Éxodo 3 - Mam de Huehuetenango Bible

Tej ttxocl Moisés tu'n Dios

¹ In cwentintok Moisés cyi'j t-ẍne'l Jetro*fn* aju tji' ex pal te Madián, at jun k'ij xi ti'n ke ẍne'l tuj tzkij tx'otx' ex pon t-xe witz Horeb, aju witz te Dios.

² Cubtzun tyec'un tib t-anjel Kman twitz tuj jun wi' ch'i'x c'ul in julintok tu'n k'ak'. O til in julintok ch'i'x c'ul tu'n k'ak' ex minti' in cub tz'e'ytok.

³ Tmatzun Moisés: Chin xel lak'e'ye que'yilte te, ex oc wila'ye tiku'n minti' in cub tz'e'y aju ch'i'x c'ul lu.

⁴ Tej tlonte Kman cyja'tok t-xi lak'e' Moisés que'yilte te, tzaj k'ajt tuj ch'i'x c'ul ex tzaj tma'n te cyja': —Moisés, Moisés. —Lu kine lu, chi Moisés, xi ttzak'we'n.

⁵ Tzajtzun tma'n Dios te cyja': —Mi'n tzaj lak'e'ya. K'i'mela t-xajbiya cyi'j tkana, porque xjan aju lugar jatum tcuba.

⁶ Ex tzaj tma'ntl: Akine Tdios tmana, aju Tdios Abraham, Tdios Isaac ex Tdios Jacob, chi Kman. Octzun tmaksi'n Moisés twitz tu'nju tzaj t-xobil ti'j tu'n tlonte twitz Dios.

⁷ Tzaj tma'ntl Kman: —Ma wile yajbil cye xjal etzan wu'ne, akeju ate' tuj Ejipt. Ma nbiye tk'ajk'ajel cywi' in che ayayan cyu'n caporal, ex ba'n wu'ne nic'pun in che c'ixbisanjtz,

⁸ ex tu'ntzun jlu ma chin cu'tze tu'n cyclet wu'ne tuj cyk'ab aj Ejipt, tu'n cyetz wi'ne tuj tx'otx' ma chixin ex tu'n cypon wi'ne tuj jun tx'otx' ba'n ex ma' twitz. Aju tx'otx' lu, k'inunxix ex tbanilxix. Atzun najl ke aj Canaán, ke aj Hetey, ke aj Amorrey, ke aj Ferezey, ke aj Hevey ex ke aj Jebusey.

⁹ Ma nbiye in che ayayan aj Israel ex ma wile in che c'ixbisanjtz cyu'n aj Ejipt.

¹⁰ Tu'ntzun jlu, txi'ya ja'lo. Cxel nsama'na twitz Faraón tu'n cyetz ti'na tuj Ejipt ke xjal etzan wu'ne, akeju aj Israel, chi Dios.

¹¹ Xitzun tma'n Moisés te Dios: —¿Ti woclene tu'n nxi'ye twitz Faraón ex tu'n cyetz wi'ne aj Israel tuj Ejipt?

¹² Tzaj ttzak'we'n Dios te: —Txi'ya, porque chin tele tuc'ila. Atzun jlu c'ajbel te jun techal teya ka wu'ne otok txi nsama'na: Oc cyetz ti'na tuj Ejipt ke xjal etzan wu'ne, cycyakile che c'ulule weye t-xe witz lu, chi Dios.

¹³ Xitzun tma'n Moisés te Dios: —Oc npone cywitz aj Israel, ex oc t-xi nma'ne cye cyja': Ma chin tzaj sama'ne cyuc'ile tu'n Cydios kxe'chel, nchiloye, ex ka ma tzaj cykanin weye: ¿Titzun tbi? ka che chi, ¿titzun cxel nma'ne cye? Chi Moisés.

¹⁴ Tzaj ttzak'we'n Dios te Moisés: —AKINE AJU AX KINE, chi Dios. Ax icx tzaj tma'ntl: Cyja'tzun tten cxel tma'na cye aj Israel: Aju toc tbi AKINE ma tzaj samante weye cyuc'ile, chicuya.

¹⁵ Xi tma'ntl Dios te Moisés: Atzun jlu cxel tma'na cye aj Israel: Ate Kman*fn* aju Cydios kxe'chel, Tdios Abraham, Tdios Isaac ex Tdios Jacob, ma tzaj samante weye cyuc'ile. Atzun nbiye jlu te jumajx, chi Dios, ex cucx ctzajel na'n cyuj cycyakil tabk'iyil, chicuya cye.

¹⁶ Txi'ya, chmon baja ke tij xjal at cyoclen cyxol aj Israel ex k'manxa cye cyja': Ate Kman aju Cydios kxe'chel, Tdios Abraham, Tdios Isaac ex Tdios Jacob, cub tyec'un tib nwitze, ex tzaj tma'n weye cyja': Ax toc ma tz'oc nk'o'ne cwent cyi'je ex ma wile aju in binchanjtz cyi'je tuj Ejipt, chi Dios.

¹⁷ Ex tmatl: Akine chin eletz k'inte cyeye tuj yajbil cyi'je tuj Ejipt, tu'n cyxi'ye tuj cytx'otx' aj Canaán, aj Hetey, aj Amorrey, aj Ferezey, aj Hevey ex aj Jebusey. Aju tx'otx' lu k'inunxix ex tbanilxix, chicuya cye.

¹⁸ Cxel bi'n tyola cyu'n ke tij xjal cyxol aj Israel. Aya cyuc'ix ke tij xjal lu che xe'le twitz rey te Ejipt, ex cxel cyma'ne te cyja': Ate Kmane aju Kdiose, ako'ye aj Hebrey, cub tyec'un tib kwitze. Tu'ntzun jlu, k'ontza ambil keye tu'n kxi'ye tuj tzkij tx'otx' ox k'ij kbeye, tu'n t-xi kk'o'ne chojbil te Kmane aju Kdiose, che chicuye te.

¹⁹ Ba'n wu'ne, mlay che etz tzokpi'ne tu'n rey te Ejipt ka minti' ma cub tcastiw wu'ne.

²⁰ Atzun weye cxel nyec'une wipumale, che bel nc'ixbisa'ne ke aj Ejipt cyu'n cycyakil nbinchbene nim cyipumal che bantel wu'ne cyi'j, ex maxitzun che eletz tzokpi'ne tu'n.

²¹ Wu'ne cnetel xtalbil cyu'n aj Israel cywitz aj Ejipt, tu'ntzun mi'n cyetz minti' k'i'n cyu'n.

²² Cxel tkanin teyle junjun xu'j te tvesin aj Ejipt, ex te xu'j aj Ejipt ax najl tuj tja, ke ti'xti sak pwak cytx'otx'il, k'an pwak cytx'otx'il ex xbalun tu'n toc cyk'o'n cyi'j cyal; cyja'tzun tten c'eletz cyi'n aju at cye aj Ejipt, chi Dios.