Marcos 5 - Mam de Huehuetenango Bible

Aju xinak aj Gadara at ju'ẍ tuj tanmi

¹ E pontzun jlajxi laguna tuj cytx'otx' aj Gadara.

² Tejtzun tetz Jesús tuj barc, jurat naj ul jun xinak canul ti'j, tzaj tuj camposant, tocx jun ju'ẍ tuj tanmi.

³ Axtok najl xjal tuj camposant, ex mi a'l jun xjal in xcye' ti'j tu'n tc'alet tu'n caden.

⁴ Porque nimcu maj e baj c'alo'n ke tkan cyuc'ix ke tk'ab tu'n caden, pero e cub tzakj ke caden tu'n ex e baj tpaẍu'n, ex mi a'l jun xjal in xcye' ti'j.

⁵ Tcyakil k'ij ex konic'an ax ta' twi witz ex tuj camposant, in sch'in ex nno'c tc'ixbisan tib tu'n abj.

⁶ Tejtzun tlonte xjal najchak cyja'tok ttzaj Jesús, xi kelan ex cub ẍmeje' twitz Jesús.

⁷ Jaw tk'ajk'ajel twi' cyuw, ex xi tma'n: —¿Ti toclena wi'je, Jesús, aya Tc'wa'l Dios ma' toclen? Chin cubsale twitza, mi'n chin cub tyajla'na.

⁸ Tma xjal icju tu'nju xi tma'n Jesús te: —Aya ju'ẍ, tetza tuj tanmi xjal lu.

⁹ Ex xi tkanin Jesús te: —¿Ti tbiya? Atzunte xjal xi ttzak'we'n: —Lejyonwe nbi, porque nim kbete.

¹⁰ Ex o cubsanxix ju'ẍ twitz Jesús tu'n mi'n cyex lajo'n tuj cytx'otx' aj Gadara.

¹¹ Ate'tok txkan boch nikayin, nim cybet in che wa'ntok tc'u'j witz.

¹² Ex e cubsan ke ju'ẍ twitz Jesús: —Ko t-samanxa cyxol boch tu'n kocxe cyuj, che chi.

¹³ Xitzun tk'o'n Jesús permis cye. E je'tztzun ke ju'ẍ tuj tanmi xjal, e jo'cx cyuj boch balo te cab mil cyajlal boch; extzun cyxo'n cyib cycyakil boch ttxa'n xak, ex e baj naj tuj a'.

¹⁴ Atzun keju in che pastorin ke boch e je'l ok, ex xi cyk'o'n tkanil cye xjal tuj tnam ex cye xjal tuj cojbil. E tzajtzun xjal que'yilte ti otok baj.

¹⁵ E ultzun tuc'il Jesús, ex o cyil k'ukltok ju xjal aju otok yajlanjtz cyu'n ju'ẍ nimcu cybet, toc t-xbalun ju xjal ex otok banix tnabl; tzajtzun cyxobil xjal.

¹⁶ Ex akeju e lonte jlu, xi cytx'olba'n cye xjal tza'n tten otok banix ju xjal aju otok yajlanjtz cyu'n ju'ẍ, ex ti o baj cyi'j boch.

¹⁷ E octzun ten xjal cubsal twitz Jesús tu'n tex tuj cytanmi.

¹⁸ Cyja'tok tocx Jesús tuj barc, aju xjal otok yajlanjtz cyu'n ju'ẍ o cubsan twitz Jesús tu'n t-xi' tuc'il Jesús.

¹⁹ Atzunte Jesús minti' tcuyi tu'n t-xi' xjal tuc'il, nok o'cx xi tma'n te: —Txi'ya tjaya cyxol ke termaniya, ex tx'olbanxa cye aju nimxix ma tbincha Kman teya ex tza'n tten ma tzaj k'ak'an tc'u'j ti'ja.

²⁰ Xi'tzun ju xjal, oc ten tx'olbalte tuj tx'otx' Decápolis, xi tma'n aju nimxix o tbincha Jesús te; ex cycyakil xjal e labin ti'j.

Aju tme'jel Jairo, ex aju xu'j oc tmaco'n t-xbalun Jesús

²¹ Tej tic'tz Jesús juntl maj tuj barc, ul jlajtzi laguna, ul cychmon cyib nim xjal ti'j; axtzun cub ten Jesús ttzi a'.

²² At jun cye keju nejenel tuj ja te c'ulbil, Jairo tbi, ul tuc'il Jesús; tej tlonte Jairo cyja' ttzaj Jesús, cub mutze' t-xe' tkan.

