Levítico 8 - Mam de Huehuetenango Bible

Tej t-xjanset Aarón cyuc'ix ke tcy'ajal

¹ Tzaj yolin Kman tuc'il Moisés ex tma:

² K'intza Aarón cyuc'ix ke tcy'ajal, ax icx k'intza keju cyxbalun pal, tuc'ix aseyt te xjansabl, tuc'ix jun tor tu'n tcub te chojbil il, cyuc'ix cabe tman ẍne'l ex jun tal chi'l pan minti' t-samel cyuj tu'n tjaw mal cyc'u'j,

³ ex chmo'n oca cycyakil xjal ttzi ja xbalun te mojbabl tibil.

⁴ Tbinchatzun Moisés ic tza'nx otok tma Kman, ex octzun cychmon cyib cycyakil xjal ttzi ja xbalun te mojbabl tibil.

⁵ Xitzun tma'n Moisés cye cycyakil xjal cyja': Atzun jlu ma tma Kman tu'n tbant.

⁶ Xitzun tma'n Moisés tu'n tpon lak'e' Aarón cyuc'ix ke tcy'ajal ex e baj tchi'n tu'n a'.

⁷ Te tibajxi oc tk'o'n Moisés aju ẍjow' ti'j Aarón, ex oc tc'alo'n c'albil c'u'jbaj tc'u'j ex te ti'jxi oc tk'o'n jun mant ti'j ex te ti'jxi lu oc tk'o'n ju tcapiẍay pal ti'j ex oc tc'alo'n tc'u'j tu'nxju c'albil te capiẍay.

⁸ Ex ti'jxi capiẍay oc tk'o'n jun xbalun tbanilxix, ttzi t-xu'c, ex tujxitzun ju xbalun lu ocx tk'o'n Urim ex Tumim.

⁹ Oc tk'o'n jun xbalun te c'albil twi', ex ti'jtzun xbalun lu oc tk'o'n jun tal tz'lom k'an pwak ttx'otx'il tibaj twitz Aarón, te jun techal ka otok tz'oc toclen te pal ic tza'nx otok tma Kman.

¹⁰ Te tibajxi tzaj ti'n Moisés aseyt te xjansabl ex cub tko'n ch'in tibaj ja xbalun ex cyibaj cycyakil ti'xti ate' tuj, ex cyja'tzun tten e xjanset tu'n.

¹¹ Ax ju aseyt lu xi ttx'ito'n wuk maj tibaj altar, ex cub tko'n ch'in tibaj altar ex cyibaj cycyakil macbil in che ajben tuc'il, ax icx cub tko'n ch'in tibaj pil ex tibaj tk'ukbil tu'ntzun cyxjanset.

¹² Cubtzun tko'n Moisés aseyt te xjansabl tibaj twi Aarón tu'ntzun t-xjanset tu'n toc te pal.

¹³ Te tibajxi e tzaj ti'n Moisés ke tcy'ajal Aarón, ex oc tk'o'n cyẍjo'w ex oc tc'alo'n cyc'u'j tu'n c'albil c'u'jbaj, ex oc tk'o'n jun xbalun te c'albil cywi', ic tza'nx otok tma Kman.

¹⁴ Te tibajxi xi tma'n Moisés tu'n ttzaj k'it tal tor tu'n t-xi k'ot te chojbil il, atzunte Aarón cyuc'ix ke tcy'ajal cub cyk'o'n cyk'ab tibaj twi' tal tor.

¹⁵ Ocxtzun tkesin Moisés tjak' tkul tal tor, tzaj ti'n ch'in chic' cyu'n ke twi' tal tk'ab ex oc t-su'n cyi'j ke tcach altar tuc'ix ti'jele tu'ntzun t-xjanset, atzunju chic' cyaj sobryin cu'x tko'n t-xe tkan altar. Cyja'tzun tten xjanset altar tu'ntzun tchjet cyil xjal cyu'n ke chojbil che xel k'ot tibaj.

¹⁶ Ax icx tzaj ti'n Moisés tcyakil seb tocsa'n cyi'j ke tuj tc'u'j tor, tuc'ix seb tocsa'n ti'j ttx'otx' ex cycabil tchenak' ex seb tocsa'n cyi'j, ex cub tpatun tcyakil jlu tibaj altar;

¹⁷ atzunju tchibjal tal tor tuc'ix ttz'umal ex ttxa', cub tpatun ti'jxi campament ic tza'nx otok tma Kman.

¹⁸ Te tibajxi tzaj ti'n Moisés jun tman ẍne'l tu'n tcub patit te jun oyaj, atzunte Aarón cyuc'ix ke tcy'ajal cub cyk'o'n cyk'ab tibaj twi' tman ẍne'l.

