Levítico 23 - Mam de Huehuetenango Bible

Ke nink'ij tu'n cyc'ulun ke aj Israel twitz Dios

¹ Tzaj yolin Kman tuc'il Moisés ex tma:

² K'manxa cye aj Israel cyja': Ke nink'ij nim cyoclen te weye tu'n tcub cybuyin cyibe ex tu'n cyc'ulune nwitze, atzun ke jlu.

Aju k'ij te ojlabl

³ Kak k'ij che ak'nale tuj seman, atzunju twukin k'ij mi jun ak'untl cbantel cyu'ne, porque k'ij xjan te buyj tibil jlu. Atzun jun k'ij lu te ojlabl cxel cyk'o'ne te nimbil weye nok jaxja che tele.

⁴ Ax icx cbel cybuyin cyibe tuj k'ij banin ti'j ex cbel cyic'sa'ne ke k'ij lu nimxix toclen te nimbil weye:

Aju nink'ij Xjan K'ij

⁵ Tuj cyajlaj tajlal tnejel xjaw te kale, atzun k'ij tu'n tcub cyic'sa'ne Xjan K'ij te nimbil weye.

Aju nink'ij ti'j pan minti' t-samel tuj tu'n tjaw mal tc'u'j

⁶ Atzun tuj t-olajin k'ij tex xjaw lu, atzun k'ij tu'n tcub cyic'sa'ne tk'ijlalil pan minti' t-samel tuj tu'n tjaw mal tc'u'j. Wuk k'ij che wa'le cyi'j pan lu te nimbil weye.

⁷ Ex tuj tnejel k'ij te nink'ij lu, c'oquel jun buyj tibil xjan cyu'ne, ex minti' jun ak'untl cbantel cyu'ne.

⁸ Tuj enter wuk k'ij lu cbel cypatune chojbil te Kman, atzun tuj twukin k'ij c'oquel juntl buyj tibil xjan cyu'ne ex mi jun ak'untl cbantel cyu'ne.

Aju nink'ij ti'j tnejel twitz awal

⁹ Tzaj yolin Kman tuc'il Moisés ex tma:

¹⁰ K'manxa cye aj Israel cyja': Oc cypone tuj tx'otx' cxel nk'o'ne cyeye, oc tjaw triw cyu'ne, ctzajel cyi'ne aju tnejel che'l te pal.

¹¹ Te juntl k'ij tbajlenxi k'ij te ojlabl, cxel tyucun pal tnejel twitz awal lu nwitze, tu'ntzun tc'met wu'ne cyeye.

¹² Ax k'ij oc ttzaj cyk'o'ne tnejel twitz awal weye, ctzajel cyi'ne jun tal tman ẍne'l minti' tpaltil ex te jun abk'i, tu'n tcub patit te jun oyaj weye.

¹³ Ax icx ctzajel cyi'ne cyaje libr arin tbanilxix smo'n tuc'il aseyt, tu'n ttzaj cyk'o'ne weye te jun oyaj patun in cub at tc'oc'jal tbanilxix. Ax icx ctzajel cyi'ne jun litr ta'l twitz uva tu'n tcub ket te jun oyaj weye.

¹⁴ Ttzajlenxi cyk'o'ne oyaj lu weye, ba'n tu'n cywa'ne ti'j twitz cyawale, ka triw tx'i'limaj ex ka cha'x, ex ka pan, pero nej otok tzaj cyk'o'ne cyoyaje weye. Atzun jun ley lu cyjel ten cyuc'ile te jumajx ex wikinwik cyjel cyma'ne cye cyc'wa'le nok jaxja che tele.

Aju nink'ij oc cyjapun baj wuk seman

¹⁵ Tujx k'ij t-xilen cyk'o'ne cyoyaje otok txi yuquet nwitze, ex ka ewtok tbajlen k'ij te ojlabl, cxel cyajla'ne wuk seman cabal.

