യോശുവ 16 - സത്യവേദപുസ്തകം C.L. (BSI)

എഫ്രയീമിനും മനശ്ശെക്കും കൊടുത്ത ദേശം

¹ യോസേഫിന്റെ പുത്രന്മാർക്കു ലഭിച്ച അവകാശഭൂമിയുടെ അതിർത്തി യെരീഹോ നീരുറവിനടുത്തുള്ള യോർദ്ദാനിൽ ആരംഭിക്കുന്നു.

² അത് മലനാട്ടിലൂടെ ബേഥേലിൽ കടന്ന് ലൂസിൽനിന്ന് അർക്ക്യർ ജീവിച്ചിരുന്ന അതാരോത്തും,

³ യഫ്ളേത്യരുടെ ദേശവും താഴത്തെ ബേത്ത്-ഹോരോനും, ഗേസെരും കടന്ന് മെഡിറ്ററേനിയൻ സമുദ്രത്തിൽ എത്തുന്നു.

⁴ ഈ പ്രദേശം ആണ് യോസേഫിന്റെ പുത്രന്മാരായ മനശ്ശെക്കും എഫ്രയീമിനും അവകാശമായി ലഭിച്ചത്.

എഫ്രയീമിന്റെ ഓഹരി

⁵ എഫ്രയീംഗോത്രക്കാർക്കു കുടുംബം കുടുംബമായി ലഭിച്ച പ്രദേശങ്ങൾ: അതിന്റെ അതിര് കിഴക്ക് അതാരോത്ത്-അദ്ദാരിൽ നിന്നു ബേത്ത്-ഹോരോനിലേക്കും;

⁶ അവിടെനിന്നു മെഡിറ്ററേനിയൻ സമുദ്രത്തിലേക്കും പോകുന്നു. മിഖ്മെഥാത്ത് അവരുടെ ദേശത്തിന്റെ വടക്കുവശത്താണ്. കിഴക്കുവശത്തെ അതിര്, വളഞ്ഞു താനാത്ത്-ശീലോവിലൂടെ യാനോഹായുടെ കിഴക്കുവശത്തേക്കു പോകുന്നു.

⁷ യാനോഹായിൽനിന്ന് അതാരോത്തിലും നാരാത്തിലും കൂടി കടന്ന് യോർദ്ദാന്റെ തീരത്ത് യെരീഹോവിൽ അത് അവസാനിക്കുന്നു;

⁸ തപ്പൂഹായിൽനിന്ന് ആ അതിര് പടിഞ്ഞാറ് കാനാ തോടുവരെ ചെന്നു മെഡിറ്ററേനിയൻ സമുദ്രത്തിൽ അവസാനിക്കുന്നു.

⁹ എഫ്രയീംഗോത്രക്കാർക്കു കുടുംബം കുടുംബമായി ലഭിച്ച അവകാശം ഇതാണ്. ഇതു കൂടാതെ മനശ്ശെ ഗോത്രക്കാരുടെ ദേശാതിർത്തിക്കുള്ളിൽ എഫ്രയീമ്യർക്കു കൊടുത്തിരുന്ന പട്ടണങ്ങളും അവയോടു ചേർന്നുള്ള ഗ്രാമങ്ങളും ഉൾപ്പെടുന്നു.

¹⁰ അവർ ഗേസെരിൽ പാർത്തിരുന്ന കനാന്യരെ അവിടെനിന്നു നീക്കിക്കളഞ്ഞില്ല. അവർ എഫ്രയീമ്യർക്ക് അടിമവേല ചെയ്തുകൊണ്ട് ഇന്നും അവിടെത്തന്നെ കഴിയുന്നു.