SAN JUAN 1 - Mam de Huehuetenango Bible

Aju Tyol Dios oc te xjal

¹ T-xe tnejel, tej na'nxtok tbant tcyakil, attok te Tc'wa'l Dios ex Yol tbi. Ex aju Yol attok tuc'il Dios, ex aju Yol ax Dios te.

² Ate jlu attok tuc'il Dios atxix t-xe tnejel.

³ Nok tu'n o bant tcyakil; ex tcyakilju o bant, minti'wtlo o bant nokwit mya ate binchante.

⁴ Attok chwinklal tuc'il, ex aju chwinklal at tuc'il atzunju spic'un cye xjal.

⁵ Aju spic'un lu in koptz'aj tuj klolj, ex minti' o yupj ju spic'un tu'n klolj.

⁶ Ul jun xjal Juan tbi, tzaj sama'n tu'n Dios.

⁷ Ate jlu ul tu'n toc te testiw tu'n ttzaj ttx'olba'n ti'j ju spic'un, tu'ntzun cyocslan cycyakil xjal nok tu'nju tyol.

⁸ Mya ate Juan spic'un; nok o'cx ul tu'n ttzaj ttx'olba'n ti'j ju spic'un.

⁹ Aju spic'un axix toc ch'ixtok tul twitz tx'otx' tu'n t-spic'bante cye cycyakil xjal.

¹⁰ Tejtzun tten ju Yol twitz tx'otx' minti' el cynic' xjal ti'j, masque tu'nx o bant twitz tx'otx'.

¹¹ Ul twitz ju tx'otx' tecuxix, atzun ke t-xjalil minti' o c'met cyu'n.

¹² Pero akeju e c'monte te ex e ocslan ti'j, xi tk'o'n cyoclen tu'n cyoc te tc'wa'l Dios.

¹³ Pero mya cyi'j xjal ma che el itz'j ex mya tu'n cyajbil xjal ex mya tu'n tajbil xinak ma che itz'j, nok o'cx tu'n tajbil Dios ma che oc te tc'wa'l.

¹⁴ Aju Yol oc te xjal ex o najan kxol, nim t-xtalbil ex axix toc tyol; ex o kil tajwalil ma'xix, ax ju tajwalil Dios Mambaj xi tk'o'n te, tu'nju atzun o'cxcu jun Tc'wa'l.

¹⁵ Tzaj ttx'olba'n Juan axix toc ti'j, ex jaw tk'ajk'ajel twi' cyuw, tma: —Atzunju xjal lu xi nma'ne cyeye: Aju tzul wi'jxiye mas ma' toclen nwitze, porque attok tej na'nxtok wul itz'je, nchiye cyeye, chi Juan.

¹⁶ Nimxix xtalbil at tuc'il Jesucrist; aju xtalbil lu cucx in tzaj tk'o'n Jesucrist ke kcyakil.

¹⁷ Porque aju ley ate Moisés tzaj k'onte, atzunju xtalbil ex ju yol axix toc, ate Jesucrist tzaj k'onte.

¹⁸ Mi a'l jun xjal o til jun maj twitz Dios; pero ma tzaj chic'ba'n tu'n o'cxcu jun Tc'wa'l Dios tza'n tten Dios, porque ax ta' ttxlaj Mambaj.

In yolin Juan ax toc ti'j Jesucrist

¹⁹ E tzaj sama'n ke pal ex ke aj Leví cyu'n xjal judiy tuj Jerusalén tu'n t-xi cykanin te Juan: ¿Alcyeya? Che chi.

²⁰ Atzunte Juan xi tma'n jun yol axix toc cye ex minti' cub tewan: —Mya awe kin ju Crist aju at toclen tu'n Dios, chi Juan.

²¹ Xitzun cykanin juntl maj te: —¿Tza'ntzun tten? ¿Apeya Elías? —Mi'n, chi Juan. —¿Apeya t-sanjel Dios aju at tulel? —Ax mi'n, chi Juan.

²² Xitzun cyma'n te: —¿Alcyetzuna? K'mantza tu'ntzun t-xi ktx'olba'ne cye keju ẍe tzaj samante keye. ¿Chi toc tu'na, alcyetzuna tuj twitza? Che chi.

²³ Xitzun tma'n Juan cye: —Akine in jaw tk'ajk'ajel nwi'ye tuj lugar minti' cynajbil xjal tuj, in xi nma'ne: Cybinchame jun tbe Kman jikun ti'j, ic tza'n o tma Isaías aju t-sanjel Dios, chi Juan.

²⁴ Ke xjal lu cyu'n parisey e tzaj sama'n.

²⁵ Xitzun cykanin xjal te Juan: —¿Tiku'ntzun in che byan xjal tu'na tuj a', ka mya aya ju Crist aju at toclen tu'n Dios, ex mya aya Elías, ex mya aya t-sanjel Dios? Che chi.

²⁶ Xi ttzak'we'n Juan: —In che byan xjal wu'ne tu'n a'; pero at juntl cyxole, aju minti' ojtzki'n twitz cyu'ne.

²⁷ Atzunju tzul wi'jxiye ex mas ma' toclen nwitze, minti' woclene ti'j tu'n tel npju'ne tak'al t-xajab, chi Juan.

²⁸ Atzun baj ju yol lu tuj Betania jlajxi nima Jordán, jatum in che byan xjal tu'n Juan.