¹⁶ Octzun tjapun wuk seman tbajlen k'ij te ojlabl, tuc'ix juntl k'ij, atzun ctz'aketel 50 k'ij. Maxitzun ctzajel cyi'ne ac'aj cyoyaje twitz awal weye.

¹⁷ Ex cybinchan baje cabe pan ma cyjaye, te cyaje libr talil junjun ex at t-samel tuj tu'n tjaw mal tc'u'j, tu'n ttzaj yucut nwitze, ex a arin c'ajbel cyu'ne te pan aju mas tbanilxix, atzun jun cyoyaje ctzajel cyk'o'ne weye ti'j tnejel twitz cyawale.

¹⁸ Junx cyuc'il ke pan ctzajel cyi'ne wuk tal tman ẍne'l minti' cypaltil, te jun abk'i ke, tuc'ix jun tal tor ex cabe tman ẍne'l, tu'ntzun cycub patit te oyaj weye at tc'oc'jal in chin tzalaje ti'j. Atzun cyoyaje jlu ctzajel cyi'ne te tmoj twitz awal ex ta'l twitz uva.

¹⁹ Ax icx ctzajel cyk'o'ne jun tman chip te chojbil cyile ex cabe tal tman ẍne'l te jun abk'i ke, te jun oyaj te mojbabl tibil.

²⁰ Che xel tyucun pal ke cabe tal tman ẍne'l lu nwitze junx tuc'il pan ti'j tnejel twitz awal, ex che xjansetel ke oyaj lu te weye, tu'ntzun tajben te pal.

²¹ Ax k'ij lu cbel cybuyin cyibe tuj jun buyj tibil xjan ex mi jun ak'untl cbantel cyu'ne. Atzun jun ley lu cyjel ten cyuc'ile te jumajx, ex wikinwik cyjel cyma'ne cye cyc'wa'le nok jatum che tele.

²² Oc tjaw cychmo'ne twitz cyawale, il ti'j cyjel cyk'o'ne ch'in ttxa'nile cojbil ex mi'n che aje sacwilte aju otok cyaj tz'ak. Cyk'oncje jlu cye meba ex cye betin xjal. Akine Cymane ex Cydiose.

Aju nink'ij tu'n cyoc k'ajtzet chun

²³ Tzaj yolin Kman tuc'il Moisés ex tma:

²⁴ K'manxa cye aj Israel ke yol lu: Tuj tnejel k'ij te twukin xjaw c'oquel jun nink'ij te ojlabl cyu'ne, tuc'ix jun buyj tibil xjan, tu'n ttzaj cyna'ne t-xtalbil Dios tuc'il tk'ajk'ajel twi chun.

²⁵ Cbel cypatune jun oyaj te weye ex mi jun ak'untl cbantel cyu'ne.

Aju k'ij tu'n tnajset cyil xjal

²⁶ Ax icx tzaj yolin Kman tuc'il Moisés ex tma:

²⁷ Tuj tlajin k'ij tex ju twukin xjaw, atzun k'ij tu'n tnajset cyile. Atzun k'ij lu tu'n toc cybuyin cyibe tuj jun buyj tibil xjan, ex tuj k'ij lu cbel cyyo'ne we'yaj ex cbel cypatune oyaj te nimbil weye.

²⁸ Mi jun ak'untl cbantel cyu'ne tuj k'ij lu, porque atzun k'ij tu'n tnajset cyile nwitze, akine Cymane ex Cydiose.

²⁹ Ka at jun xjal minti' ma txi tniman tu'n tcub tyo'n we'yaj tuj k'ij lu, bi'x c'elex lajet tu'ntzun mi'n ttentl cyxol t-xjalil.

³⁰ Ex ka at jun xjal ma tz'ak'nan tuj k'ij lu, bi'x cnajel wu'ne tu'ntzun mi'n ttentl cyxol t-xjalil.

³¹ Mi jun ak'untl cbantel cyu'ne tuj k'ij lu. Atzun ley lu cyjel ten cyuc'ile te jumajx, ex wikinwik cyjel cyma'ne cye cyc'wa'le nok jatum che tele.

