Atzun cye xnak'tzben xi cyma'n: —Minti' at kuc'ile, nok o'cx jwe' pan at ex cabe cyiẍ.

¹⁸ Xi tma'n Jesús cye: —Cyi'ntze tzalu.

¹⁹ Xitzun tma'n cye xjal tu'n cycub ke' tibaj ch'im. Ex e tzaj ttzyu'n jwe' wabj cyuc'ix cabe cyiẍ, jaw tque'yin twitz cya'j ex xi tk'o'n chjonte te Dios ti'j, ex e cub tpiẍc'u'n ke wabj, xi tk'o'n cye t-xnak'tzben, atzun cye t-xnak'tzben xi cysipan cye xjal.

²⁰ Cycyakil xjal e wa'n ex e noj; ex jaw cychmo'n cablaj chi'l ttx'akan wabj cyaj sobryin.

²¹ Aju cyajlal xjal e wa'n, balo jwe' mil xinak, mya cyuc'ix ke xu'j ex mya cyuc'ix ke c'wa'l e oc te tajlal.

In bet Jesús tibaj a'

²² Tejtzun tbaj jlu, xi tma'n Jesús cye t-xnak'tzben tu'n cyocx tuj barc ex tu'n cyxi' nej twitz tu'n cypon jlajxi laguna, atzunte Jesús cyaj ten k'malte cye xjal tu'n cyaj cyja.

²³ Tejtzun cyaj baj xjal, jax Jesús twi witz na'l Dios tjunalx. Tejtzun koc yupj, tjunalx Jesús attok.

²⁴ Atzunte barc otok mijin tibaj a', ex in pon tilj a' ti'j, porque maket barc tu'n cyk'ik'.

²⁵ Ch'ixtok ttzaj t-xe cya'j pon Jesús cyuc'il in bettok tibaj a'.

²⁶ Tejtzun cylonte t-xnak'tzben in bettok Jesús tibaj a', bi'x naj cynabl. —Klab te jlu, che chi. Ex e jaw sch'in tu'n cyxobil.

²⁷ Pero jurat naj xi yolin Jesús cyuc'il: —Ke' cyc'u'je; akine, mi'n che xobe, chi Jesús cye.

²⁸ Tzajtzun ttzak'we'n Pedro: —Tat, ka aya, k'mantza tu'n nxi'ye tuc'ila tibaj a'.

²⁹ Xitzun tma'n Jesús: —Tzaja. Cu'tztzun Pedro tuj barc, xi bet tibaj a' tu'n tpon tuc'il Jesús.

³⁰ Pero tej tlonte Pedro nim cyk'ik', tzaj t-xobil; cyja'tok t-xi mulk'aj tuj a', jaw sch'in ex tma: —Tat, chin tcloma.

³¹ Jurat naj xi tnukpi'n Jesús tk'ab, tzyettzun Pedro tu'n, ex xi tma'n te: —Aya xinak ch'in tocslabla, ¿tiku'n xjawje' tc'u'ja? Chi Jesús te.

³² Tejtzun cyjax tuj barc, bi'x we' cyk'ik'.

³³ Atzun keju ate'tok tuj barc e ul lak'e' twitz Jesús, ex e c'ulun twitz in cyma'n: —Ax toc aya Tc'wa'l Dios, che chi.

E banix ke yab tu'n Jesús tuj Genesaret

³⁴ Tej cyic'x jlajxi a', e pon tuj tx'otx' Genesaret.

³⁵ Tejtzun tel cynic' xjal ti'j Jesús, akeju ax najl ke, ex tkanil cyu'n tuj tcyakil lugar nikayin; cycyakiltzun ke yab e ul k'i'n tuc'il Jesús.

³⁶ E cubsan xjal twitz Jesús ichak nok ttxa'n t-xbalun tz'oc cymaco'n yab; ex cycyakil keju oc cymaco'n, e banix.