Римјаните 3 - Нов превод на Новиот Завет 2023

¹ Каква предност имаат Јудејците, или каква е ползата од обрезанието?

² Голема, на секој начин. Најнапред, зашто навистина ним им беа доверени Божјите слова.

³ Па што, ако некои не поверувале? Дали нивната неверност ќе ја уништи Божјата верност?

⁴ Никако! Нека се признае дека Бог е вистинит, а секој човек лажлив, како што е напишано: „За да се покажеш праведен во Своите зборови, и да по­бедиш кога ќе си на суд.“

⁵ Ако, пак, нашата неправедност ја истакнува Божјата справедливост, тогаш што да речеме? Да не е Бог несправедлив, кога се гневи? Говорам како човек.

⁶ Никако! Инаку, како тогаш Бог ќе му суди на светот?

⁷ Зашто, ако преку мојата лага Божјата вистина се покаже уште повозвишена, за Негова слава, тогаш зошто и јас сѐ уште сум суден како грешник?

⁸ И не би требало ли – како што некои луѓе хулат на нас и велат дека така учиме – да пра­ви­ме зло, за да излезе добро? Впрочем така и хулат некои луѓе на нас и велат дека така учиме. Тие се справедливо осудени.

Никој не е праведен

⁹ И што тогаш, во предност ли сме? Ни најмалку, зашто веќе ги обвинивме, како Јудејците така и Елините, дека сите тие се под грев,

¹⁰ како што е напишано: „Нема праведен ниту еден,

¹¹ нема разумен, нема кој да Го бара Бога;

¹² сите се отклонија, заедно станаа бескорисни; нема кој да прави добро, нема ниту еден.“

¹³ „Нивното грло е отворен гроб; со своите ја­зици мамат; под нивните усни – змиски отров,

¹⁴ устата им е полна со клетва и горчина.

¹⁵ Нозете им се брзи за крвопролевање;

¹⁶ пустош и мака по нивните па­тишта;

¹⁷ тие не го познаа патот на мирот.

¹⁸ Страв Божји нема пред нив­ните очи.“

¹⁹ А знаеме дека сѐ што Законот вели, го вели за оние што се под Законот, за да се затвори секоја ус­та и целиот свет да одговара пред Бога,

²⁰ зашто преку делата на Законот пред Него нема да се оправда никој; бидејќи преку Законот се осознава гре­вот.

Праведноста се добива преку вера

²¹ А сега независно од Законот се јави Божјата праведност, посведочена од За­конот и од Пророците.

²² Божјата праведност преку верата во Исус Христос е во сите и врз сите што веруваат. Бидејќи нема разлика,

²³ зашто сите згрешија и лишени се од Божјата слава.

²⁴ Но оправдувањето им е дарувано, со Неговата благодат, преку откупот во Христос Исус,

²⁵ Кого Бог Го постави со Својата крв да биде жртва за помирување преку ве­рата, за да ја покаже Својата праведност преку простување на поранешните гревови, во времето на Божјото долготрпение,

²⁶ та да ја покаже Својата праведност во сегашново време, за Самиот да биде праведен и да го оправда оној што верува во Исус.

²⁷ Тогаш, каде е пофалбата? Таа е ис­клучена. Според кој закон? Оној на делата ли? Не, туку според законот на верата.

²⁸ Така, ние сметаме дека човекот се оправдува преку верата, без делата на Законот.

²⁹ Или Бог е само на Ју­дејците, а не и на незнабошците? Да, и на незнабошците е.

³⁰ Бидејќи еден е Бог, Кој ќе го оправда обрезанието од вера и необрезанието преку верата.

³¹ Значи, дали го укинуваме Законот преку верата? Никако! Напротив, ние го утврдуваме Законот.