Joel 1 - Mam de Huehuetenango Bible

Baj wa'n awal cyu'n ẍplon

¹ Atzun yol jlu tzaj tma'n Kman te Joel aju tcy'ajal Petuel.

² Cyk'ontz cywi'ye ti'j ju yol lu akeye tij xjal ex cycyakile akeye najl tuj tx'otx' lu. ¿Ope cyilxiye jun yajbil ic tza'n jlu ojtxi? ¿Ope tzajxi jun maj icju tej cyten ke ktzan cymane?

³ Cymanxe cye cyc'wa'le tu'ntzun t-xi cyma'n cyc'wa'le cye ke cyc'wa'l ex tu'n t-xi cyma'n cyc'wa'l ke cyc'wa'l, cye keju che ul te tibajxi.

⁴ Tcyakil baj cywa'n ke ẍplon*fn* cyja': Aju in cyaj tu'n jun c'loj, in baj twa'n juntl c'loj ex iclex in bant tu'n junjun c'loj tejxi tbaj tcyakil cyu'n.

⁵ Akeye chyo'mni cywi'ye, tzulx cynable ex che ok'e. Che ayayane akeye c'al vin, porque aju ta'l uva c'elel k'i'n cyeye.

⁶ Ke ẍplon ic cyten ic tza'n txkan soldad at nim cyipun ex nim cybaj, aju twitz cye' ic tten ic tza'n twitz te' jun tman balun, ex aju cycya' ic tten ic tza'n tcya' ttxu balun; ma che oc tzokpaj ti'j ntanmiye.

⁷ Aju kawal uva ma baj naj cyu'n, ex ma baj cywa'n ju kawal higo; jumajx ma baj cywa'n ttxc'omil tze' ex puro sak ma cyaj ti'j tk'ab cyu'n.

⁸ Che ok'tzune, ic tza'n jun k'apoj ch'ixtok tmoje', ka ma cyim ju cu'xun cyja'tok tmoje' tuc'il, nno'c ten ok'el ex nno'c tk'o'n t-xbalun k'ek te techal ti'j tbis;

⁹ cyja'xtzun in che ok' ke pal, akeju ajbel te Kman, porque minti'tl twitz triw tuj tja Dios ex minti'tl ta'l twitz uva te jun oyaj te Kman.

¹⁰ Jumajx ma naj ju cojbil ex puro bis ta' tx'otx'. Ma naj triw, ma che tzkij ke tkan uva, ex ch'ix cytzkij ke tkan olivo.

¹¹ E ttzaj baj cyc'u'je akeye xjal ak'nal tuj cojbil, ex che ayayane akeye awal tkan uva, porque ma che naj tkan awal tuc'ix twitz triw ex twitz sebad.

¹² Ma che baj tzkij ke tkan uva ex ma che naj ke tkan higo. Ax icx ma che tzkij ke carnad ẍok', ke tkan xa'j, ke tkan mansan ex tcyakil tze' tuj cojbil. Cyja'tzun, ma naj tcyakil cytzalajbil xjal.

¹³ Akeye in che ajbene te Dios, ba'n tu'n tex ak'bil cyu'ne toc cyxbalune ch'i'x twitz te jun techal ti'j cybise, ex che ok'e tu'n ta'w, porque tuj tja Dios, aju in che ajbene te, minti'tl twitz awal ex minti' ta'l twitz uva te jun oyaj te.

¹⁴ Cymanxe cye xjal tu'n tcub cybuyin cyib ex cymanxe tu'n tcub cyyo'n we'yaj; cychmon oc cyibe tuj tja Kman Dios, cyuc'ix ke tij xjal ex cycyakil keju najl tuj tx'otx' lu, ex che cubsane twitz Kman.

¹⁵ Ay bec'bil kwitz, porque ma tzul lak'e' tk'ijlalil castiw tu'n Kman. Tk'ijlalil xobajil, porque ko najel tu'n, ex atzun ctzajel t-sama'n Kman aju at tipumal tu'n tbant tcyakil tu'n.

¹⁶ Ma tz'el k'i'n kwa kwitzx ex minti'tl ju tzalajbil tuj tja Kdios.

¹⁷ Bi'x ma k'ay iyaj tjak' tx'otx', ma naj ju triw ex ma che baj xitj ke tx'utx'.

¹⁸ Nok in che muyin ke wacẍ tu'n tlaj cywa, nok in che betje' jyol c'ul; ex ch'ix cycyim ẍne'l tu'n we'yaj.

¹⁹ Nman, in chin cubsane twitza tu'n tlaj ma baj tz'e'y cha'x c'ul tu'n k'ak' tuj tzkij tx'otx', ax icx ma baj tz'e'y tcyakil tze' tuj cojbil.

²⁰ Cyuc'ix ke jil te tjak' c'ul in che cubsan twitza, porque bi'x ma che aj tzkij ke a' ex ma baj tz'e'y c'ul tuj cojbil.