Éxodo 10 - Mam de Huehuetenango Bible

Aju c'ixbisabl cyu'n ẍplon

¹ Tzajtzun tma'n Kman te Moisés cyja': —Txi'ya yolil tuc'il Faraón, porque ma cub ncyuwsa'ne tanmi ex cyanmi keju at cyoclen ttxlaj, tu'ntzun cyxi nyec'une cye ke techal lu, nim cyipumal,

² ex tu'n t-xi ttx'olba'na cye tc'wa'la ex cye tal tchmana aju otok nbinchaye cyi'j aj Ejipt, ex ke techal nim cyipumal otok che'x nyec'une cye, tu'ntzun tel cynic'e ti'j akine Cymane, chi Kman.

³ E je'xtzun Moisés ex Aarón yolil tuc'il Faraón, ex xi cyma'n te cyja': —Chi Kmane, aju Kdiose ako'ye aj Hebrey: ¿Jtojtzun cub tmansin tiba nwitze? Che ttzokpi'mexa ke xjal etzan wu'ne tu'n cyc'ulun weye.

⁴ Katzun mi'n ma che ex ttzokpi'na, nchi'j che tzaj nsama'ne ẍplon tuj tcyakil tx'otx' Ejipt jatum in cawina.

⁵ Cnojel twitz tx'otx' cyu'n ex ya mi'n k'anchalintl twitz tx'otx'. Cbajel cywa'n tcyakilju minti' o naj tu'n sakbakun, ex cbajel cywa'n tcyakil tze' in ch'iy tuj cojbil.

⁶ Cbajel noj cyuj tjaya cyu'n, cyuc'ix cyja keju at cyoclen ttxlaja ex cyja cycyakil aj Ejipt. A jlu minti' o cyil ke t-xe'chela atxix tej cyul-len itz'j twitz tx'otx' ex matzun ctzajel ja'lo, chi Kmane aju Kdiose, che chi. E ajtztzun meltz'aj, ex e je'tz twitz Faraón.

⁷ Xitzun cyma'n keju attok cyoclen ttxlaj Faraón: —¿Jtoj txi tcolin Moisés tu'n tbinchante mya ba'n ki'j? Che ttzokpi'mexa ke xjal lu tu'ntzun cyxi' c'ulul te Cyman aju Cydios. ¿Na'nxpe tel tnic'a ti'j ma naj tx'otx' Ejipt? Che chi.

⁸ Ajtztzun txco'n Moisés ex Aarón tu'n Faraón ex xi tma'n cye cyja': —Cyxi'ye tu'n cyc'ulune te Cymane aju Cydiose, pero waje tu'n nbinteye alcyetzun ke che xe'l, chi Faraón.

⁹ Xi ttzak'we'n Moisés: —Il ti'j tu'n kexe cyuc'ix ke kc'wa'le ex ke tij xjal ate' kxole, cyuc'ix ke kcy'ajale ex ke kme'jele, cyuc'ix kẍne'le ex kwacẍe, porque cbel kic'sa'ne jun nintz nink'ij twitz Kmane, chi Moisés.

¹⁰ Xitzun tma'n Faraón cye: —¿Che chipetzune ka che elex ntzokpi'n keye cyuc'ix ke cyc'wa'le, ax icx ka cxe'l Cymane cyuc'ile? Ma k'anchalin ex ma tz'el nnic'e cyi'je, mya ba'n cyximbetze.

¹¹ Mya ic ctelbaju. Cyexe ja'lo o'cx akeye xinak, ex che c'ulune te Cymane, porque atzun jlu in che kanine ti'j, chi Faraón. E je'tztzun lajo'n twitz Faraón.

¹² Tzajtzun tma'n Kman te Moisés cyja': Nukpinx tk'aba tibaj tx'otx' Ejipt tu'n cytzaj ẍplon, tu'ntzun tbaj noj twitz tx'otx' Ejipt cyu'n ex tu'n tbaj cywa'n tcyakilju in ch'iy tuj cojbil, tuc'ix tcyakilju minti' naj tu'n sakbakun, chi Kman.

