Levítico 13 - Mam de Huehuetenango Bible

Ke ley ti'j tx'a'c minti' k'anbil ti'j

¹ Tzaj yolin Kman tuc'il Moisés ex tuc'il Aarón, chi cyja':

² Ka at jun xjal ma jaw mal ch'in tchibjal, ex ka at ronch ti'j, ex ka ronch sak que'yin, ex ka ic che que'yin jlu ic tza'n tx'a'c minti' k'anbil ti'j, cxel k'it xjal lu tuc'il pal Aarón ex ka tuc'il jun cye ke pal ax tiyjil Aarón.

³ Atzunte pal cbajel tque'yin tx'a'c toc ti'j xjal. Katzun otok sakix xya'n jatum tocsa'n tx'a'c ex ka otok tz'ocx lak'e' tx'a'c tuj tchibjal, atzun tx'a'c jlu minti' k'anbil ti'j. Tbajlenxitzun que'yin xjal tu'n pal, cxel tma'n ka ate xjal lu tz'il ta'.

⁴ Ka sak que'yin aju señ toc ti'j ttz'umal xjal, pero ka minti' otok tz'ocx lak'e' tx'a'c tuj tchibjal ex minti' otok sakix xya'n jatum tocsa'n tx'a'c, c'oquextzun lamo'n xjal wuk k'ij tu'n pal.

⁵ Tuj twukin k'ij cbajel tque'yin pal juntl maj, ex katzun ttenx tx'a'c ex minti' otok tz'el lak'e', c'oquextzun japu'n xjal wuk k'ijtl tu'n pal.

⁶ Octzun tjapun wuk k'ijtl, cbajeltzun que'yit juntl maj, ex katzun cyja' tcub naj tx'a'c ex minti' otok tz'el lak'e', cxeltzun tma'n pal ka sak ta' xjal lu ex ka nok e'lajx jun tx'a'c otok jaw jlet ti'j. Atzunte xjal cjawitz ttx'jo'n ti'j t-xbalun ex csakseteltzun.

⁷ Katzun ma tz'el lak'e' tx'a'c ti'j xjal juntl maj tbajlenxi que'yit ex otok tma pal ka sak ta', il ti'j tu'n t-xi' juntl maj tu'ntzun tbaj que'yin tu'n pal.

⁸ Octzun tbaj que'yin xjal tu'n pal, ex ka ma til otok tz'el lak'e' tx'a'c ti'j, cxeltzun tma'n ka tz'il ta' xjal lu, ex yab tu'n tx'a'c minti' k'anbil ti'j.

⁹ Ka at jun xjal at tx'a'c ti'j, aju tx'a'c minti' k'anbil ti'j, cxel k'it twitz pal.

¹⁰ Atzunte pal cbajel que'yinte te, ex ka sak que'yin tchibjal xjal otok jaw mal, ka otok sakix xya'n, ex ka malecj tchibjal xjal tuj ju otok jaw mal,

¹¹ atzun jlu tx'a'c minti' k'anbil ti'j, ex otok loc'in tuj tchibjal. Atzunte pal cxel tma'n ka tz'il ta' xjal lu, ex mya il ti'j tu'n tocx japut, porque tz'il ta'.

¹² Ka at jun xjal at tx'a'c ti'j ex ka otok noj ti'j t-ximlal tu'n, xi'ynix cyi'j tkan ex max japun baj tuj twi', nok jatum ba'n tpon baj twitz pal ti'j,

¹³ cbajel tque'yin pal; ex katzun otok baj t-sipan tib tx'a'c ti'j tcyakil t-ximlal, ex ka otok tz'oc sak que'yin, cxel tma'n pal ka sak ta' xjal lu; atzunte yab sak ta'.

¹⁴ Pero ka ma jaw jlet juntl maj tx'a'c ti'j tchibjal xjal, ex ka k'ancha'lin acu tchibjal; tu'n jlu bi'xtzun ctz'ilixtel xjal.

¹⁵ Cbajeltzun tque'yin pal tchibjal xjal otok jatz jlet ex cxel tma'n ka tz'il ta' xjal lu, porque ka tchibjal xjal otok jatz jlet, tz'il jlu, atzun tx'a'c minti' k'anbil ti'j.

¹⁶ Katzun ma sakix tchibjal xjal, aju otok jatz jlet, il ti'j tu'n t-xi' xjal tuc'il pal,

¹⁷ tu'ntzun toc tque'yin, ex ka ma til pal otok sakix que'yin tx'a'c, cxel tma'n ka sak ta' xjal lu, porque sak ta' xjal.

¹⁸ Ka at jun xjal at jun cyakc'u ti'j, ex ka ma banix,

¹⁹ ex ka otok txi mal tic'len ex sak otok tz'oc que'yin, ex ka scolin que'yin, il ti'j tu'n t-xi' yec'ul tib twitz pal.

²⁰ Katzun ma til pal mas otok tz'ocx lak'e' tic'len tx'a'c, ex ka otok sakix que'yin xya'n, cxeltzun tma'n pal ka tz'il ta' xjal lu, porque aju tx'a'c toc ti'j, atzunju minti' k'anbil ti'j.