²³ Nimxix o cubsan twitz, ex tma: —Ch'ix tcyim nme'jele; tzaja wuc'ile tu'n tcub tk'o'na tk'aba tibaj tu'ntzun tbanix ex tu'n tank'in, chi Jairo.

²⁴ Xi'tzun Jesús tuc'il, ex e oc lpe' nim xjal ti'j, ex oc cybetz'an cyib xjal ti'j Jesús.

²⁵ Ex at jun xu'j cyxol xjal, otok bant cablaj abk'i yabtok tu'n ẍwo'j.

²⁶ Ela'xi maj otok txi aj cyuc'il nimcu k'anal, ex nim otok c'ixbi, ex otok baj tnajsa'n tcyakilju at te; pero minti' o bant ch'in, nok mas xi' tuj tilil.

²⁷ Tej tbinte xu'j tkanil ti'j Jesús, pon lak'e' ttzal ti'j Jesús cyxol xjal, ex oc tmaco'n xu'j t-xbalun Jesús.

²⁸ Porque chi xu'j: Ichak nok t-xbalun tz'oc nmaco'ne, chin bantele.

²⁹ Ex jurat naj o we' ẍwo'j ti'j; ex o tna' xu'j tuj t-ximlal otok banix ex otok tz'el tyabil.

³⁰ Jurattzun el tnic' Jesús ti'j ka otok banix jun xjal tu'n tipumal; ajtztzun tque'yin cywitz xjal, ex tma: —¿Alcye ma tz'oc maconte nxbalune?

³¹ Xi cyma'n t-xnak'tzben te: —Lu in tque'yina ke xjal nno'c cybetz'an cyib ti'ja, atzun teya in tma'na: ¿Alcye ma tz'oc maconte weye, chiya?

³² Xitzun tque'yin Jesús cywitz cycyakil xjal ate'tok ti'jele, tu'n tel tnic' ti'j alcye otok tz'oc maconte te.

³³ Atzunte xu'j tzaj lu'lun tu'n t-xobil, porque ba'ntok tu'n aju otok binchanjtz te; pontzun lak'e' xu'j twitz Jesús, cub ẍmeje' t-xe tkan, ex clarxix xi tma'n tcyakil.

³⁴ Xitzun tma'n Jesús te: —Nme'jel, tu'n tocslabla ma banta; txi'ya, txubtxaj ta'ya ja'lo, bi'x ma cyaj banixa, ma tz'el tyabila.

³⁵ Matok in yolin Jesús tej cyul cabe xjal e tzaj tuj tja nejenel tuj ja te c'ulbil ex xi cyma'n te: —Ma cyim tme'jela; ¿ti gan sict Xnak'tzal tu'na? Che chi.

³⁶ Tejtzun tbinte Jesús aju in cyma'n, xi tma'n teju nejenel tuj ja te c'ulbil: —Mi'n xoba, o'cx ke' tc'u'ja.

³⁷ Ex minti' o tcuyi Jesús tu'n cyxi lpe' xjal ti'j, nok o'cx Pedro, tuc'ix Jacobo ex Juan aju titz'in Jacobo e je'x tuc'il.

³⁸ Tejtzun tpon Jesús tja nejenel o til Jesús ke xjal in che wulj ex in che ok' ex nimxix in che wu'yin.

³⁹ Ocxtzun Jesús tuja ex xi tma'n cye xjal: —¿Tiku'n in che wulje ex in che ok'e? Aju txin mya cyimni, nok in tan, chi Jesús cye.

⁴⁰ Pero e oc ten xjal xmayil ti'j Jesús. Atzunte Jesús e je'tz tlajo'n cycyakil xjal ttxa'n pe'n, o'cx tman txin ocx tuc'in, tuc'ix ttxu', ex cyuc'ix keju ate' tuc'il Jesús. E ocxtzun jatum ta' txin.

⁴¹ Jawtzun ti'n Jesús tk'ab txin ex xi tma'n te: —Talita cumi, chi Jesús. Atzun in tma'n ju yol lu: Txin, teya in xi nma'ne, we'ctza.

⁴² Jurattzun jaw we' txin ex oc ten betel, porque otok japun cablaj abk'i tu'n. Atzun cye xjal nim e jaw labin tej cyque'yinte jlu.

⁴³ Pero xi tcyuwsa'nxix Jesús cye, xi tma'n tu'n mi'n t-xi cyma'n cye xjal, ex xi tma'n tu'n t-xi k'ot ch'in twa txin.