Levítico 3 - Mam de Huehuetenango Bible

Ke chojbil te mojbabl tibil tuc'il Dios

¹ Ka at jun ma tz'etz k'inte jun vac ex ka jun tor cyxol ke twacẍ tu'n ttzaj tk'o'n weye te jun chojbil te mojbabl tibil wuc'ile, aju alumaj ctzajel tk'o'n il ti'j minti' tpaltil.

² Aju xjal cxel k'onte oyaj cbel tk'o'n tk'ab tibaj twi alumaj, ex c'oquex tkesin tjak' tkul twitz ja xbalun te mojbabl tibil. Atzun cye pal, akeju tiyjil Aarón, c'oquel cytx'ito'n chic' ti'jele tc'u'j altar.

³ Ex aju seb tocsa'n cyi'j ke tuj tc'u'j alumaj ctzajel tk'o'n xjal te jun chojbil te mojbabl tibil wuc'ile, te jun oyaj patun in cub,

⁴ cyuc'ix ke tchenak' tuc'ix seb tocsa'n cyi'j, tuc'ix seb tocsa'n ttzal ti'j, tuc'ix seb toc ti'j ttx'otx'; a jlu c'elel ti'n junx cyuc'il ke tchenak'.

⁵ Atzun cye pal akeju tiyjil Aarón, cbel cypatun tcyakil jlu tibaj altar, tibaj chojbil tcub tibaj si' in c'ant tu'n k'ak' te jun oyaj patun in cub, at tc'oc'jal in chin tzalaje ti'j.

⁶ Katzun ẍne'l toyaj xjal ctzajel tk'o'n te jun chojbil te mojbabl tibil wuc'ile, ba'n tu'n ttzaj tk'o'n jun tman ẍne'l ex ka jun ttxu', pero il ti'j minti' tpaltil.

⁷ Katzun tal ẍne'l toyaj ctzajel tk'o'n oc tpon ti'n nwitze,

⁸ cbel tk'o'n tk'ab tibaj twi' tal ẍne'l, ex te tibajxi c'oquex tkesin tjak' tkul twitz ja xbalun te mojbabl tibil. Atzun cye pal akeju tiyjil Aarón, c'oquel cytx'ito'n chic' ti'jele tc'u'j altar.

⁹ Ax icx cxel tk'o'n xjal t-sebyil alumaj, tuc'ix tje' ctzajelx tkesin max t-xe tk'ukbil, tuc'ix seb tocsa'n cyi'j ke tuj tc'u'j, te jun chojbil te mojbabl tibil wuc'ile, ex te jun oyaj patun in cub,

¹⁰ cyuc'ix ke tchenak' tuc'ix seb tocsa'n cyi'j, tuc'ix seb tocsa'n ttzal ti'j, tuc'ix seb toc ti'j ttx'otx'; a jlu c'elel ti'n junx cyuc'il ke tchenak'.

¹¹ Atzun cye pal cbel cypatun tcyakil jlu tibaj altar, ic tza'n wabj patun in cub te jun oyaj te nimbil weye.

¹² Katzun chip toyaj xjal ctzajel tk'o'n, oc tpon ti'n nwitze

¹³ cbel tk'o'n tk'ab tibaj twi chip, ex te tibajxi c'oquex tkesin tjak' tkul twitz ja xbalun te mojbabl tibil; atzun cye pal akeju tiyjil Aarón, c'oquel cytx'ito'n chic' ti'jele tc'u'j altar.

¹⁴ Cxel tk'o'n xjal tcyakil seb tocsa'n cyi'j ke tuj tc'u'j chip te jun oyaj patun in cub te nimbil weye,

¹⁵ cyuc'ix ke tchenak' tuc'ix seb tocsa'n cyi'j, tuc'ix seb toc ttzal ti'j, tuc'ix seb toc ti'j ttx'otx'; a jlu c'elel ti'n junx cyuc'il ke tchenak'.

¹⁶ Atzunte pal cbel tpatun tcyakil jlu tibaj altar, ic tza'n wabj patun in cub te jun oyaj at tc'oc'jal in chin tzalaje ti'j. Porque weye tcyakil cysebyil alumaj, il ti'j tu'n ttzaj k'ot weye.

¹⁷ Cyjel ten ju ley lu cyuc'ile te jumajx, tu'n tajben te cyeye ex cye cyiyjile nok alcyex lugar che tele: Mi'n txi cychyo'ne seb ex mi chic'.