Ester 5 - Mam de Huehuetenango Bible

Pon Ester yolil tuc'il rey

¹ Tujtzun toxin k'ij oc tk'o'n Ester t-xbalun aju in ajben cyu'n ke cyxu'jil rey, ex ocxtzun twitz tja rey aju tocx tujxi, ex axtzun cub ten twitz tja rey jatum k'ukl tocx rey tuj tk'ukbil te cawbil, aju tcubsa'n tumlal ttzi ja.

² Tejtzun ttil rey lu Ester aju t-xu'jil wa'ltok ttzi ja, jawtzun tzalaj ti'j ex xi tnukpi'n tbastón k'an pwak aju tzyu'n tu'n. Atzunte Ester xi lak'e' ex oc tmaco'n twi bastón,

³ ex atzunte rey xi tkanin te: —¿Ti ma baj ti'ja nxu'jile Ester? ¿Titzun taja? Ka ma tzaj tkanina mij ncawbile jacu txi nk'o'ne teya.

⁴ Atzunte Ester xi ttzak'we'n: —In chin cubsane teya Tat Rey, ka ba'n tuj twitza, tu'n t-xi'ya wa'l wuc'ile ja'lo tuj jun nintz wa'n ma bant wu'ne te nimbil teya, ex tuc'ix Amán tu'n t-xi tuc'ina.

⁵ Xitzun tma'n rey cye ke ajbel te: —Jurat naj cytxcontze Amán, ic tza'nx tajbil Ester. Cyja'tzun tten xi' rey tuc'ix Amán tuj nintz wa'n otok baj tbincha'n Ester.

⁶ Tej matok in che wa'n ex in che c'an vin, xi tma'n rey te Ester: —¿Alcye tkanbetza? Jacu txi nk'o'ne teya. Ex ¿alcye taja? Kanintza ex jacu txi nk'o'ne. Masque tzaj tkanina mij ncawbile jacu txi nk'o'ne teya.

⁷ Atzunte Ester xi ttzak'we'n: —Cxel nkanine teya aju wajbile ex atzun jlu:

⁸ Ka ax toc at-xix tc'ujlalila wi'je, Tat Rey, ex ka ba'n tuj twitza tu'n ttzaj tk'o'na aju wajbile ex tu'n ttzaj tk'o'na aju cxel nkanine teya, bix tzula nchi'j tuj juntl nintz wa'n cbantel wu'ne te nimbil teya, ex tuc'ix Amán tu'n ttzaj tuc'ina. Jacutzun txi nma'ne teya alcye wajbile, Tat Rey, chi Ester.

Baj tbincha'n Amán jun tze' tu'n tjaw yobit Mardoqueo ti'j

⁹ Nimxix in tzalaj Amán tej tetz tuj nintz wa'n, pero tzaj nim tk'oj tej tque'yinte lu Mardoqueo k'ukltok ttzi tja rey, minti' jaw we' ex minti' jaw yucch tej tic' Amán twitz,

¹⁰ pero minti' xi tyec'un tk'oj Amán. Tejtzun tpon tja, e tzajtzun ttxco'n ke tamiw; tuc'ix Zeres aju t-xu'jil tzaj ttxco'n,

¹¹ ex oc ten yolil cyuc'il cyi'j ke tk'inumabl nimxix, cyi'j nimcu tc'wa'l at, ti'j tza'n tten otok jaw nimsa'n tu'n rey ex ti'j ju toclen oc k'o'n mas nim cywitz ke xjal ma' cyoclen ttxlaj rey ex ke ajbel te.

¹² Ex xi tma'ntl: —Ax icx o'cxcu a kine ẍin txconjtze tu'n Ester aju t-xu'jil rey, tu'n nxi'ye tuj nintz wa'n aju ma txi tk'o'n te rey; ax icx ma chin txconjtze juntl maj tu'n, tu'n nxi'ye tuj juntl nintz wa'n aju cbel tk'o'n te rey nchi'j.

¹³ Pero tcyakil jlu minti' tajben weye, porque cucx toc nque'yine Mardoqueo aju xjal Judiy k'ukl ttzi tja rey.

¹⁴ Cycyakiltzun ke tamiw Amán tuc'ix t-xu'jil xi cyma'n te cyja': —Binchama jun tze' te 25 var twa'l ex awa'n cu'xa tu'n tjaw yobit Mardoqueo ti'j, ex prim nchi'j txi'ya kanil te rey tu'n tjaw yobit Mardoqueo ti'j, cyja'tzun jacu txi'ya tuc'il nim tzalajbil tuc'il rey tuj nintz wa'n, che chi. A jlu ba'n e'la tuj twitz Amán ex xi tma'n tu'n tbaj binchet ju tze'.