²¹ Katzun minti' jun xya'n sak que'yin ma til tuj tic'len tx'a'c, ex minti' otok tz'ocx lak'e' tx'a'c ti'j tchibjal xjal, ka nok lek'an tcub naj, c'oquextzun tjapu'n pal xjal lu wuk k'ij.

²² Katzun in lak'e' tel tx'a'c ti'j, cxeltzun tma'n pal ka tz'il ta' xjal lu, porque aju tx'a'c toc ti'j, atzunju minti' k'anbil ti'j.

²³ Katzun minti' ma tz'el lak'e' tx'a'c, noktzun tic'len atx, ex cxel tma'n pal ka sak ta' xjal lu.

²⁴ Ka at jun xjal ma tz'e'y, ex ka ma jatz jlet tchibjal scolin ex ka sak que'yin jatum otok tz'e'y,

²⁵ cbajel tque'yin pal. Ka otok sakix que'yin xya'n toc ttzi', ex otok tz'ocx lak'e' tx'a'c ti'j tchibjal xjal, atzun tx'a'c lu aju minti' k'anbil ti'j otok jaw jlet jatum otok tz'e'y; cyja'tzun cxel tma'n pal ka tz'il ta' xjal lu tu'nju otok jaw jlet tx'a'c ti'j, aju minti' k'anbil ti'j.

²⁶ Octzun tbaj tque'yin pal aju tx'a'c, ex ka minti' jun xya'n ma til sak que'yin tcub ttzi', ex ka minti' otok tz'ocx lak'e' tx'a'c tuj tchibjal xjal, ex ka nok cyja' tcub naj, c'oquextzun tjapu'n pal xjal lu wuk k'ij.

²⁷ Tujtzun twukin k'ij cbajel tque'yin pal xjal juntl maj, ex katzun otok tz'el lak'e' tx'a'c ti'j, cxeltzun tma'n te ka tz'il ta', porque aju tx'a'c toc ti'j, atzunju minti' k'anbil ti'j.

²⁸ Katzun minti' ma tz'el lak'e' tx'a'c ti'j ex ka cyja' tcub naj, noktzun tic'len aju otok tz'e'y atx; cyja'tzun cxel tma'n pal ka sak ta' xjal lu, porque nok tic'len aju otok tz'e'y atx.

²⁹ Ka at jun xinak ex ka jun xu'j ma jaw jlet tx'a'c ti'j twi' ex ka ti'j t-xc'aw',

³⁰ cbajel tque'yin pal tx'a'c lu. Ka otok tz'ocx lak'e' tx'a'c tuj tchibjal xjal ex aju xya'n otok tz'oc k'anyin que'yin, ex ka niban tel pulj, cxeltzun tma'n pal ka tz'il ta' xjal lu, porque sal toc ti'j ex ka aju tx'a'c minti' k'anbil ti'j toc ti'j twi' ex ka ti'j t-xc'aw'.

³¹ Oc tbaj tque'yin pal aju tx'a'c, ka ma til minti' otok tz'ocx lak'e' tx'a'c tuj tchibjal xjal ex minti' xya'n k'ek que'yin tcub ttzi', c'oquextzun tjapu'n pal xjal lu wuk k'ij.

³² Tujtzun twukin k'ij cbajel tque'yin pal aju tx'a'c, ex katzun minti' otok tz'el lak'e' tx'a'c, ex minti' otok tz'ocx lak'e' tuj tchibjal xjal ex mya k'anyin que'yin xya'n tcub ttzi',

³³ cxeltzun tma'n pal te xjal tu'n tel ti'n ttzmal twi' ex t-xmatz, atzun ke xya'n cyocxsa'n tuj tx'a'c mi'n tz'el ti'n, ex c'oquex japu'n xjal tu'n pal wuk k'ijtl.

³⁴ Tbajlenxi wuk k'ijtl, c'oquel tque'yin pal juntl maj tx'a'c; katzun minti' otok tz'el lak'e' tx'a'c ex minti' otok tz'ocx lak'e' tx'a'c tuj tchibjal xjal, cxeltzun tma'n pal ka sak ta' xjal lu. Cjawitz ttx'jo'n xjal ti'j t-xbalun ex csakseteltzun.

³⁵ Katzun ma tz'el lak'e' juntl maj tx'a'c ti'j xjal t-xilenxi k'ma'n te ka otok sakix,

³⁶ cbajel tque'yin pal juntl maj; katzun otok tz'el lak'e' tx'a'c ti'j, mya il ti'j tu'n t-xi tjyo'ntl pal aju xya'n k'anyin que'yin: aju xjal lu tz'il ta'.

³⁷ Pero ka tuj tnabl pal otok banix tx'a'c ti'j xjal, ex otok tzaj jlet xya'n k'ek que'yin tuj tic'len tx'a'c, otoktzun bant tx'a'c; aju xjal sak ta', ex cxel tma'n pal ka sak ta' te xjal lu.

³⁸ Ka at jun xinak ex ka jun xu'j otok che jawil manch sak que'yin ti'j,

³⁹ cbajel tque'yin pal ti'j t-ximlal, ex ka ma til ch'in manch sakyin que'yin ti'j, noktzun e'lajx manch otok jaw jlet ti'j; sak ta' xjal lu.

