സങ്കീർത്തനങ്ങൾ 108 - സത്യവേദപുസ്തകം C.L. (BSI)

വിജയത്തിനുവേണ്ടിയുള്ള പ്രാർഥന

ഒരു ഗീതം; ദാവീദിന്റെ സങ്കീർത്തനം

¹ ദൈവമേ, എന്റെ മനസ്സ് അചഞ്ചലമാണ്, എന്റെ മനസ്സ് അചഞ്ചലമാണ്. ഞാൻ പാടി അങ്ങയെ പ്രകീർത്തിക്കും. എന്റെ ആത്മാവേ, ഉണരുക.

² വീണയും കിന്നരവും ഉണരട്ടെ. ഞാൻ പ്രഭാതത്തെ പാടിയുണർത്തും.

³ സർവേശ്വരാ, ജനതകളുടെ മധ്യേ ഞാൻ അങ്ങയെ വാഴ്ത്തും. അന്യജനതകളുടെ മധ്യേ ഞാൻ അങ്ങയെ പ്രകീർത്തിക്കും.

⁴ അവിടുത്തെ അചഞ്ചലസ്നേഹം ആകാശത്തെക്കാൾ ഉന്നതമാണ്. അവിടുത്തെ വിശ്വസ്തത മേഘങ്ങളോളം എത്തുന്നു.

⁵ ദൈവമേ, അവിടുത്തെ മഹത്ത്വം ആകാശത്തിലെങ്ങും വെളിപ്പെടുത്തണമേ. അവിടുത്തെ തേജസ്സ് ഭൂമിയിലെങ്ങും വ്യാപിക്കട്ടെ.

⁶ അവിടുത്തെ വലങ്കൈയാൽ എന്നെ രക്ഷിക്കണമേ. എന്റെ പ്രാർഥനയ്‍ക്ക് ഉത്തരമരുളിയാലും; അവിടുന്നു സ്നേഹിക്കുന്ന ജനം വിടുവിക്കപ്പെടട്ടെ.

⁷ ദൈവം തന്റെ വിശുദ്ധമന്ദിരത്തിൽനിന്ന് അരുളിച്ചെയ്തിരിക്കുന്നു. വിജയാഘോഷത്തോടെ ഞാൻ ശെഖേം വിഭജിക്കും. സുക്കോത്ത് താഴ്‌വര എന്റെ ജനത്തിന് അളന്നുകൊടുക്കും.

⁸ ഗിലെയാദ് ദേശം എനിക്കുള്ളത്; മനശ്ശെയും എൻറേതാണ്; എഫ്രയീം എന്റെ പടത്തൊപ്പിയും, യെഹൂദാ എന്റെ ചെങ്കോലുമത്രേ.

⁹ മോവാബ് എന്റെ ക്ഷാളനപാത്രം; എദോമിന്മേൽ ഞാൻ എന്റെ ചെരുപ്പെറിയും. ഫെലിസ്ത്യദേശത്തിന്മേൽ ഞാൻ ജയഘോഷം കൊള്ളും.

¹⁰ കോട്ട കെട്ടി ഉറപ്പിച്ച നഗരത്തിലേക്ക് എന്നെ ആർ കൊണ്ടുപോകും? എദോമിലേക്ക് ആർ എന്നെ നയിക്കും?

¹¹ ദൈവമേ, അവിടുന്നു ഞങ്ങളെ കൈവെടിഞ്ഞിരിക്കുന്നുവോ? അവിടുന്നു ഞങ്ങളുടെ സൈന്യങ്ങളോടൊത്തു പുറപ്പെടുന്നില്ലല്ലോ.

¹² ശത്രുവിനെ നേരിടാൻ ഞങ്ങളെ സഹായിക്കണമേ! മനുഷ്യന്റെ സഹായം വ്യർഥമാണല്ലോ.

¹³ ദൈവത്തോടൊത്തു ഞങ്ങൾ സുധീരം പോരാടും. അവിടുന്നു ഞങ്ങളുടെ വൈരികളെ ചവിട്ടി മെതിക്കും.