Éxodo 36 - Mam de Huehuetenango Bible

¹ Cyja'tzun, ate Bezaleel ex Aholiab, cyuc'ix cycyakil keju at cynabl tu'n cybinchante ak'untl tbanilxix, akeju o tzaj tk'o'n Kman cynabl ex cyojtzkibl tu'n cybinchante tcyakilju at tajben tuj tja Dios, cbantel cyu'n aju o tzaj tma'n Kman, chi Moisés.

Tzaj cyi'n aj Israel nimxix oyaj

² Tzaj txco'n Bezaleel tu'n Moisés, tuc'ix Aholiab ex cycyakil keju attok cynabl tu'n cybinchante ak'untl tbanilxix, akeju otok tzaj tk'o'n Kman cynabl ex otok txi cyk'on cyib tu'n cyex cygan tu'n cyonin ti'j ak'untl lu.

³ Xi cyc'mo'n te Moisés ke oyaj otok che ul cyi'n aj Israel tu'n cyajben tuj tja Dios. Atzun cye aj Israel, teyle junjun prim cucxtok tul cyi'n cyoyaj tu'n cyex cygan.

⁴ Cycyakil keju attok cynabl ex in che ak'nantok ti'j ju attok tajben ti'j tja Dios, we' ch'in ak'untl cyu'n,

⁵ ex e je'x k'malte te Moisés cyja': Ma tzul cyi'n xjal mas nim twitzju at tajben ti'j ak'untl o tzaj tma'n Kman tu'n tbant, che chi.

⁶ Xitzun t-sama'n Moisés tkanil cyxol cycyakil xjal tuj campament, chi cyja': Mi jun xinak, mi jun xu'j ctzajel ti'ntl toyaj ti'j tja Dios, chi. Cyja'tzun tten o we' tu'n tul cyi'n xjal cyoyaj.

⁷ Mya nok o'cx otok chmet aju attok tajben tu'n tbant ak'untl, ax icx otok pon mastl tibaj.

Tej tjaw binchet tja Dios, xbalun ja

⁸ Akeju mas attok cynabl tu'n cybinchante ak'untl tbanilxix, baj cybincha'n ja xbalun cyi'j laj xbalun binchamaj ti'j nok' lino ex ti'j nok' ẍk'ilun que'yin, ẍjulin que'yin ex cyak que'yin; tcyakil nok' chubemajtok ex tbanil binchben cye, ex bi'x xi cychmo'n cyilbilal querubín cywitz.

⁹ Cycyakil xbalun lu junx ta' echbil cye: Cyajlaj var cynukbil ex cab var cywitz.

¹⁰ Oc t-slapun Bezaleel jwe' xbalun jun ttxlaj juntl, ax icx e tenba jwe'tl.

¹¹ E oc tk'o'n tak'al ẍk'ilun che que'yin te t-ẍcyin ttxlaj mancbil xbalun cyi'j ke jwe' otok che oc slapit. Ax icx e oc tk'o'n tak'al ttxlaj jun xbalun cyi'j ke jwe'tl.

¹² E oc tk'o'n 50 tak'al te t-ẍcyin ttxlaj tnejel xbalun ex 50 ttxlaj juntl, tu'n tcyaj ten jun twitz juntl.

¹³ Ax icx baj tbincha'n 50 ganch k'an pwak cytx'otx'il. Cyu'ntzun ke jlu e oc tmojba'n ke ttxlaj xbalun jun tuc'il juntl. Octzun ja xbalun te junx tten.

¹⁴ Ax icx baj tbincha'n junlaj xbalun ti'j cytzmal chip, tu'n t-xi lic'et tibaj ja xbalun.

¹⁵ Cycyakil ke xbalun lu junx ta' echbil cye: Olaj var cynukbil ex cab var cywitz.

¹⁶ E oc t-slapun jwe' xbalun jun ttxlaj juntl, ax icx e oc t-slapun kaktl xbalun jun ttxlaj juntl.

¹⁷ E oc tk'o'n 50 tak'al te t-ẍcyin ttxlaj tnejel xbalun ex 50 ttxlaj juntl.

¹⁸ Ax icx tbincha 50 ganch k'an c'uxbil cytx'otx'il tu'n cyoc moje' cytxa'n xbalun, tu'ntzun toc te junx tten.