³² Aju k'ij lu, k'ij te ojlabl te cyeye ex tu'n tcub cyyo'ne we'yaj, ctzyetel te kale tuj belaj tajlal xjaw ex cpol baj tuj juntl k'ij te kale.

Aju nink'ij tu'n cyjaw binchet ke tal ja t-xak tze'yin cywi'

³³ Tzaj yolin Kman tuc'il Moisés ex tma:

³⁴ K'manxa cye aj Israel cyja': Tuj t-olajin tajlal twukin xjaw, ctzyetel nink'ij cyi'j tal ja t-xak tze'yin cywi', ex wuk k'ij cbel cyic'sa'ne te nimbil weye.

³⁵ Tuj tnejel k'ij nink'ij c'oquel jun buyj tibil xjan ex mi jun ak'untl cbantel cyu'ne tuj k'ij lu.

³⁶ Wuk k'ij ctzajel cyk'o'ne oyaj weye patun in che cub, atzun tuj twajxakin k'ij c'oquel juntl buyj tibil xjan cyu'ne, ax icx ctzajel cyk'o'ne oyaj weye patun in cub. Atzun jun nink'ij lu ma' toclen ex mi jun ak'untl cbantel cyu'ne tuj k'ij lu.

³⁷ Atzun ke nink'ij jlu ma'xix cyoclen te weye; cyujtzun ke nink'ij lu c'oquel buyj tibil xjan te weye cyu'ne, ex cyujtzun ke k'ij lu ctzajel cyk'o'ne weye oyaj patun in che cub, ke oyaj te chojbil cyile, ke oyaj ti'j twitz cyawale, ke oyaj te chojbil weye, tuc'ix oyaj ti'j ta'l twitz uva; teylex te junjun cxel cyk'o'ne tuj k'ij banin ti'j.

³⁸ Atzun ke nink'ij lu part ke, part ke nink'ij te ojlabl, ex atzun ke oyaj lu tu'n ttzaj cyk'o'ne weye, part ke, part ju oyaj tziyimaj cyu'ne ex ke oyaj ctzajel cyk'o'ne tu'n cyexe cygan.

³⁹ Tuj t-olajin tajlal twukin xjaw, oc tjaw baj cychmo'ne twitz cyawale, c'oquel wuk k'ij nink'ij cyu'ne te weye. Aju tnejel k'ij jun k'ij te ojlabl, ax icx twajxakin k'ij, ax juntl k'ij te ojlabl.

⁴⁰ Tuj tnejel k'ij ctzajel cyi'ne tk'ab tze' tbanilxix tuc'ix twitz, cyuc'ix ke tk'ab xa'j, cyuc'ix ke tk'ab tze' puro pin cyxak, cyuc'ix ke tk'ab chjaj at ttzi a' ex wuk k'ij che tzalajele nwitze. Akine Cymane ex Cydiose.

⁴¹ Tcyakil abk'i c'oquel wuk k'ij nink'ij cyu'ne nwitze tuj twukin xjaw. Atzun jun ley lu cyjel ten cyuc'ile te jumajx ex wikinwik cyjel cyma'ne cye cyc'wa'le.

⁴² Cyujtzunju ke wuk k'ij te nink'ij lu, cycyakil aj Israel ax che itz'jel tuj tx'otx' jatum che najale che tel cyuj tal ja t-xak tze'yin cywi',

⁴³ tu'ntzun tel cynic' cycyakil cyiyjile ti'j, akeju che ul itz'j te tibajxi, tej cyetz wi'ne cyxe'chel tuj Ejipt nok cyuj tal ja t-xak tze'yin cywi' e najan wu'ne. Akine Cymane ex Cydiose.

⁴⁴ Atzun ke yol lu xi tma'n Moisés cye aj Israel cyi'j ke nink'ij ma' cyoclen te Kman.