¹³ Xi tnukpi'n Moisés tcy'ako'ch tibaj tx'otx' Ejipt. Tzajtzun jun nintz cyk'ik' tuj tjawitz k'ij tu'n Kman. Jun k'ij ex jun ak'bil o ten cyk'ik' lu tuj Ejipt, ex tej tcub k'ij otok che ul ẍplon tu'n cyk'ik'.

¹⁴ Bajtzun noj tcyakil twitz tx'otx' Ejipt cyu'n ẍplon, ex nimxix cyajlal. Minti' o tzaj jun maj icju ojtxi ex mi'n tzajtl.

¹⁵ Baj noj tcyakil twitz tx'otx' Ejipt cyu'n, ex k'ek oc que'yin twitz tx'otx' cyu'n. Baj cywa'n tcyakil awal tuj Ejipt ex tcyakil twitz tze' minti' otok naj tu'n sakbakun. Misicyer ch'in cha'x cyaj ten ti'j tze', mi ti'j awal tuj tcyakil tx'otx' Ejipt.

¹⁶ Xitzun txocbaj naj Moisés ex Aarón tu'n Faraón, ex xi tma'n cye cyja': —Ma chin binchane il twitz Cymane aju Cydiose, ex cywitze.

¹⁷ Ja'lo chin cubsale cywitze tu'n tcub cynajsa'ne wile, o'cxtzun ja'lo. Che cubsane twitz Cymane aju Cydiose tu'n tel ti'n c'ixbisabl lu wi'je, aju bi'x ma naj tcyakil tu'n, chi Faraón.

¹⁸ Tej tetz Moisés twitz Faraón, oc ten cubsal twitz te Kman.

¹⁹ Ch'expettzun tbe cyk'ik' tu'n Kman, tzaj jun nintz cyk'ik' tuj telex k'ij, ex e je'x ikan cycyakil ẍplon tu'n cyk'ik' lu tuj Mar Cyak Que'yin. Mi jun ẍplon cyaj ten tuj tcyakil tx'otx' Ejipt.

²⁰ Pero cub tcyuwsa'n Kman tanmi Faraón, ex minti' e je'tz ttzokpi'n Faraón ke aj Israel.

Aju c'ixbisabl tu'n nimxix klolj

²¹ Xi tma'n Kman te Moisés cyja': Nukpinx tk'aba twitz cya'j tu'n ttzaj klolj tibaj tcyakil tx'otx' Ejipt, jun klolj nimxix wen.

²² Xi tnukpi'n Moisés tk'ab twitz cya'j ex tzajtzun nim klolj tuj ox k'ij tibaj tcyakil tx'otx' Ejipt.

²³ Mi jun xjal o til tuc'il ex mi jun o yucch tuj tlugar cyuj ox k'ij, atzun cye aj Israel attok spic'un jatum najl ke.

²⁴ Tzajtzun txco'n Moisés tu'n Faraón ex xi tma'n te cyja': —Cyxi'ye c'ulul te Cymane, ax icx cyi'nxe ke cyxu'jile cyuc'ile cyuc'ix cyc'wa'le; atzun ke cyẍne'le ex ke cywacẍe, ax cyk'on cyaje tzalu, chi Faraón.

²⁵ Xitzun ttzak'we'n Moisés: —Mlay bant icju. Ax icx ctzajel tk'o'na ambil tu'n cyxi ki'ne ke kalune. Atzun ke che ajbel te chojbil tu'n cycub kpatune te jun oyaj te Kmane aju Kdiose.

²⁶ Il ti'j che xel ki'ne ke kalune kuc'ile, mi jun cyjel ten, porque cyxoltzun ke che jawil ksc'o'ne ke oyaj tu'n kc'ulune te Kmane aju Kdiose. Minti' ba'n ku'ne alcye c'ajbel keye tu'n cyxi kk'o'ne te Kmane max oc kpone ma chixin, chi Moisés.

²⁷ Pero cub tcyuwsa'n Kman tanmi Faraón, ex minti' e je'tz ttzokpi'n ke aj Israel.

²⁸ Nok o'cx xi tma'ntl Faraón te Moisés: —Texa nwitze. Mi'n tzaja juntl maj que'yilte weye. Katzun ma tzaja juntl maj que'yilte weye, cymela, chi Faraón.

²⁹ Xitzun tma'n Moisés te: —Ba'n ma tmaya, ax toc mlay tz'oc nque'yintle twitza, chi Moisés.