Marcos 4 - Mam de Huehuetenango Bible

Aju techal ti'j ju xjal xi' awal

¹ Oc ten juntl maj Jesús k'olte xnak'tzbil cye xjal ttzi laguna, ex nim xjal pon cychmon cyib ti'j; cyja'tzun jax Jesús tuj jun barc at ttzi a', cubtzun ke', atzun cycyakil xjal k'ukl ke twitz tx'otx' ttzi laguna.

² Ex nimcu xnak'tzbil xi tma'n Jesús cye tuj techal; atzunju xnak'tzbil lu xi tma'n cye:

³ —Cybintze nyole. At jun xjal xi' awal triw.

⁴ Tej t-xi tchitun xjal iyaj, at ch'in cub tz'ak tuj be; e ultzun ke chyu'j ex jaw cywa'n.

⁵ Ch'intl iyaj cub tz'ak cyxol abj jatum mya nim tpimil tx'otx'; jurat tzaj pok'l iyaj porque mya nim tpimil tx'otx'.

⁶ Pero tej tmek't k'ij o tz'e'y ex bi'x tzkij tu'n tlaj mya nim tloc'.

⁷ Ch'intl iyaj cub tz'ak t-xol ch'i'x c'ul; ch'iytzun ch'i'x c'ul, bi'x xc'ost triw tu'n, ex minti' oc twitz.

⁸ Pero ch'intl iyaj cub tz'ak tuj tbanil tx'otx'; tzaj pok'l, ex o ch'iy ex oc twitz; ex ti'j junjun tkan at oc 30 twitz, ex at oc 60 twitz, ex at oc jun syent twitz, chi Jesús cye.

⁹ Xi tma'ntl Jesús cye: —Alcye at t-ẍcyin, binx ju yol lu.

Aju tnabl ju techal

¹⁰ Tejtzun cyaj baj xjal, atzun keju e cyaj ten tuc'il Jesús cyuc'ix ke cablaj t-xnak'tzben xi cykanin te Jesús alcye tnabl ju techal.

¹¹ Xitzun tma'n Jesús cye: —Te cyeye ma tzaj k'o'n tu'n tel cynic'e ti'j ju yol ti'j tcawbil Dios aju ewantok nej; atzun cye mastl xjal, tcyakil tu'n t-xi k'met cye tuj techal,

¹² tu'n mi'n tcyil aju in cyque'yin, ex tu'n mi'n tel cynic' ti'j aju in cybi'n, tu'ntzun mi'n cyajtz meltz'aj tuc'il Dios ex tu'n mi'n tcub najset cyil, chi Jesús cye.

In tchic'ba'n Jesús ju techal ti'j ju xjal xi' awal

¹³ Ex xi tma'ntl Jesús cye: —¿Maj minti' nne'l cynic'e ti'j ju techal lu? ¿Tza'ntzun tten c'elel cynic'e cyi'j mastl techal?

¹⁴ Aju iyaj in cu'x tawa'n xjal, atzunju tyol Dios.

¹⁵ Aju be jatum cub tz'ak iyaj, atzun in yolin cyi'j xjal in cu'x awet tyol Dios tuj cyanmi: nej in xi cybi'n, pero nnu'l naj Satanás ex nne'l ti'n tyol Dios aju otok cu'x awet tuj cyanmi.

¹⁶ Ke abj jatum cub tz'ak iyaj, atzun in yolin cyi'j xjal oc cybinte tyol Dios jurat naj in xi cyocsla'n in che tzalaj ti'j,

¹⁷ pero minti' in xi' tloc' Tyol Dios cyuj, nok te cabe k'ij in che ten; oc ttzaj yajbil cyi'j ex oc cyel ic'un cyu'n xjal tu'n tlaj tyol Dios, jurat naj in che cub tz'ak.

¹⁸ Aju tx'otx' at ch'i'x c'ul tuj jatum cub tz'ak ju iyaj, atzun in yolin cyi'j xjal in xi cybi'n tyol Dios,

¹⁹ pero o'cx in che bisun ti'j tza'n tten tu'n cyank'in twitz tx'otx', in che sbunjtz tu'nju cyaj tu'n cyoc k'inun, ex nimcu in pon cyc'u'j ti'j. Tcyakil jlu toc cyc'u'j ti'j; tu'ntzunju nne'l tipun tyol Dios tuj cyanmi, ex minti' in witzan.

²⁰ Atzunju tbanil tx'otx' jatum cub tz'ak ju iyaj, atzun in yolin cyi'j xjal in xi cybi'n tyol Dios ex in xi cyocsla'n, ex nno'c twitz iyaj cyuj; ti'j junjun tkan at nno'c 30 twitz, ex at nno'c 60 twitz, ex at nno'c jun syent twitz.