⁴⁰ Ka at jun xinak ma cu'tz pulj ttzmal twi' ex tz'a'j ma cyaj tuj twi', sak ta' te xjal lu.

⁴¹ Ex ka ma cu'tz pulj ttzmal twi' ttzi twitz, tz'a'jtzun tibaj twitz; ax icx sak ta' te xjal lu.

⁴² Pero ka ma jaw jlet tx'a'c scolin que'yin jatum otok tz'el baj ttzmal twi', ka tuj twi' ex ka tibaj twitz, atzun tx'a'c lu minti' k'anbil ti'j niban tjaw jlet ti'j.

⁴³ Atzunte pal cbajel tque'yin, ex ka otok txi mal tx'a'c scolin que'yin ic tza'n tx'a'c minti' k'anbil ti'j, jatum minti' ttzmal twi', ka tuj twi' ex ka tibaj twitz,

⁴⁴ yabtzun xjal lu tu'n tx'a'c minti' k'anbil ti'j; ti'j twi' toc yabil. Aju xjal lu tz'il ta', ex cxel tma'n pal ka tz'il ta' xjal lu.

⁴⁵ Aju xjal at tx'a'c ti'j, aju minti' k'anbil ti'j, sbit'umaj t-xbalun c'oquel tk'o'n, cxel tchitpu'n twi', c'oquel tpotzin ttzi' ex cjawil sch'in cyja': Tz'il kine, tz'il kine.

⁴⁶ Tz'il ctel acux at tx'a'c ti'j, cnajal junx te ti'jxi campament.

⁴⁷ Ka ma jlet sbac ti'j jun xbalun lan ex ka ti'j jun xbalun lino,

⁴⁸ ex ka ti'j jun xbalun lino ex ka lan chmo'n in che cu'tz, ex ka ti'j jun tz'u'm, ex ka ti'j juntl ti'xti binchamaj ti'j tz'u'm,

⁴⁹ ex ka aju sbac toc cyi'j ke ti'xti lu cha'xyin ex ka cyakyin que'yin, atzun tx'a'c toc cyi'j aju minti' k'anbil ti'j, ex il ti'j tu'n t-xi yec'baj te pal.

⁵⁰ Atzunte pal cbajel que'yinte aju sbac lu ex aju ti'xti otok tz'oc sbac ti'j, ex c'oquex tlamo'n wuk k'ij.

⁵¹ Tujtzun twukin k'ij cbajel tque'yin pal aju sbac; katzun otok tz'el lak'e' sbac ti'j xbalun ex ka ti'j chemaj, ka ti'j tz'u'm ex ka ti'j jun macbil tz'u'm, atzun tx'a'c lu mya ba'n, minti' k'anbil ti'j, ex atzun ke macbil lu tz'il ke.

⁵² Cyja'tzun cbel patit nok alcyexcu jun ti'xti, ka xbalun, ka chemaj, ka tz'u'm ex ka jun macbil tz'u'm at sbac ti'j, bi'x cbel patit, porque atzun tx'a'c mya ba'n jlu, aju minti' k'anbil ti'j.

⁵³ Pero ka oc tbaj tque'yin pal ex ka ma til minti' otok tz'el lak'e' sbac,

⁵⁴ cxel tma'n tu'n tbaj tx'jet ti'xti lu, ex c'oquex tlamo'n wuk k'ijtl.

⁵⁵ Tbajlenxitzun tx'jet ti'xti lu ex tel-lenxi wuk k'ijtl, cbajel tque'yin pal juntl maj, ex ka ma til minti' otok cub naj sbac, c'oqueltzun jlu te tz'il ex bi'x cbel patit masque na'nx tel lak'e' sbac, tu'nju aju sbac lu lo'n tel xbalun tu'n, ka tujxi ex ka ti'jxi.

⁵⁶ Katzun oc tbaj tque'yin pal aju sbac ex ka ma til nok niban tcub naj tbajlenxi tx'jet, c'eleltzun tkesin jun piẍ xbalun, ka tz'u'm ex ka chemaj, jatum toc sbac.

⁵⁷ Pero ka ma jaw jlet ex ma tz'el lak'e' juntl maj sbac ti'j xbalun, ex ka ti'j ttze'yil chemaj ex ka ti'j twa ex ka ti'j tz'u'm, c'oquextzun patit ti'xti lu.

⁵⁸ Atzunju xbalun ex ka chemaj ex ka tz'u'm otok cub naj sbac ti'j tej tjatzlen tx'jo'n, il ti'j tu'n tjatz tx'jet ti'j juntl maj, ex bi'xtzun c'oquel te sak.

⁵⁹ Atzun ke ley lu ti'j sbac cyi'j ke xbalun binchamaj ti'j lan ex ka ti'j xbalun lino, ex ka ti'j ttze'yil chemaj, ex ka ti'j twa ex ka ti'j jun ti'xti tz'u'm, tu'ntzun t-xi k'mat ka sak ate' ex ka tz'il.