¹⁹ Ocxtzun tkesin Moisés tjak' tkul tman ẍne'l, ex oc ttx'ito'n tchc'el ti'jele tc'u'j altar,

²⁰ cub tpaẍu'n tman ẍne'l tuj piẍun, ex ocx tpatun twi' tuj k'ak', tuc'ix chibj otok baj tpaẍu'n ex tuc'ix t-sebyil;

²¹ ex baj ttx'jo'n ke tuj tc'u'j tman ẍne'l tu'n a', cyuc'ix ke tkan ex ke tcux, ex cub tpatun tcyakil jlu tibaj altar te jun oyaj patun in cub at tc'oc'jal in tzalaj Kman ti'j, ic tza'nx otok tma Kman te Moisés.

²² Xi tma'ntl Moisés tu'n ttzaj k'it juntl tman ẍne'l, aju tu'n tajben te xjansabl, atzunte Aarón ex ke tcy'ajal cub cyk'o'n cyk'ab tibaj twi' tman ẍne'l.

²³ Te tibajxi ocx tkesin Moisés tjak' tkul tman ẍne'l, tzaj ti'n ch'in chic' ex oc t-su'n ti'j tje' t-ẍcyin Aarón tuj tbank'ab, tuc'ix ti'j tman tal tbank'ab ex ti'j tman tal tkan tuj tbank'ab.

²⁴ Ax icx xi tma'n Moisés tu'n cyul lak'e' ke tcy'ajal Aarón, ex oc t-su'n ch'in chic' ti'j tje' cyẍcyin tuj cybank'ab, tuc'ix cyi'j ke tal tman cybank'ab tuc'ix cyi'j ke tal tman cykan tuj cybank'ab; atzun chic' cyaj sobryin oc ttx'ito'n ti'jele tc'u'j altar.

²⁵ Tzajtzun ti'n Moisés t-sebyil, tuc'ix tje', tuc'ix tcyakil seb tocsa'n cyi'j ke tuj tc'u'j, tuc'ix ju tocsa'n ti'j ttx'otx', cyuc'ix cycabil tchenak' ex ju seb tocsa'n cyi'j, ex tcux tuj tbank'ab.

²⁶ Tuj tal chi'l tcubil pan minti' t-samel cyuj tu'n tjaw mal cyc'u'j, aju in cub ten twitz Kman, jatz ti'n Moisés jun pan minti' t-samel tuj tu'n tjaw mal tc'u'j, tuc'ix jun pan at aseyt tuj, ex jun tal pan xaxj, ex cub tk'o'n junx tuc'il seb ex tcux alumaj tuj tbank'ab;

²⁷ tcyakiltzun jlu xi tk'o'n tuj tk'ab Aarón ex tuj cyk'ab ke tcy'ajal, tu'ntzun t-xi cyyucun jlu te jun chojbil twitz Kman.

²⁸ Tzajtzun ti'n Moisés tcyakil jlu tuj cyk'ab, ex cub tpatun tibaj altar junx tuc'il oyaj patun in cub, te jun oyaj te xjansabl at tc'oc'jal ex patun in cub te Kman.

²⁹ Te tibajxi tzaj ti'n Moisés ttzi t-xu'c tman ẍne'l ex xi tyucun twitz Kman. Atzun jlu tu'n tel k'it ti'j tman ẍne'l te xjansabl, ex tu'n t-xi k'ot te Moisés, ic tza'nx otok tma Kman.

³⁰ Tzaj ti'n Moisés ch'in aseyt te xjansabl tuc'ix ch'in chic' tcubsa'n tibaj altar, ex xi ttx'ito'n tibaj Aarón ex ti'j t-xbalun, ax icx xi ttx'ito'n cyibaj ke tcy'ajal ex ti'j cyxbalun. Cyja'tzun tten o xjansanjtz Aarón tuc'ix t-xbalun, junx cyuc'il ke tcy'ajal tuc'ix cyxbalun.

³¹ Te tibajxi jlu xi tma'n Moisés te Aarón ex cye tcy'ajal: Cytxco'n jaxe ta'l chibj ttzi ja xbalun te mojbabl tibil, ex axtzun cxel cychyo'ne tuc'il pan te xjansabl tcu'x tuj chi'l, ic tza'nx o tzaj tma'n Kman weye tej tmante cyja': A Aarón cyuc'ix ke tcy'ajal che xel chyo'nte chibj lu.

³² Atzunju chibj ex pan csobryil, il ti'j tu'n tcub patit tcyakil.

³³ Ex tuj wuk k'ij mi'n che el lak'e'ye ttzi ja xbalun te mojbabl tibil; max che elel lak'e'ye oc tjapun baj xjansabl cyeye, porque wuk k'ij cxel ti'n tu'n cyxjansete.

³⁴ O tzaj tma'n Kman tu'n tbant jlu, ic tza'n ma bant ja'lo, tu'ntzun tnajset cyile.

³⁵ Cyja'tzun wuk k'ij ax che cyjel tene k'ijl ex konic'an ttzi ja xbalun te mojbabl tibil. Cynimanxe orden lu tu'ntzun mi'n cycyime, porque atzunju orden lu o nc'ame tu'n Kman, chi Moisés, xi tma'n cye.

³⁶ Atzunte Aarón cyuc'ix ke tcy'ajal o cybincha tcyakil ic tza'nx otok tzaj tma'n Kman te Moisés.