Aju techal ti'j candil

²¹ Ax icx xi tma'n Jesús cye: —¿Baka in tzaj cyi'n xjal jun candil tu'n tocx cyk'o'n tjak' almi ex ka tjak' watbil? ¿Myapetzun tibaj jun tcubil tu'n tcub k'ot tu'n tk'onte spic'un?

²² Porque tcyakilju at tuj ewaj ctzajel yec'un, ex tcyakilju ewan c'elel tuj k'ancha'l.

²³ Alcye at t-ẍcyin, binx ju yol lu.

²⁴ Ax icx xi tma'n cye: —Cyk'o'nque cwent ti'j ju in cybi'ne, porque ax ju malbil c'ajbel tu'n Dios cyeye jatum in xi cymalo'ne te juntl, ex ctzajel tk'o'n Dios ch'intl tibaj cyeye.

²⁵ Porque alcye jun xjal at ch'in te, ctzajel k'o'n mastl te; pero alcye jun xjal minti' te, aju ch'in at te, c'elel k'i'n.

Aju techal ti'j ju iyaj in ch'iy

²⁶ Ax icx xi tma'n Jesús: —Aju tcawbil Dios ic tten ic tza'n jun xjal in cu'x tawa'n iyaj tuj tx'otx';

²⁷ in xi'tzun xjal tal konic'an ex in jaw we' k'ijl, atzunju iyaj in pok'l ex in ch'iy, pero te xjal minti' bi'n tu'n tza'n tten in pok'l iyaj.

²⁸ Porque ax tx'otx' in tzaj k'onte twitz; tnejel in ch'iy tkan, te tibajxi in yec'un twi', ex te tibajxi nno'c twitz ti'j twi'.

²⁹ Octzun tk'anax twitz, in che'x t-sama'n xjal tu'n tjaw chmet twitz, porque otok pon k'ij tu'n tjaw.

Aju techal ti'j twitz mostaza

³⁰ Ax icx o tma Jesús: —¿Chi toc cyu'ne ti'j tcawbil Dios? ¿Tza'n tten? Ex ¿alcye jun techal ctzajel ki'n ti'j?

³¹ Ic tten tcawbil Dios ic tza'n twitz mostaza oc in cu'x awet tuj tx'otx', mas tal ch'inxix twitz mastl iyaj at twitz tx'otx';

³² pero oc in cu'x awet, in tzajtzun ch'iy, ex ma' nno'ca cywitz mastl itzaj, ex ma' in che oc ke tk'ab, cyja'tzun in che ocx ten ke chyu'j t-xol tk'ab tjak' t-xlecumal.

Alcye tajben ke techal in tma'n Jesús

³³ Tej tyolin Jesús cyuc'il xjal, nimcu techal xi tma'n cye, ic tza'n ke techal lu, alcyeju tu'n tel cynic' ti'j.

³⁴ Puro tuj techal o yolin Jesús cyuc'il xjal, pero xi tchic'ba'n tcyakil cye t-xnak'tzben tej cyten cyjunalx.

We' jun nintz cyk'ik' tu'n Jesús

³⁵ Ax k'ij tej toc kax, xi tma'n Jesús cye t-xnak'tzben: —Ko ic'x jlajxi laguna.

³⁶ E cyajtzun ten cycyakil xjal cyu'n xnak'tzben, xi'tzun k'i'n Jesús cyu'n t-xnak'tzben tujx barc jatum k'ukl; ex at mastl barc e je'x lpe' ti'j.

³⁷ Pero tzaj jun cyk'ik' nimxix, ex jaw pulin a' tu'n cyk'ik', ocx tuj barc, cyja'tzun ch'ixtok t-xi mulk'aj barc tuj a'.

³⁸ Atzunte Jesús otok tzic' tan ttxa'n tje' barc, tx'ayl tibaj jun xk'anwi'; jawtzun cyc'asun, ex xi cyma'n te: —Xnak'tzal, ¿minti'pe taja ki'je, ko najele? Che chi.

³⁹ Jawtzun we' Jesús, xi tmayo'n cyk'ik' ex xi tma'n te a': —Mi'n k'ajta. Numecuya. We'tzun cyk'ik', bi'xtzun taque' tcyakil.

⁴⁰ Xitzun tma'n cye t-xnak'tzben: —¿Tiku'n in che xobe? ¿Tza'n tten minti' cyocslable? Chi Jesús.

⁴¹ Tzajtzun nim cyxobil, ex cyma cyxolx: —¿Alcyetzunju xjal lu? Porque tuc'ix cyk'ik' ex a' in xi cyniman tyol, che chi xnak'tzben.