Римјаните 2 - Нов превод на Новиот Завет 2023

Праведноста на Божјиот суд

¹ Затоа, немаш изговор ти човеку, што судиш, кој и да си, зашто за она што го осудуваш другиот самиот себеси се осудуваш, бидејќи ти, што судиш, го вршиш истото.

² А знаеме дека Божјиот суд е вистинит над оние што прават така.

³ Зар мислиш, о човеку, дека ќе го из­бегнеш Божјиот суд ти, кој ги осудуваш оние што вршат такви работи, какви што правиш и сам?

⁴ Или, пак, ја презираш Неговата голема благост, стрпливост и дол­го­трпеливост, не разбирајќи дека Бож­јата благост те води кон покајание?

⁵ Но, поради твојата тврдокорност и непокајаното срце си собираш гнев за денот на гневот, кога ќе се открие пра­ведниот Божји суд,

⁶ Кој секому ќе му даде според не­го­вите дела:

⁷ вечен живот на оние кои со трпение во добрите дела се стремат кон слава, чест и нераспадливост;

⁸ гнев и јарост, пак, на оние што од себичност ѝ се непокорни на вистината, а ѝ се покоруваат на неправдата.

⁹ Мака и тегоба на секоја човечка ду­ша која прави зло, најпрвин на Јудеец, а потоа и на Елин;

¹⁰ а слава, чест и мир на секој што прави добро, најнапред на Јудеец, а потоа и на Елин!

¹¹ Зашто кај Бога нема пристрасност.

¹² Оние што згрешиле без Закон, без Закон ќе загинат; а сите што згрешиле под Закон, според Законот ќе бидат судени,

¹³ бидејќи пред Бога не се праведни оние што го слушаат Законот, туку ќе бидат оправдани оние што го исполнуваат Законот.

¹⁴ Зашто, кога незнабошците, кои немаат Закон, природно ги из­вр­шу­ваат одредбите на Законот, тогаш тие, иако немаат Закон, самите на себе се Закон;

¹⁵ тие докажуваат дека делото на Законот е запишано во нивните срца, за што сведочи и нивната совест, а и нив­ните помисли кои час ги обвинуваат, час ги одбрануваат,

¹⁶ за денот, кога, според моето благовестие, Бог преку Исус Христос ќе ги суди тајните на луѓето.

Јудејците и Законот

¹⁷ Ете, ти се нарекуваш Јудеец, се потпираш на Законот, се фа­лиш со Бога,

¹⁸ ја знаеш Неговата волја и знаеш да разликуваш што е подобро, зашто се поучуваш од Законот,

¹⁹ и убеден си дека самиот ти си водач на слепци, светлина на оние што се во мрак;

²⁰ наставник на неразумни, учител на мали деца, во Законот имаш образец на знаењето и на вистината.

²¹ Тогаш како ти, кој учиш дру­ги, себеси не се учиш?

²² Ти, кој проповедаш да не се краде, крадеш ли? Ти, кој велиш да не се врши прељуба, прељубодејствуваш ли? Ти, кој се гнасиш од идолите, крадеш ли од хра­мо­вите?

²³ Ти, кој се фалиш со Законот, не Го бесчестиш ли Бога прес­тапувајќи го Законот?

²⁴ Зашто, како што е напишано: „Поради вас Божјото име се хули меѓу незнабошците“.

²⁵ Обрезанието е навистина полезно, ако го извршуваш Законот. Ако, пак, го прекршуваш Законот, твоето обре­зание станува необрезание.

²⁶ И така, ако необрезаниот ги пази одредбите на Законот, нема ли неговото необрезание да се смета како обрезание?

²⁷ И необрезаниот по тело, из­вр­шу­вај­ќи го Законот, нема ли да те осуди тебе, кој и покрај Писмо и обрезание си ста­нал престапник на Законот?

²⁸ Зашто не е Јудеец оној што е таков по надворешност, ниту обрезание е она што е надворешно, врз телото,

²⁹ туку Јудеец е оној што е внатрешно таков, а обрезание е она што е во срцето, по дух, а не по буква. Неговата пофалба не е од луѓето, туку од Бога.