¹⁹ Tbincha jun maksibl te ja xbalun ti'j ttz'umal ẍne'l toc tc'a' cyak que'yin, ex tibajxi jlu tbincha juntl maksibl ti'j tz'u'm tbanilxix.

²⁰ E baj tbincha'n txkan tz'lom ti'j tze' ch'i'x acacia, akeju wa'l cyten tu'n cyajben ti'j ja xbalun.

²¹ Teyle junjun tz'lom, jwe' var tnukbil ex ox xc'achub twitz.

²² Teyle junjun tz'lom at cabe t-ẍcyin tu'n tcu'x ke' jun ttxlaj juntl. Iclex e tenba cycyakil ke tz'lom tu'n ti'j ja xbalun.

²³ E baj tbincha'n winkin tz'lom tu'n cyoc ten tuj tumlal tnayaj k'ij te ja xbalun.

²⁴ Ax icx e cub tbincha'n 40 cyk'ukbil tz'lom sak pwak cytx'otx'il. Cabe tk'ukbil tjak' teyle junjun tz'lom, tu'n cycu'x ke' cycabil cyẍcyin cyuj.

²⁵ Ax icx tuj juntl pac' ja xbalun, tuj tumlal tbank'ab k'ij tbincha winkin tz'lom,

²⁶ ex 40 cyk'ukbil sak pwak cytx'otx'il, tu'n cyten cabe tjak' teyle junjun tz'lom.

²⁷ Atzun ti'jxi ja xbalun, tuj telex k'ij, e baj tbincha'n kak tz'lom

²⁸ ex cabetl tz'lom tu'n cyoc cyi'j ke cabe tbutx' te ti'jxi,

²⁹ akeju tu'n cymojbet xi'ynix t-xe', atzun twi' tu'n cyoc mojbet tu'n jun argoy. Atzun jlu tbincha cyi'j cycabil tz'lom cyi'j cycabil tbutx' te ti'jxi.

³⁰ E banttzun wajxak tz'lom ex kaklaj cyk'ukbil sak pwak cytx'otx'il, cabe tjak' teyle junjun tz'lom.

³¹ Ax icx baj tbincha'n jwe' tze' ti'j tze' ch'i'x acacia, te tk'e'lil, tu'n cyoc ten ke tz'lom cyi'j tuj jun pac' ja xbalun,

³² jwe'tl tze' tu'n cyoc ten ke tz'lom cyi'j tuj juntl pac' ex jwe'tl tu'n cyoc ten ke tz'lom cyi'j ti'jxi ja xbalun tuj telex k'ij.

³³ Baj tbincha'n aju tze' te tuj tmij, tu'n tic'x cymij ke tz'lom, tu'n t-xi ke' ti'j jun ttxa'n ex tu'n tpon baj ti'j juntl.

³⁴ Oc tlo'tzin k'an pwak cyi'j ke tz'lom ex e baj tbincha'n ke argoy k'an pwak cytx'otx'il jatum tu'n cyex ke tze'. Ax icx oc tlo'tzin k'an pwak cyi'j ke tze' lu.

³⁵ Baj tbincha'n jun xbalun te makbil, ti'j nok' lino chubemaj ttze'yil, ex ti'j nok' ẍk'ilun que'yin, ẍjulin que'yin, cyak que'yin, tbanil binchben te, ex bi'x xi tchmo'n cyilbilal querubín twitz.

³⁶ Baj tbincha'n cyaje tkan ti'j tze' ch'i'x acacia, ex oc tlo'tzin k'an pwak cyi'j. Ax icx tbincha ke tganchil k'an pwak cytx'otx'il, ex cyaje cyk'ukbil tkan sak pwak cytx'otx'il.

³⁷ Ax icx tbincha jun xbalun te makbil ttzi ja xbalun. Baj tbincha'n ti'j nok' ẍk'ilun que'yin, ẍjulin que'yin ex cyak que'yin ex ti'j nok' lino chubemaj ttze'yil, ex bi'x xi tchmo'n ke tilbilal twitz.

³⁸ E baj tbincha'n jwe' tkan tuc'ix adorn tjax tuj cywi', ex oc tlo'tzin k'an pwak cyi'j. Ax icx tbincha ke tganchil k'an pwak cytx'otx'il, ex tbincha jwe' cyk'ukbil tkan k'an c'uxbil cytx'otx'il.