Марко 3 - Нов превод на Новиот Завет 2023

Исус лекува во сабота

¹ И Тој повторно влезе во синагогата, а таму имаше еден човек со исушена рака.

² И внимаваа на Него, дали ќе го излекува во саботен ден, за да Го обвинат.

³ А Тој му рече на човекот со ису­ше­ната рака: „Застани насреде!“

⁴ Ним, пак, им кажа: „Што е допуштено да се прави во сабота: добро или зло? Да се спаси еден живот или да се погуби?“ А тие молчеа.

⁵ Па, кога ги изгледа со гнев, натажен поради нивните закоравени срца, му ре­че на човекот: „Протегни ја раката!“ Тој ја протегна и раката му стана здрава, како и другата.

⁶ Фарисеите, штом излегоа, веднаш се состанаа со Иродовците против Него, советувајќи се како да Го погубат.

Мноштво следбеници

⁷ Исус, пак, отиде со Своите ученици кон морето и по Него одеше многу на­род од Галилеја, од Јудеја,

⁸ од Ерусалим, од Идумеја, од другата страна на Јордан и од околијата на Тир и Сидон. Штом слушнаа какви дела врши, тие во голем број дојдоа кај Него.

⁹ И им порача на Своите ученици да Му приготват кораб, поради народот, за да не Го туркаат;

¹⁰ зашто мнозина беше излекувал, та­ка што сите кои беа болни, навалуваа кон Него за да Го допрат.

¹¹ И нечистите духови, штом ќе Го ви­деа, паѓаа пред Него и викаа, велејќи: „Ти си Син Божји!“

¹² Но Тој строго им забрануваше да разгласуваат за Него.

Исус избира дванаесет апостоли

¹³ Потоа се искачи на гората и ги по­вика кај Себе оние што Сам ги одбра, и тие дојдоа кај Него.

¹⁴ И избра дванаесетмина да бидат со Него и да ги праќа да проповедаат;

¹⁵ и да имаат власт да лекуваат бо­лес­ти и да изгонуваат демони:

¹⁶ Симон, на кого му даде име Пе­тар;

¹⁷ па Јаков Зеведеев и Јован, братот на Јаков, на кои им даде име Воанергес, што зна­чи: Синови на громот;

¹⁸ па Андреј, Филип, Вартоломеј, Матеј, Тома, Јаков Алфеев, Тадеј, Симон Кананит

¹⁹ и Јуда Искариотски, кој и Го предаде.

Исус и Велзевул

²⁰ И дојдоа во една куќа; и пак се собра на­род, така што тие не можеа ниту леб да јадат.

²¹ И кога чуја Неговите, отидоа да Го приберат, зашто се говореше дека не бил при Себеси.

²² А книжниците, што беа слегле од Ерусалим, велеа дека во Него е Вел­зе­вул и дека демоните ги истерува со силата на началникот на демоните.

²³ И, кога ги повика, им говореше во параболи: „Како може сатаната да изго­нува сатана?

²⁴ Ако едно царство се раздели самото против себе, тоа царство не може да се одржи;

²⁵ и, ако еден дом се раздели самиот против себе, тој дом не може да опстане;

²⁶ ако и сатаната се дигнал против се­беси, и се разделил, не ќе може да се одржи, туку му дошол крајот.

²⁷ Никој не може, кога ќе влезе во ку­ќата на силен човек, да му ја ограби по­ку­ќнината, ако најнапред не го врзе силниот; и дури тогаш ќе ја ограби куќ­ата.

²⁸ Вистина ви велам: на човечките синови ќе им се простат сите гревови и хули, колку и да хулеле;

²⁹ но кој похули на Светиот Дух, нему нема да му се прости довека, туку ќе биде виновен пред вечниот суд.“

³⁰ Зашто велеа: „Нечист дух има во Него.“

Исусовото семејство

³¹ И дојдоа мајка Му и Не­говите браќа, па, стоејќи надвор, порачаа да Го викнат.

³² А околу Него седеше народ, и Му рекоа: „Ете, мајка Ти и Твоите браќа и сестри се надвор и Те бараат.“

³³ А Тој им одговори, велејќи: „Која е Мојата мајка и кои се Моите браќа?“

³⁴ Па, погледнувајќи кон оние што седеа околу Него, рече: „Еве ги Мојата мајка и Моите браќа.

³⁵ Зашто оној што ја исполнува волјата Божја, тој Ми е брат, и сестра и мај­ка!“