Ate Jesús tal T-ẍne'l Dios

²⁹ Tuj juntl k'ij o til Juan cyja' ttzaj Jesús, ex tma Juan: —Lu tzul ju Tal T-ẍne'l Dios aju nne'l k'i'n cyil xjal tu'n.

³⁰ Atzunju xjal lu xi nma'ne cyeye: At jun xinak tzul wi'jxiye, aju mas ma' toclen nwitze, porque attok tej na'nxtok wul itz'je, nchiye.

³¹ Ex minti' ojtzki'n twitz wu'ne, pero nok tu'n tel cynic' aj Israel ti'j, cyja'tzun ẍin tzaje tu'n cybyan xjal wu'ne tu'n a', chi Juan.

³² Ax icx tzaj ttx'olba'n Juan ex tma: —O wile Xewbaj Xjan cu'tz tuj cya'j ic que'yin ic tza'n paloma, ex cub ten tibaj.

³³ Ex minti'tok ojtzki'n twitz wu'ne; pero aju tzaj samante weye tu'n cybyan xjal wu'ne tuj a', atzunju tzaj k'mante weye: Oc ttila jun xjal cyja' tcu'tz Xewbaj Xjan tibaj ex ka ma cub ten Xewbaj Xjan tibaj, atzunju che byal xjal tu'n tuj junxitl tumel oc cyc'monte ju Xewbaj Xjan, chi weye.

³⁴ Ex o wile, ex testiw kine ti'j ka ate jlu Tc'wa'l Dios.

Keju tnejel t-xnak'tzben Jesús

³⁵ Te juntl k'ij wa'ltok juntl maj Juan cyuc'ix cabe t-xnak'tzben.

³⁶ Xi tque'yin Juan jatum in bettok Jesús, ex tma: —Lu tzul Tal T-ẍne'l Dios.

³⁷ Akeju cabe t-xnak'tzben Juan o cybi tej tyolin Juan, ex e oc lpe' ti'j Jesús.

³⁸ Ajtz tque'yin Jesús, o til lepch ke'ctok ti'j, ex xi tma'n cye: —¿Ti in cyjyo'ne? Xitzun cyma'n te: —Rabí, ¿jatum in posadiyina? Che chi. (Aju yol Rabí atzun in tma'n Xnak'tzal.)

³⁹ Xitzun tma'n Jesús cye: —Koke wuc'ile que'yilte. E je'xtzun ex o cyil jatum in posadiyin Jesús, ex ax e cyaj ten tuc'il, porque ch'ixtok tex k'ij.

⁴⁰ Ate Andrés titz'in Simón Pedro o tbi tej tyolin Juan tuc'ix jun tuc'il ex otok che oc lpe' ti'j Jesús.

⁴¹ Nej xi' Andrés jyolte Simón aju ttzic; tejtzun tcnet tu'n, xi tma'n te: —Ma cnet ju Mesías ku'ne, chi Andrés. (Aju yol Mesías atzun in tma'n aju Crist aju at toclen tu'n Dios).

⁴² Xitzun k'i'n Simón tu'n Andrés tuc'il Jesús. Tejtzun tilwaj Simón tu'n Jesús, xi tma'n te: —Aya Simón tcy'ajal Jonás; Cefas c'oquel tbiya, chi Jesús. (Aju yol Cefas atzun in tma'n Pedro, ex ka abj).

Tzaj txco'n Pelip tu'n Jesús tuc'ix Natanael

⁴³ Te juntl k'ij cub t-ximan Jesús tu'n t-xi' tuj Galiley, atzun cnet Pelip tu'n, ex xi tma'n te: —Lpe'ca wi'je.

⁴⁴ Ate Pelip aj Betsaida, aju ttanmi Andrés tuc'ix Pedro.

⁴⁵ Xi' Pelip jyolte Natanael, tejtzun tcnet tu'n xi tma'n te: —Ma cnet ju xjal ku'ne, aju cyaj ttz'iban Moisés ti'j tuj ley, ax icx cyaj cytz'iban t-sanjel Dios ti'j. Ate jlu a Jesús aj Nazaret, aju tc'wa'l José, chi Pelip.

⁴⁶ Tmatzun Natanael te Pelip: —¿Atpelo jun ba'n jacu tz'etz tuj Nazaret? Xitzun tma'n Pelip te: —Ko' wuc'ile que'yilte.

⁴⁷ Tejtzun tlonte Jesús ch'ixtok tpon lak'e' Natanael tuc'il, o yolin ti'j ex tma: —Lu jun aj Israel lu, axix toc miban sbun.

⁴⁸ Xitzun tma'n Natanael te Jesús: —¿Tza'n tten ojtzki'n nwitze tu'na? Xi ttzak'we'n Jesús: —Na'nxtok ttzaj txco'na tu'n Pelip, otok wile tej atxtoka tjak' tkan higo.

⁴⁹ Xitzun tma'n Natanael te Jesús: —Xnak'tzal, aya Tc'wa'l Dios, aya ju Rey cye aj Israel.

⁵⁰ Xi ttzak'we'n Jesús: —¿Mape tocslaya nok tu'nju ma txi nma'ne teya: Ma wile tjak' tkan higo? Oc tila'ya txkantl mas ma' t-xilen twitz jlu.

⁵¹ Ex xi tma'ntl Jesús te: —Ax toc cxel nma'ne cyeye: Oc cyila'ye cya'j catl ex ke t-anjel Dios in che jax tuj cya'j ex in che cu'tz wuc'ile, akine sc'o'maj kine tu'n Dios tu'n ntene cyuc'il xjal.