Jonás 2 - Mam de Huehuetenango Bible

Aju tna'j Dios Jonás

¹ Max tuj tc'u'j cyiẍ octzun ten Jonás cubsal twitz Kman aju Tdios,

² chi cyja': Tuj yajbil weye in cubsane twitza Nman ex in tzaj ttzak'we'na. Max t-xe'pun cynajbil cyimni in cubsane twitza ex in tzaj tbi'na.

³ In cu'x t-xo'na max t-xe'pun mar ex in cyaj mulk'aje tjak' txkan a'. O chin cyaje tjak' nintz a' in pulin wen aju tzaj t-sama'na, ex o tz'ex wibaje.

⁴ O nna'ye ka otok chin el tic'una; ex cub nximane ka minti'tl tu'n twile aju tjaya xjan.

⁵ In cyaj mulk'aje tjak' a' ex inx mulk'aje max t-xe'pun mar; ke c'ul in che ch'iy tuj a' baj cysacun cyib ti'j nwi'ye.

⁶ In cu'pune max jatum tzajni jlet ke witz tuj mar; in cyaj lamo'ne tjak' tx'otx' te jumajx. Pero, Nman Dios, tu'na ma chin colpaje te camic.

⁷ Tej nna'ye ch'ixtok ncyime, ula ti'j nc'u'je Nman, ex aju nna'j Diose pon max tuc'ila tuj tjaya xjan.

⁸ Akeju in che c'ulun cywitz ke tilbilal minti' cyajben, in cyaj cycolin cyocslabl ti'ja.

⁹ Atzun weye cxel nbitzane jun bitz te ak'bil chjonte teya, ex cxel nk'o'ne jun chojbil teya, ex cjapunel wu'ne aju yol o txi ntziyane teya. O'cx teya Nman jacu ko clete tu'na, chi Jonás.

¹⁰ Xi'tzun tma'n Kman te cyiẍ tu'n tjatz xa'win Jonás tu'n max ttzi mar.