Levítico 12 - Mam de Huehuetenango Bible

Tza'n tten tu'n t-saksante tib jun xu'j tul-lenxi itz'j tal

¹ Tzaj yolin Kman tuc'il Moisés ex tma:

² K'manxa cye aj Israel cyja': Oc toc ten tal jun xu'j ex ka k'a jun tal oc tul itz'j, wuk k'ij ctel tuj ttz'ilil ic tza'nx in bant tu'n oc nnu'l ẍwo'j ti'j tuj junjun xjaw.

³ Il ti'j tu'n t-sircunsidarinjtz tal k'a oc tel wajxak k'ij tul-len itz'j.

⁴ Atzunte txubaj, cucx csaksalte tib tuj 33 k'ijtl ti'j chic' nnu'l ti'j. Minti' toclen tu'n toc tmaco'n jun ti'xti xjansamaj ex minti' toclen tu'n tocx tuj tja Dios ka na'nxtok tjapun k'ij tu'n t-saksante tib.

⁵ Katzun txin tal oc tul itz'j, cabe seman ctel tuj ttz'ilil, ex il ti'j tu'n tbant tu'n ic tza'nx in bant tu'n oc nnu'l ẍwo'j ti'j tuj junjun xjaw. Ax icx cucx csaksalte tib tuj 66 k'ijtl ti'j chic' nnu'l ti'j.

⁶ Octzun tjapun baj k'ij tu'n t-saksante tib txubaj, ka k'a tal ex ka txin, il ti'j tu'n t-xi ti'n jun tal tman ẍne'l te jun abk'i max ttzi ja xbalun te mojbabl tibil, tu'ntzun t-xi k'ot te oyaj patun in cub, tuc'ix jun paloma ex ka jun ẍpo'k te chojbil il. Che xel tk'o'n te pal,

⁷ atzunte pal cbel tk'o'n nwitze tu'ntzun ttx'jet txubaj tuj ttz'ilil; cyja'tzun csaksetel ti'j chic' nnu'l ti'j. Atzun ke ley lu cyi'j ke xu'j oc tul itz'j cyal, ka xinak ex ka xu'j.

⁸ Katzun minti' tumel tu'n tlak'et jun tal tman ẍne'l tu'n txubaj, entons ba'n tu'n ttzaj ti'n cabe ẍpo'k ex ka cabe paloma; jun cxel k'ot te oyaj patun in cub, ex juntl cbel tk'o'n te chojbil il. Atzunte pal cxel tkanin najsbil ti'j ju txubaj ex csakseteltzun, chi Dios.