Efesios 5 - Mam de Huehuetenango Bible

Tza'n tten tu'n cyank'in ke tc'wa'l Dios

¹ Cycano'mile ti'j Dios, porque tc'wa'l Dios keye, c'ujla'nxix keye tu'n.

² Cucx cyc'ujlam cyibe ic tza'nte Crist ma ko tc'ujla ex xi tk'on tib tu'n tcyim te kxel ic tza'n jun tal ẍne'l in cub te chojbil kil, atzun jun oyaj at tc'oc'jal ex in tzalaj Dios ti'j.

³ Atzunju yaẍbil ex tcyakil ttz'ilil, ex tcyakilju in pon cyc'u'j xjal ti'j, minti' tu'n cyyoline ti'j, porque mya ba'n tu'n cyyolin ocslal ti'j jlu.

⁴ Ex mi'n che yoline ti'j tc'ayil yol, ex ka jun yol minti' tnabl, ex ka jun yakbil mya ba'n, porque mya ba'n jlu; mas ba'n tu'n t-xi cyk'o'ne chjonte te Dios.

⁵ Porque ba'n jlu cyu'ne, ke xjal in che yaẍin, ex ke xjal tz'il tuj cyanmi, ex ke xjal in pon cyc'u'j ti'j k'inumabl, minti' cyoclen ti'j tcawbil Crist, aju ax tcawbil Dios, porque ka ma pon kc'u'j ti'j k'inumabl, junx ta' jlu ic tza'n in ko c'ulun cywitz ke tilbilal.

⁶ Cycwentim cyibe tu'n mi'n cycub sbu'ne tu'n jun yol nokx gan, porque tu'n tlaj tcyakil jlu in tzaj tk'oj Dios cyi'j ke xjal miban che bin.

⁷ Cyja'tzun mi'n tz'oc cymojban cyibe cyuc'il.

⁸ Porque ojtxi ate'ye tuj klolj, atzun ja'lo ate'ye tuj spic'un tu'nju ocslal keye ti'j Kajaw; che ank'intzune tuj spic'un porque te spic'un keye.

⁹ Porque aju in tzaj tk'o'n spic'un ke, atzun tu'n kbinchante ba'n, ex tu'n kbet tuj tumelxix, ex tu'n kyolin axix toc.

¹⁰ Tz'elx cynic'e ti'j alcyeju ba'n tuj twitz Kajaw.

¹¹ Ex mi'n tz'oc cyk'on cyibe ti'j ju in binchanjtz tuj klolj minti' jun ba'n in tk'o'n, nok o'cx tu'n t-xi cymayo'ne.

¹² Porque ch'ixbil tu'n kyolin ti'j ju in cybincha'n xjal tuj ewaj.

¹³ Pero tcyakil nne'l tuj k'ancha'l oc tcanun spic'un ti'j; porque tcyakil nne'l tuj k'ancha'l tu'n spic'un.

¹⁴ Cyja'tzun at jun yol in tma'n cyja': Aya in tana, k'i'mel twatla ex we'ctza cyxol cyimni, ex cbel ten t-spic'umal Crist tibaja, chitzun.

¹⁵ Cyja'tzun che ximane ti'j tza'n tten tu'n cybete; mi'n che bete minti' cynable, nok o'cx tu'n tten cynable.

¹⁶ Tz'ajbenxwit tcyakil k'ij cyu'ne tu'n cybinchanteye ba'n, porque mya ba'n ju tk'ijlalil ja'lo.

¹⁷ Cyja'tzun, mi'n che oque minti' cynable, nok o'cx tu'n tel cynic'e ti'j alcyeju tajbil Kajaw.

¹⁸ Mi'n che c'ane k'e'n; porque tu'ntzun jlu minti' ch'in cyjuc'bil cyib xjal; nok o'cx tu'n tnoj tuj cyanmiye tu'n Xewbaj Xjan.

¹⁹ Che yoline cyi'j salmo cyxolxe ex che bitzane; cybitzanxe bitz te Dios, che bitzane ex cyk'onxe chjonte te Kajaw tu'n tcyakil cyanmiye.

²⁰ Cucx cyk'onxe chjonte te Kman Dios ti'j tcyakil, nok tu'n Kajaw Jesucrist.

Tza'n tten tu'n cyank'in ocslal tuj cyja

²¹ Cynimanx cyibe cyxolxe tu'nju at tchi Crist tuj cywitze.

²² Akeye xu'j, cynimanxe cychmile ic tza'n in xi cynimane Kajaw.

²³ Porque ate xinak nejenel te xu'j, ic tza'n te Crist nejenel cye cycyakil ocslal; ex ax Crist Clol cye; atzun cye ocslal t-ximlal Crist ke.

²⁴ Ic tza'n cye ocslal in xi cyniman Crist, icxtzun cye xu'j tu'n t-xi cyniman cychmil tuj tcyakil.

²⁵ Akeye chmilbaj, cyc'ujlam cyxu'jile ic tza'n te Crist ma che tc'ujla cycyakil ocslal ex xi tk'on tib tu'n tcyim tu'n cyclet,

²⁶ tu'ntzun cyel tpa'n tu'n cyajben ocslal o'cx te Dios, cybajlenxi tx'jet tu'n tyol Dios; ic tza'n tu'n a' otok che baj tx'jet.

²⁷ Tu'ntzun cycub ten ke ocslal twitz Dios tbanilxix che que'yin, minti' ch'in tz'il cyi'j ex minti' ch'in yu'ch twitz cyxbalun ex minti' juntl mya ba'n cyi'j, nok o'cx tu'n cyajben o'cx te Dios ex minti' ch'in cypaltil.

²⁸ Ax icx ke chmilbaj cyc'ujlam cyxu'jil ic tza'n in cyc'ujla'n cyximlal. Aju xjal in tc'ujla'n t-xu'jil in tc'ujlan tib.

²⁹ Porque mi jun xjal nne'l tic'un t-ximlal, nok o'cx in tc'a'chan ex cwentin tu'n, ic tza'n in tbincha'n Crist cye cycyakil ocslal.

³⁰ Porque atzun ato'c ti'j t-ximlal Crist, ex ti'j tchibjal ex ti'j tbakil.

³¹ Cyja'tzun tten, cyjel tk'o'n xinak tman ex ttxu', ex cmojebil tuc'il t-xu'jil ex che oquel cycabil te junx.

³² Aju yol lu ma' t-xilen, mlay tz'el knic' ti'j ku'nx kib; aju yol in xi nma'ne in yolin ti'j Crist ex cyi'j cycyakil ocslal.

³³ Cyja'tzun tten teyle junjun cyeye, c'ujlam t-xu'jil ic tza'n in tc'ujlan tib, ax icx te xu'j nimanx tchmil.