Efesios 3 - Mam de Huehuetenango Bible

Aju tak'un Pablo tu'n t-xi tma'n tkanil colbil cye xjal mya judiy ke

¹ Tu'n tlaj jlu in chin na'ne Dios cyi'je, akine Pablo, pres kine tu'n tlaj ocslal kine ti'j Jesucrist, ex pres kine tu'n tlaj in chin ajbene cyxole, akeye xjal mya judiy.

² Porque malo cybiye tza'n tten tzaj tk'o'n Dios t-xtalbil weye tu'n t-xi nk'o'ne cyeye.

³ Wecuye tzaj tchic'ba'n Dios aju yol ewantok nej, ic tza'n cab ox yol xi ntz'ibane cyeye nej.

⁴ Oc tjaw cysch'i'ne aju u'j ma txi ntz'ibane cyeye, c'elel cynic'e ti'j tza'n tten sel nnic'e ti'j tyol Crist ewantok nej.

⁵ Aju yol lu ewantok nej minti' tzaj yec'un cye xjal tuj tk'ijlalil ojtxi, pero ja'lo ma tzaj yec'un cye ke apostl xjan ex cye t-sanjel Dios tu'nju Xewbaj Xjan.

⁶ Atzun jlu ma tzaj yec'un: Ke xjal mya judiy ma cyc'am jun etzbil junx cyuc'il xjal judiy, ex ma che oc ten ti'j junx cyximlal, ex tu'nju ocslal ke ti'j Jesucrist at cyoclen ti'j ju yol tzaj ttziyan Dios, nok tu'nju ma txi cyniman tkanil colbil.

⁷ Nok tu'n t-xtalbil Dios ma tzaj k'o'n woclene tu'n woque ajbel ti'j tkanil colbil, ma tzaj k'o'n jlu weye tu'n tipumal Dios.

⁸ Akine mas tal ch'in cywitz cycyakil ocslal; pero ma tzaj tk'o'n Dios t-xtalbil weye tu'n t-xi npacba'ne tkanil colbil cye xjal mya judiy, aju tkanil lu in yolin ti'j tk'inumabl Crist mlay tz'el baj knic' ti'j.

⁹ Ex ma tzaj tk'o'n Dios t-xtalbil weye tu'n t-xi nchic'ba'ne cye cycyakil xjal tza'n tten tu'n tjapun ju yol ewan tuc'il Dios atxix tuj tabk'iyil ojtxi, ate Dios o binchante tcyakil t-xe tnejel.

¹⁰ Atzun t-ximbetz Dios, tu'ntzun t-xi yec'un cye nejenel ex cye keju at cyoclen tuj cya'j alcye tnabl Dios junxilchak tten cyi'j cycyakil ocslal, tu'n tel cynic' ti'j alcye tnabl Dios.

¹¹ Cub t-ximan Dios jlu atxix ojtxi tu'n tjapun tu'n Kajaw Jesucrist.

¹² Ex tu'n Crist ma ke' kc'u'j ex at tzokpibl ke tu'n kpon lak'e' twitz Dios, nok tu'n kocslabl ti'j Crist.

¹³ Cyja'tzun chin cubsale cywitze tu'n mi'n tbaj cyc'u'je tu'nju in chin yajlanjtze tu'n cylaje, porque aju nnic'x wu'ne, tu'n toc te jun tzalajbil cyeye.

Aju tc'ujlalil Crist ki'j

¹⁴ Tu'ntzun tlaj jlu in chin cub ẍmeje'ye twitz Tman Kajaw Jesucrist.

¹⁵ Ti'j Tman Kajaw Jesucrist tzajni xe't cybi cycyakil c'loj cyiyjil, keju ate' tuj cya'j ex keju ate' twitz tx'otx'.

¹⁶ In chin cubsane twitz Dios tu'n ttzaj tk'o'n nimxix t-xtalbil cyeye ti'j ju tk'inumabl chmo'n tuj cya'j, ex tu'n cycyuwsanjtze tuj cyanmiye ex tu'n ttzaj k'o'n cyipumale tu'n T-xew Dios.

¹⁷ In chin cubsane twitz tu'n tnajan Crist tuj cyanmiye nok tu'n cyocslable, icwit tten cyc'ujlalile ic tza'n jun tze' at tloc' ex tawan tib,

¹⁸ tu'n telxix cynic'e ti'j cyuc'ix cycyakil ocslal, tza'n tten tc'ujlalil Crist, nic'pun twitz, nic'pun tnukbil, nic'pun t-xe' ex nic'pun twa'l,

¹⁹ ex tu'n cyojtzkinteye tc'ujlalil Crist, tu'ntzun tnojxix tuj cyanmiye tu'n Dios, masque mlay tz'el baj knic' ti'j tcyakil.

²⁰ Ate Dios at tipumal tu'n tbinchante tcyakil. At tipumal tu'n ttzaj tk'o'n mastl twitzju in xi kkanin ex twitzju in ko ximan ti'j. Tcyakil jlu ctzajel tk'o'n porque in ak'nan tipumal tuj kanmi.

²¹ Nimanxwit tbi Dios cyu'n cycyakil ocslal nok tu'n Jesucrist tuj tcyakil tabk'iyil te jumajx. Icxwitju.