Filipos 1 - Mam de Huehuetenango Bible

Jun k'olbebl tu'n apostl Pablo

¹ Akine Pablo tuc'ix Timotey, tmajen Jesucrist ko'ye, in xi ktz'ibane cyeye cycyakile ocslal keye ti'j Jesucrist ate'ye tuj tnam Filipos, cyuc'ix ke cwentil ex ke diácono.

² Awt Kman Dios tuc'ix Kajaw Jesucrist che tzaj k'onte xtalbil cyeye ex tu'n tke'xix cyc'u'je.

Pablo in na'n Dios cyi'j ocslal

³ Tcyakil maj oc in che tzaj nna'ne, in xi nk'o'ne chjonte te Dios aju in chin ajbene te.

⁴ Cucx in chin na'ne Dios cyi'je cycyakile tuc'il tzalajbil,

⁵ in chin tzalaje tu'nju in che onine wuc'ile tu'n tpacbanjtz tkanil colbil atxix tnejel k'ij ax icx ja'lo.

⁶ K'ukl nc'u'je ti'j jlu: Ic tza'n ma xe't jun ak'untl ba'n tu'n Dios tuj cyanmiye, ax icxtzun cjapunel tu'n tuj tk'ijlalil oc tul Jesucrist.

⁷ Tuj tumelxix tu'n nximane ti'j jlu cyi'je cycyakile porque at nc'u'je cyi'je; porque ma cyc'ame t-xtalbil Dios junx wuc'ile, ex in che onine wuc'ile tuj presbil weye, ax icx ic tza'n in chin oc tene colol ti'j tkanil colbil twitz cawil ex tu'n t-xi ncyuwsa'ne axix toc ti'j.

⁸ Porque ate Dios testiw wi'je, nimxix nc'ujlalile cyi'je cycyakile, ic tza'n tc'ujlalil Jesucrist.

⁹ Atzun jlu in xi nkanine te Dios; tu'n tten mas cyc'ujlalile ex tu'n tten mas cynable ex tu'n telxix cynic'e ti'j tcyakil,

¹⁰ tu'ntzun tbant cysc'one ti'j alcyeju mas ba'n, tu'ntzun tten sak tuj cyanmiye ex minti' cypaltile tuj tk'ijlalil oc tul Crist.

¹¹ Atzun waje tu'n cytene tz'aklxix tuj tcyakil nok tu'n tipumal Jesucrist, tu'ntzun tjaw nimsa'n tbi Dios ex tu'n t-xi k'o'n chjonte te.

In chin ank'ine tuc'il Crist

¹² Erman, waje tu'n cybinteye; tcyakilju ma baj wi'je ma tz'ajben tu'n tel lak'e' mastl tkanil colbil.

¹³ Cyja'tzun cycyakil soldad ate' tuj cwartel, cyuc'ix ke mastl, ma tz'el cynic' wi'je, pres kine tu'n tlaj in chin ajbene te Crist.

¹⁴ Ex nimxix erman ma ke'xix cyc'u'j ti'j Crist tu'n tlaj pres kine, ex mas nno'c tilil cyu'n tu'n t-xi cyma'n tyol Dios minti' cyxobil.

¹⁵ Ax toc at junjun xjal in che pacban ti'j Crist tu'nju at tlo'ch cyc'u'j ti'j juntl ex tu'nju at ch'in cyk'oj, atzun junjuntl in che pacban tu'n tcyakil cyc'u'j.

¹⁶ At junjun in che pacban ti'j Crist tu'nju at ch'in cyk'oj wi'je, mya tu'n tcyakil cyc'u'j, cyajbil tu'n ttzaj mas nbise tuj pres;

¹⁷ atzun junjuntl in che pacban ti'j Crist tu'nju at cyc'ujlalil, porque ba'n cyu'n ma chin cub k'o'ne tzalu tu'n ncoline ti'j tkanil colbil.

¹⁸ ¿Titzun cxel nma'ne? Katzun tuj tumel in che pacban ti'j Crist ex ka mya tuj tumel, pero in chin tzalaje ti'j jlu, porque in che pacban ti'j Crist. Ex cucx chin tzalajele,

¹⁹ porque ba'n wu'ne oc chin tzokpetele tu'n cyna'j Diose ex tu'nju ma tzaj k'o'n T-xew Jesucrist te onil weye.

²⁰ Porque atzun wajbile ex k'ukl nc'u'je ti'j, tu'n mi'n ttzaj nch'ixwiye, nok o'cx tu'n tke' nc'u'je tu'n nyoline tu'ntzun tjaw nnimsa'ne tbi Crist, ic tza'n ojtxi ax icx ja'lo, ka tu'n wank'ine ex ka tu'n ncyime.

²¹ Porque ka itz' kine tuc'il Crist in chin ank'ine, ex ka ma chin cyime, atzun jun ncambableju.

²² Ka tu'n wank'intle cab k'ij tzalu, jacu chin ak'nane ch'intl tu'n tch'iy tak'un Kajaw. Pero minti' nne'l nnic'e ti'j alcye mas ba'n tu'n tjaw nsc'o'ne.

²³ At cabe nximbetze, pero minti' nne'l nnic'e ti'j alcye mas ba'n. Tuj jun tumel waje tu'n ncyime ex tu'n ntene tuc'il Crist, porque mas ba'n jlu;

²⁴ pero tuj juntl tumel mas ba'n te cyeye tu'n wank'intle cab k'ij.

²⁵ K'ukl nc'u'je ti'j jlu ex ba'n wu'ne, cucx chin tele cyuc'ile cycyakile tu'ntzun cych'iye ex tu'n cytzalaje tuj cyocslable.

²⁶ Cyja'tzun tten jacu che tzalaje wi'je oc npone juntl maj cyuc'ile, tu'nju ocslal keye ti'j Jesucrist.

²⁷ O'cx chin cubsale cywitze tu'n cyank'ine ba'nxix, ic tza'nx tkanil colbil in yolin ti'j Crist. Cyja'tzun, ka ma chin pone que'yil cyeye ex ka minti' ẍin pone, pero wajbile tu'n nbinteye tkanil cyi'je, cucx cytene wa'lxix keye, junx cyanmiye ex junx cynable, ex junx nno'c tilil cyu'ne tu'n cycoline ti'j cyocslable, aju ma tzaj k'o'n cyeye tu'n tkanil colbil.

²⁸ Ex minti' tu'n cyxobe cywitz keju in che k'ojin cyi'je; ka in che k'ojin cyi'je, atzun jun yec'bil cye tu'n cyxi' tuj najen, pero atzun te cyeye, atzun jun yec'bil tu'n cyclete; ax Dios in tzaj yec'unte jlu.

²⁹ Porque ma tzaj k'o'n jun cyoclene mya nok o'cx tu'n cyocslane ti'j Crist, ax icx tu'n tic'x cyu'ne tu'n tlaj.

³⁰ Nno'c tilil tu'n tic'x cyk'oj xjal cyu'ne ic tza'n weye; o cyile ojtxi tza'n tten ic'x cyk'oj xjal wu'ne, ex ja'lo ma pon tkanil cyuc'ile, cucx tic'x wu'ne.